شاندێن بلند یێن پەدەکێ و یەنەکێ دجڤن

شاندێن بلند یێن پەدەکێ و یەنەکێ ل ھاڤینگەھا دوکانێ دجڤن و دانوستاندنان ل سەر پێکانینا کابینەیا دەھێ یا حکوومەتا ھەرێما کوردستانێ دکن.

بریارە ئیرۆ رۆژا دوشەمبی، 28/4/2025 شاندێن بلند یێن پارتیا دەمۆکراتا کوردستانێ (پەدەکە) و یەکیتیا نشتیمانی یا کوردستانێ (یەنەکە) ل ھاڤینگەھا دوکانێ ژ بۆ پێکانینا کابینەیا دەھێ یا حکوومەتا ھەرێما کوردستانێ بجڤن.

شاندێن بلند یێن پەدەکێ و یەنەکێ پێشتر ژی گەلەک جاران ل سەر ئاستێ بلند و تیمێن تەکنیکی ژ بۆ پێکانینا حکوومەتا نوویا ھەرێما کوردستانێ جڤیانە، نھا ژی گەھشتنە قۆناغا پارڤەکرنا پۆستان.

سەرکردەیێن ڤان ھەر دو پارتیان تەکەزێ ل سەر وێ یەکێ دکن کو، د دەمەکە نێزیک دە کابینەیا نوویا حکوومەتێ تێ پێکانین.

داوی جڤینا پەدەکێ و یەنەکێ ژ بۆ پێکانینا کابینەیا دەھێ یا حکوومەتا ھەرێما کوردستانێ ل رۆژا 17 ڤێ مەھێ ل نڤیسینگەھا سیاسی یا یەکیتیا نشتیمانی یا کوردستانێ ل سلێمانیێ ھات کرن.

ئەو جڤین ژ دو ناڤبران پێک دھات؛ ناڤبرا یەکێ د ناڤبەرا ھەر دو شاندێن تەکنیکی یێن پەدەکێ و یەنەکێ دە بوو و یا دویێ ژی د ناڤبەرا ھەر دو شاندێن بلندێن وان ھەر دو پارتیان دە بوو.