ئەندامێ کۆنسەیا رێڤەبەر یا کەجەکێ موستەفا کاراسو لگەل تەلەڤیزیۆنا مەدیا خەبەر یا پەکەکێ کو ل ئەورۆپایێ وەشانێ دکە ھەڤپەیڤینەک ئەنجامدا. کاراسو د هەڤپەیڤینا خوە دە ل سەر گەلەک مژاران، د ناڤ دە مژارا دانینا چەکان ژ ئالیێ پەکەکێ ڤە، نێرینێن خوە ئانین زمان. کاراسو د داخویانیا خوە دە کۆنفەرانسا یەکیتیا کوردان یا ل رۆژئاڤا ھاتیە لدارخستن ژی نرخاند و ل سەر ئەنەکەسێ داخویانیێن ئیستیفزازی دا.ن

مەدیا خەبەرێ داخویانیێن کاراسو د رووپەلێن خوە یێن مەدیایا جڤاکی دە پارڤە کرن. لێ بەلێ یا بالکێش ئەڤە بوو مەدیا خەبەر، کو ب گشتی داخویانیێن رێڤەبەرێن کەجەکێ د ڤیدیۆیێن کورت دە ل سەر حەسابا خوە یا “X” پارڤە دکە، ڤێ جارێ چ ڤیدیۆیێن کورت د حەسابا خوە یا “X” دە پارڤە نەکرن. ھەروھا، مەدیایا پەکەکێ ھندەک ھەڤۆکێن د ئاخافتنا کاراسو دە نەنڤیساندن.

کاراسو: ژ بەر کو ئەنەکەسێ چ بژاردەیەکا دن نەبوو ھاتە ھەڤدیتنێن یەکیتییێ

کاراسو د ئاخافتنا خوە دە گەلەک خالێن وەکی پرسگرێکا تەندورستیا سڕی سوورەیا ئۆندەر و کۆنفەرانسا ل رۆمایێ ژ بۆ ئۆجالان ھاتیە لدارخستن نرخاندن و د داویێ دە ئەو وەکی مژارێن نە گرینگ و دویەمین ب ناڤ کرن. کاراسو د ئاخافتنا خوە دە گۆتنێن کو ئەنەکەسێ تاوانبار و بچووک دخن ژی ب کار ئانین.

کاراسو دەربارێ ئەنەکەسێ دە وھا گۆت: ” بەریا نھا ئەنەکەسە لگەل چەتەیان یەک بوو، لگەل ئێریشێن داگیرکەریێ یێن دەولەتا ترک یەک بوو. واتە دژبەریا شۆرەشا رۆژئاڤا دکر. دژبەریا باکور و رۆژھلاتێ سووریەیێ دکر. لێ بەلێ پشتی کو جۆلانی چوویە شامێ، رێکەفتنا کو ئەو د ناڤ دە بوون ژ ھەڤ بەلاڤ بوو، وەکی دن چارەیا خوە نەما، ھاتن لگەل رێڤەبەریا خوەسەر یا باکور و رۆژھلاتێ سووریەیێ، لگەل پەیەدێ و پارتیێن دن ھەول دا ل ھەڤ بکە. دڤێت ب ڤی رەنگی بهێت فێھمکرن. د ڤر دە ب راستی ژی پەیەدە ژی گەلێن باکور و رۆژھلاتێ سووریەیێ ژی نێزیکاتیەکا چێکەر و تێگھشتی نیشان دان. ھەتا دۆھ دژبەری دکر، پشتگری ددا داگیرکەران، پشتگری ددا داگیرکرنا عەفرینێ، پشتگری ددا داگیرکرنا سەرێکانیێ، ل ئالیێ دەولەتا ترک بوون، بوونە ئالیگرێ چەتەیان. ژ خوە لگەل وان چەتەیێن داگیرکەر د ناڤا هەڤپەیمانیێ دە بوون. لێ بەلێ پشتی کو ئەو پێڤاژۆ قەدیا لێ نێرین کو نابە، نەچار مان لگەل باکور و رۆژھلاتێ سووریەیێ، لگەل پەیەدێ و پارتیێن دن ل ھەڤ بکن. باکور و رۆژھلاتێ سووریەیێ، گەلێن وێ، کوردان ژی نەگۆتن ڤان نا. گۆتن، مادەم ژ ور دەرکەتن، مادەم ھەلوەستا خوە یا بەرێ وێ دەوام نەکن، مینا بەرێ نابنە ئالیگرێ داگیرکەریا دەولەتا ترک، خوە نادن ئالیێ وان چەتەیان، ئەگەر دێ هێنە گەل کوردان ئەڤە تشتەکی باشە. کوردان ژی ھەمبێزا خوە ژێ رە ڤەکرن.”

موستەفا کاراسو: ئارمانجا یەکیتیا کوردان نە داخوازکرنا مافێن کوردانە

موستەفا کاراسو د بەردەوامیا ئاخافتنا خوە دە ئیدیعا کر کو کۆنفەرانس ب دەستپێشخەرییا ئۆجالان ھاتیە لدارخستن و بەحسا ھەولدانێن سەرۆک بارزان ژ بۆ یەکیتیا کوردان نەکر. کاراسو ھەر وھا دیار کر کو دڤێت کۆنفەرانس ل سەر مافێن کوردان نەسەکنە و گۆت: “بانگەک وھا ژ ئالیێ سەرۆکاتیێ ڤە و سڤککرنا تێکلیێن لگەل دەولەتا ترکیەیێ، لدارخستنا کۆنفەرانسێ ھێسانتر کر. د ڤێ مژارێ دە، مە کۆنفەرانسەک وسا پەژراند. وان کۆمیتەیەک ھەڤبەش ئاڤا کرنە، بێ گومان ئەڤ ئەرێنییە. دڤێت ئەو ژ بۆ دەمۆکراتیکبوونا تەڤاھیا سووریەیێ پشتگریێ بکن. گەر کورد تەنێ بێژن ‘ئەو مافێن منن’، ئەوێ کار نەکە. دڤێت کورد د دەمۆکراتیکبوونا سووریەیێ دە رۆلا خوە بلیزن. ئەگەر سووریا دەمۆکراتیک نەبە، چ واتەیا وێ نینە. دڤێت ئەو کەسێن کو بەشداری ڤێ کۆنفەرانسێ بوونە د دەمۆکراتیککرنا سووریەیێ دا رۆلا خوە بلیزن.”

خەتا پەکەکێ ل سووریەیێ وندا کر

راستە کو مرۆڤ ببێژە ھەلوەستا موستەفا کاراسو یا کو رۆژئاڤا وەکی ملکێ پەکەکێ دبینە وھەڤدیتنێن یەکیتییێ بچووک دخە، ھەم ژ بۆ ڤەشارتنا پراکتیکێن بەرێ یێن پەکەکێ و ھەم ژی ژ بۆ چێکرنا ئاستەنگیان ل پێشیا پێکھاتنا ھەڤدیتنێن یەکیتییێ یێن پێشەرۆژێ تێ کرن. ھەروھا، بەحسنەکرنا ھەول و خەباتا سەرۆک بارزان ژ بۆ رۆژئاڤا پشتی ھلوەشینا رەژیما ئەسەد ژ ئالیێ کاراسو ڤە نیشان دا کو پەکەکە نەرەحەتە.

لگەل دەستپێکرنا کریزا سووریەیێ کو هەڤدەمی بھارا عەرەبی بوو، پەکەکە بوو بەشەک ژ پرۆژەیا ھەیڤا شیعە یا ئیرانێ و ل ئیراقێ لگەل حەشدا شەعبی و ل سووریەیێ ژی لگەل رەژیما ئەساد ھەڤپەیمانیەک چێکر. ل شوونا کو لگەل ئۆپۆزیسیۆنا سووریەیێ  تەڤبگەرن، وان لگەل رەژیما ئەسەد ھەڤکاری کرن و تەمەنێ رەژیما ئەسەد 13 سالان درێژ کرن. بەرپرسێن پەکەکێ یێن وەکی باھۆز ئەردال، موستەفا کاراسو و جەمیل بایک گەلەک جاران ب داخویانیێن وەکی “بێیی مە، رەژیما ئەسەد نکارە بژی، ئۆپەراسیۆنەک ل دژی ئیرانێ دێ وەرە دەستپێکرن” ئالیێن خوە ئەشکەرە دکرن. لگەل ھلوەشینا رەژیما ئەسەد، دەولەتا ئیرانێ راستی شکەستنەکا مەزن ھات و سیاسەتا پەکەکێ ل رۆژئاڤا ژی ئیفلاس کر.

ھەروھا، ھەر چەند ئەنەکەسە شریکێ ئۆپۆزیسیۆنا سووریەیێ بت ژی، پشتگری نەدا داگیرکرنا عەفرین و سەرێ کانیێ.

ژ دەستپێکا پێڤاژۆیێ ڤە، پەکەکێ ب بەردەوامی دەولەتێن وەکی ئامەریکا و فرانسایێ، یێن کو دخوەستن کوردان بینن جەم ھەڤ، غەیداندنە و ھەڤدیتنێن یەکیتییێ خەراب کرینە.

کاراسو: “بێیی سەرۆکاتیێ کۆنگرە چێنابە”:

موستافا کاراسو د داخویانیا خوە دە ھەر وھا گۆت کو ئەو بێیی بەشداریا فیزیکی یا ئۆجالان د کۆنگرەیێ دە، ئەو کۆنگرەیێ ل دار ناخن.