سەرۆکێ پەکەکێ عەبدوللا ئۆجالان د 27ێ شوباتێ دە گۆت، “بلا پەکەکە خوە هلوەشینە، تەڤاهی بەرپرساتی ل سەر منە.” پەکەکێ بەرسڤا ئۆجالان دا و راگهاند، “ئەم گۆتنێن ئۆجالان قەبوول دکن.” لێ پەکەکێ خوەست پێڤاژۆیێ درێژ بکە و مژوولاهیێ چێکە و هندەک رێیێن دن ژ بۆی خوە ببینە، لێ بەلێ ژ بەر فشارێ نەچار ما کۆنگرەیا خوە لدار بخە. و د نیزیک دە ژی پەکەکە دێ ئەشکەرە بکە کو دێ چەکێن خوە دەینە.
تشتەکی بالکێشە کو هیچ کەسەک ژ بەر هلوەشاندنا پەکەکێ خەمگین نینە. هەم کوردێن کو پەکەکێ رەخنە دکن و هەم ژی یێن کو پشتگیرییا پەکەکێ دکن ژ ڤێ بریارا پەکەکێ خەمگین نینن. پەکەکێ دخوەست کو ل باژارەکێ هەرێما کوردستانێ کۆنگرەیەکا مەزن لدار بخە و وەکە شۆیەکی چێکە. لێ بەلێ دەولەتا ترک ئەڤ یەک قەبوول نەکر کو مەسەلە وەکە 19ێ جووتمەها 2009 بە، دەما گەریلا چوون ترکیەیێ وەک وێ دەمێ پەکەکە شۆیەکی بکە.
پەکەکە کو د 27ی مژدارا 1978 هاتبوو دامەزراندن د 8ێ گولانا 2025 دە هات هلوەشاندن، مەلەفا پەکەکێ یا 52 سالان بەرداوم بووی هات قەپاتکرن، پەکەکە د سالا 78ێ دە ب پاسەکی ب رێ کەت و گۆت پاسا مە بەر ب کوردستانەکا یەکپارچە و سەربخوە ڤە دچە، و کورد ژ بۆی سەرخوەبوونێ چوون ناڤا ڤێ پاسێ دە، جان دان، خوین دان و کەد دان. مالباتێن کورد زارۆکێن خوە و پێشەرۆژا خوە فەدا کرن، پشتی ڤێ تاریخێ، ل گۆر دەزگەهێن مافێن مرۆڤان 17 هەزار کوشتنێن بکەر نەدیار چێبوون، کوردێن هەری وەلاتپەروەر و کوردستانی هاتن قەتلکرن. 5 هەزار گوند و گوندەوار ژ بەر شەرێ پەکەکێ وترکیێ هاتن ڤالا کرن، 70 هەزار ئینسان کەتن گرتیگەهان دە. و پیتری 15 هەزار کوشتنێن ناڤخوەیی د ناڤا پەکەکێ ب خوە دە چێبوون.
د سالێن 90ی دە پاسا پەکەکێ هێدی هێدی ئیشارەتێ ژ رێکێ دەرکەتنێ نیشاندا، لێ د سالا 1999 دە دەما ئۆجالان چوویە ئیمرالیێ پاسێ بەرێ خوە ب یەکجاری گوهەرت و زڤرینەکا یوتێرن ئەنجامدا. ئۆجالان گۆت دەولەتخوازی پاشڤەرۆتی یە و لیستکەکا ئەمپریالیزمێ یە و موستەفا کەمال کۆمارەک ژ بۆی کورد و تورکان چێکریە. ئەڤ پاسا کو ژ بۆی ئازادی و سەرخوەبوونا کوردستانێ ب رێ کەتبوو، ڤێ جارێ ژ بۆی دەمۆکراتیکرنا ترکیەیێ و ترکیەبوونێ بەرێ خوە دا ئەنقەرێ.
پەکەکێ 1ی خزیرانا 2004 ڤێ جارێ ژ بۆی دەمۆکراتیک کرنا ترکیەیێ شەر دا دەستپێکرن. 10 هەزار کەچ و کورێن کوردان ڤێ جارێ ژ بۆی ترکیەیێ دان کوشتن، یانی پەکەکێ د شەرێ خوە دە 5 نفش کرن قوربانی. د 8ی گولانا 2025، ڤێ پاسێ ئیستۆپ کر، پشتی مژوولبوون و تەخریباتەکا 52 سالان و بێ دەستکەفتی ئۆجالان گۆت، پیدڤی ناکە هوون مافێن خوە یێن چاندی ژی بخوازن و راگهاند ئەم پەکەکێ هلدوەشینین.
هێشتا حەسابا 52 سالان یا گەلێ کورد نەدانە و هێژان ناڤێ ب هەزران کوردێن کو بوونە قوربانی نەهاتنە ئەشکەرە کرن، پەکەکە دبێژە، “ئەم بسەرکەتن، ئەم دێ تەکۆشینەکا نوو بدن دەستپێکرن”. پەکەکە دخوازە جارەکە دن کوردان بەر ب رێیەکە نەدیار ڤە ل پەی خوە بکشینە، لێ بەلێ دڤێت کورد ئێدی ژ ڤێ پاسێ رە ببێژن بەسە و دڤێت ئەڤ پاسە ئێدی ژ بۆی گورستانا ترومبێلان بهێت ڤەگوهاستن.
د ناڤا ڤان 52 سالان دە کارێ هەری باش یێ پەکەکێ تەنێ ئەڤ بوو کو خوە هلوەشاند، دڤێت پەکەکە تونە ببە و ئەڤ سەدەیێن کو ل بەر داخوازیێن کوردان چێکربوون هلوەشن، دڤێت کورد خوە ژ ڤێ خەفکا دەولەتا ترک دامەزراندی ئانکو پەکەکێ خەلاس بکە.
