سەرۆکێ گشتی یێ پارتییا وەلاتپارێزێن کوردستانێ (PWK) موستافا ئۆزچەلیک ئیرۆ 14ێ گولانێ ب بۆنەیا ھاتنا رۆژا زمانێ کوردی پەیامەک وەشاند و تێ دە تەکەز کر، “ژ بۆ لێخوەدیدەرکەتنا زمانێ کوردی، بەرییا ھەر تشتی دڤێت ئەم ب کوردی باخڤن، ئەم کوردی فێر ببن.”
پەیاما سەرۆکێ گشتی یێ (PWK) موستافا ئۆزچەلیک:
ژ بۆ لێخوەدیدەرکەتنا زمانێ کوردی، بەرییا ھەر تشتی دڤێت ئەم ب کوردی باخڤین، ئەم کوردی فێر ببین
جەلادەت بەدرخان و ھەڤالێن خوە د 15ێ گولانا 1932 دا ھەژمارا یەکەما کۆڤارا ھاوارێ دەرخستن و ھەتا 1943یێ 87 ھەژمارێن ھاوارێ دەرکەتن.
گرینگییا کۆڤارا ھاوارێ، ئەوە کو، یەکەمین کۆڤارا کوردییە کو ب تیپێن لاتینی ھاتییە وەشاندن
ژ بەر ڤێ یەکێ، 15ێ گولانێ، ژ ئالییێ ھندەکان ڤە وەک “جەژنا زمانێ کوردی”، ژ ئالییێ ھندەکان ڤە ژی وەک “رۆژا زمانێ کوردی” تێ پیرۆز کرن.
ئەم جەلادەت بەدرخان و ھەڤالێن وی ب رێزداری ب بیر تینن و سپاسییا وان دکن.
بەلێ، رۆژا 15ێ گولانێ ژی د ناڤ دە، ژ بۆ زمانێ کوردی ( کورمانجی، کردکی/زازاکی) گەلەک چالاکییێن جوور ب جوور تێنە ل دار خستن، خەبات تێنە کرن.
ھەلبەتە کو ھەموو چالاکی و خەباتێن ژ بۆ زمانێ کوردی گرینگن، پیرۆزن و دڤێت ئەم پشتگرییا وان بکن.
لێ بیا من، ل گەل ڤان خەبات و چالاکییان، نھا ژ بۆ زمانێ کوردی بەرییا ھەر تشتی دڤێت ئەم ڤان چار تشتێن ئەساسی بجیھ بینن.
یەکەم: ھەر کوردەکی کو ب کوردی نزانە، دڤێت کوردی فێر ببە. ھەر مالباتەکا کوردان دڤێت زارۆکێن خوە فێری کوردی بکن؛ دڤێت د ناڤ مالا خوە و د ھەر بەشێن ژییانێ دە زمانێ مەیێ ئەساسی کوردی بە، ئەم ب کوردی باخڤن.
دویەم: ب قاسی ڤێ گاڤا یەکەم، تشتەکی دن یێ گرینگ ژی ھەیە کو، مخابن گەلەک ئالی و کەس پاشگوھ دکن. ئەو ژی دەرسا بژارتە یا کوردییە. ژ ئالییەکی ڤە مالباتێن کورد ب ھەژمارەکا گەلەکی کێم ژ بۆ زارۆکێن خوە سەری ل دەرسا بژارتەیا کوردی ددن. ژ ئالییەکی ژی وەک کو دەولەت ژ دەرسا بژارتەیا کوردی هێرس بووبە، ئاستەنگییان دەردخە، گەلەکی کێم مامۆستەیان دادمەزرینە. ژ بەر ڤێ راستییێ، دڤێت ئەم ب ئاوایەکی جدی ل سەر ڤێ مژارێ راوەستن. دڤێت ئەم بکاربن ھەر سال 200.000 زارۆکێن کوردان ل دەرسا بژارتەیا کوردی قەید بکن و ھەر کو ھەرە زێدەتر بکن. ژ بۆ 200.000 زارۆکان دێ ھەری کێم پێویستی ب 2000 مامۆستە و ب ملیۆنان پرتووکێن دەرسێ ھەبن. ما گەلۆ ئەڤە چ ھەیەجانێ نادە وە؟
ئەڤ ھەردو گاڤ، دێ رێیا بدەستخستنا مافێ پەروەردەیا ب کوردی و فەرمیبوونا زمانێ کوردی خوەشتر و خورتر بکن.
سێیەم: دڤێت خەباتەکا بەرفرەھ بهێت مەشاندن دا کو زمانێ کوردی ببە زمانێ فەرمی و پەروەردەیا ب زمانێ کوردی بهێت قەبوول کرن و د قانوونا بنگەھین و ھەموو یاسایێن پەیوەندیدار دە ئەڤ ماف بێنە گارانتی کرن.
چارەم: دڤێت ھەموو شارەدارییێن ل کوردستانێ ل گەل ترکی، کوردی (کورمانجی، کردکی/زازاکی) وەک زمانێ فەرمی یێ شارەدارییێ بکار بینن. کرەشێن زارۆکان یێن ب کوردی و دبستانێن ب کوردی ڤەکن.ھەموو پارتیێن سییاسی، دەزگەھێن سڤیل و مەسلەکی یێن ل کوردستانێ ژی ژ بۆ بجیھ ئانینا ئاخافتن و فێربوونا زمانێ کوردی، دڤێت سەفەربەر ببن دا کو ئاموور و ئیمکانێن پێویست بێنە ئاڤا کرن.
بەلێ، ئەڤ چار گاڤ، دێ سیستەما ئاسیمیلاسیۆنێ ب ئاوایەکی بھێز بھەژینین، دێ رێ ڤەکن دا کو ب ملیۆنان کوردێن کو ب کوردی نزانن بکاربن ب کوردی باخڤن، کوردی فێر ببن.
کوردی ھەبوونا ملەتێ کوردە، ھەیکەلێ نەتەوەتی یا مەیە. ژ بۆ کو ئەم بکاربن رێ ل بەر زەخت و ئاسیمیلاسیۆنا ل سەر کوردی بگرن، وەرن ئەم ژ پێکانینا ڤان ھەر چار گاڤان دەستپێ بکن.
