فوئاد حسێن: ئیراق، ھەرێما کوردستانێ و ترکیە ل سەر بریارا پەکەکێ ھەڤاھەنگیێ دکن

وەزیرێ دەرڤە یێ ئیراقێ ئاماژەیێ ددە ھەڤاھەنگیا ناڤبەرا ئیراق، ھەرێما کوردستانێ و ترکیەیێ ل سەر بریارا پەکەکێ یا ژ بۆ خوەھلوەشاندن و چەکدانانێ.

وەزیرێ دەرڤەیێ ئیراقێ فوئاد حسێن ئیرۆ چارشەمبێ، 14ێ گولانا 2025ێ د کۆنفرانسەکا رۆژنامەڤانی دە تەکەز کر کو، ئیراق پێشوازیا بریارا پارتیا کارکەرێن کوردستانێ (پەکەکێ)یا ژ بۆ خوەھلوەشاندن و چەکدانانێ دکە.

فوئاد حسێن ئەشکەرە ژی کر کو، ئیراق، ھەرێما کوردستانێ و ترکیە ژ بۆ سەرەدەریکرنا لگەل بریارا پەکەکێ ھەڤاھەنگیێ دکن و ژ بۆ ڤێ ئارمانجێ ژی چەند فکر ھەنە.

وەزیرێ دەرڤەیێ ئیراقێ ھێڤی ژی کر کو بریارا پەکەکێ ببە گاڤەک بەر ب ئاشتی و ئارامیێ ڤە، ل ترکیە و تەڤاھیا ھەرێمێ.

پارتیا کارکەرێن کوردستانێ (پەکەکە) پێر دوشەمبێ، 12ێ گولانا 2025ێ ئەنجامێن کۆنگرەیا خوەیا 12ێ ئەشکەرە کرن و راگەھاند کو ل سەر بانگا ئۆجالان، پەکەکێ بریار دا کو ئاڤاھیا خوە یا رێخستنی ھلوەشینە و تێکۆشینا چەکداری ب داوی بکە.