د تەقینا مینەکێ دە ل پێنجوینێ، 10 کارکەر بریندار بوون و هن ژ وان برینداران ژ بۆ نەخوەشخانەیێ ل باژارێ سلێمانیێ هاتن ڤەگوهاستن.
برێڤەبەرێ ناڤەندا رزگارکرنێ یا لەزگین یا سلێمانیێ سامان نادر ئیرۆ 30ێ گولانا 2025ێ ژ مالپەرا کوردستان24ێ رە گۆت، «د تەقینا مینەکێ دە ل باژارکێ پێنجوینێ، 10 کەس بریندار بوون».
سامان نادر هەروەسا گۆت، «شەش ژ وان کەسان د رەوشەکە باش دە نە و ل نەخوەشخانەیا پێنجوینێ تێنە چارەکرن، دو بریندارێن دن ژی ژ بۆ نەخوەشخانەیا شارێ هاتنە شاندن».
قایمقامێ ناڤچەیا پێنجوینێ هێمن ئیبراهیم ل سەر ڤێ روودانێ ژ کوردستان24ێ رە راگهاند، «ئیرۆ دانێ سبێ ل ناڤ زەڤیەکە زەبەشان ل گوندێ کێلۆیێ مینەک ب 10 کەسان ڤە تەقیا، لێ رەوشا دو ژ وان باشە و نەبرنە نەخوەشخانەیێ».
هێمن ئیبراهیم هەروەسا گۆت، «تەڤایا وان کارکەران کوردن و شێنیێن باژارکێن شارەزوور و سەید سادقێ نه. د دەما بێهنڤەدانا خوە دە، ئەو د بەرماییکێن شەری خەبتینە و ب وان ڤە تەقیایە».
ل گۆری زانیارێن کوردستان24ێ، ئەو جهێ کو ئەو بوویەر لێ قەومیە ئەردێ چاندنێیە و جۆتکار هەر سال وێ ژ بۆ مەرەمێن چاندنێ ب کار تینن. د دەما تەقینا وێ مینێ دە، هەژمارەکە کارکەران دخەبتین و د وێ تەقینێ دە دەهـ کەس بریندار بوون.
