وەزیرێ بەرەڤانیا ترکیەیێ یەشار گولەر راگھاند، ترکیە پشتی گوھەرتنێن ل سووریەیێ، وەک یەکەمین پشتەڤانا رێڤەبەریا نوویا وی وەلاتی دەرکەتیە پێش و د وارێ لەشکەری دە راھێنان و شێورمەندیێ پێشکێشی ئارتێشا سووریێ دکە.
گولەر، کو د چارچۆڤەیا سەردانەکا فەرمی دە ل بروکسەلێ یە، ژ بۆی ئاژانسا “رویتەرس” ئاخڤی و دیار کر، نھا زوویە بەحسا ڤەکشینا لەشکەرێن ترک ژ سووریەیێ وەرە کرن و ئەڤ یەک تەنێ پشتی پێکھاتنا ئاشتی و ئارامیەکا تام، نەمانا گەفا تەرۆرێ و ئەولەھیا سینۆران پێکانە.
گولەر تەکەز کر کو کارێ پێشەکی یێ ترکیەیێ ل سووریەیێ پاراستنا یەکپارچەیی و سەروەریا ئاخا سووریەیێ و تێکۆشینا ل دژی تەرۆرێیە و ئەنقەرە د ڤان مژاران دە ب ئاوایەکی چالاک پشتگریا شامێ دکە.
گولەر دا زانین، زێدەتری 20 ھەزار لەشکەرێن ترکیەیێ ل سووریەیێ نە و گۆت: “ئاخافتنا ل سەر ئەگەرا ڤەکشین یان ڤەگوھەستنا ھێزێن مە ژ سووریەیێ ھین زوویە. ترکیە راھێنان و شێورمەندیا ھێزێن ئارتێشا سووریەیێ دکە و پشتەڤانیا بھێزکرنا بەرگریا وان دکە. ئەم گاڤان دهاڤێژن ژ بۆ زێدەکرنا شیانا بەرەڤانیا سووریەیێ.”
دەربارێ پلانا ڤەکشینا لەشکەری دە، گولەر دەستنیشان کر کو پلانەکا لەزگینا ئارتێشا ترکیەیێ ژ بۆ ڤەکشینا ژ سووریەیێ نینە و مەرجێن ڤێ یەکێ وھا رێز کر: “دەما سووریە ب تەمامی گھشت ئاشتی و ئارامیێ، دەما گەفا تەرۆرێ ل ناڤچەیێ ب تەمامی نەما، دەما سینۆرێن مە ب تەمامی ئەولە بوون و کۆچبەرێن سووریێ ڤەگەریان وەلاتێ خوە، وێ دەمێ ئەم دێ ھێزێن خوە ڤەکشینن.”
وەزیرێ بەرەڤانیێیێ ترکیەیێ ئاماژە ب ئێریشێن ئیسرایلێ یێن ل سەر سووریەیێ کر و گۆت کو ئەڤ ئێریش ددۆمن. لێبەلێ، وی ئانی زمان کو “ترکیە و ئیسرایل ژ بۆ کێمکرنا ئالۆزیان و رێگرتنا ل روودانێن لەشکەری ل سووریەیێ د دانووستاندنان دە بەردەوام دبن. ئەم ناخوازین روودانەکا نەچاڤەرێکری روو بدە.
د داویێ دە، وەزیرێ بەرەڤانیا ترکیەیێ بال کشاند سەر گرینگیا راکرنا سزایێن ئامەریکا و یەکیتیا ئەورۆپایێ یێن ل سەر سووریەیێ و گۆت: “بریارا راکرنا دۆرپێچان ل سەر سووریەیێ، ژ بۆ چارەنڤیسا سووریەیێ رۆلەک کلیدی دلیزە. ئەم دخوازین جیرانا خوە سووریەیێ ژ نوو ڤە ئاڤا بکن دا کو پەنابەر ب دلێ خوە ڤەگەرن.”
