جوانەکی کورد ل گوندێ حاج حەسه‌نایێ ناڤچەیا جەندێریسێ یا هەرێما عەفرینێ ژ ئالیێ چەکدارەکی نەناس ڤە هاتە شه‌هید كرن.
چاڤکانیێن هەرێمی راگهاندن کو مستەفا جەمیل شێخۆ یێ 16 سالی، رۆژا چارشەمێ 18 هه‌زیرانا 2025ێ پشتی نیڤێ شەڤێ، ل سەر ئەردێ خوە پانەلێن رۆژێ دپاراستن، دەما کو ژ ئالیێ دو چەکداران ڤە ب مەبەستا دزیێ راستی ئێریشێ هات. ئەو ل جهێ بوویەرێ هاتە کوشتن.
چاڤکانیەک نێزیکی مالباتا قوربانیێ ل نەخوەشخانەیا عەفرینێ گۆت کو یەک ژ ئێریشکاران د دەما ئێریشێ دە ژ لنگێ خوە بریندار بوو و بەری کو برەڤە، مۆتۆرسیکلەتا خوە ل جهێ بوویەرێ تەرکاند.
چاڤکانیێ زێدە کر کو جەنازەیێ جوانێ کورد دێ ئیرۆ ژ بۆ ڤەشارتنێ وەرە ڤەگوهاستن بۆ گوندێ وی.
گوندێن هەرێما عەفرینێ، د ناڤ دە جەندرێس ژی، د نەبوونا ئەولەهیێ، بوویەرێن دزی، رەڤاندن، کوشتن و بنپێکرنێن دن ده مانه. ئالیێن چەکدارێن سووری و ملیسێن گرێدای ئەنقەرێ پر جاران ل پشت ڤان بوویەرانن، بێیی کو تەدبیرێن پێویست ژ هێلا رایەدارێن فەرمی ڤه ل دژی وان وەرن گرتن.
رێخستنێن مافێن مرۆڤان دەستنیشان دکن کو هەدەفگرتنا سڤیلێن کورد ل عەفرین، ب تایبەتی ل دەڤەرێن چاندنی و دوور، د سالێن داوی دە زێدە بوویە. ئەڤ بوویەر پر جاران بێ کۆنترۆل و بێیی لێپرسینێن فەرمی ئان حەسابپرسینێ دمینن، ئەڤ ژی هەستێن بێئەولەهیێ یێن نشتەجهێن هەرێمی زێدە دکە.
