ھەڤسەرۆکا کۆنسەیا رێڤەبەرا کەجەکێ بەسێ ھۆزات راگھاند، وان د چارچۆڤەیا پرۆسەیا چارەسەریێ دە، ئەرکێ کو دکەت سەر ملێ وان پێک ئانیە و نھا دۆر ھاتیە سەر دەولەتا ترک کو گاڤێن پێویست باڤێژە.
ھۆزات د داخویانیەکا خوە یا ژ بۆ مەدیا ھابەر تیڤی دە، پێناسەیا دەستھلاتداریا ترکیەیێ یا ژ بۆ پرۆسەیێ وەکە “پێڤاژۆیا ترکیەیەکا بێتەرۆر” ب توندی رەد کر و گۆت، “ئەڤ پێناسەیەکا گەلەکی شاشە. ئەم ڤێ گۆتنێ ب ئاوایەکی ئەشکەرە رەد دکن و دڤێت ئەڤ ژ رۆژەڤێ بێ دەرخستن. ناڤێ ڤێ پێڤاژۆیێ زەلالە: پێڤاژۆیا ئاشتی و جڤاکا دەمۆکراتیکە.”
ھەڤسەرۆکا کەجەکێ دەستنیشان کر، وان ل سەر بانگا رێبەرێ پەکەکێ عەبدوللاھ ئۆجالان کۆنگرەیا خوە ل دار خستیە و بریارا راوەستاندنا شەر یا یەکالی دایە و وھا گۆت: “ئەڤە گاڤەکا گەلەکی مەزن و گرینگە ژ بۆ پێکھاتنا ئاشتیێ.”
ل سەر گاڤێن کو دڤێت ترکیا باڤێژە، ھۆزات وھا ئاخڤی: “دڤێت ترکیە، دەولەتا ترک ل ھەمبەری ڤێ یەکێ، گاڤان باڤێژە و مافێن سیاسی یێن دەمۆکراتیکێن ڤی گەلی ناس بکە.”
بەسێ ھۆزات ھەروھا بال کشاند سەر شەرێ د ناڤبەرا ئیران و ئیسرایلێ دە و ئانی زمان کو وی شەری جارەکا دن نیشان دایە کو پرۆسەیا ئاشتیێ ژ بۆ ھەرێمێ چقاسی گرینگ و پێویستە.
