شاندەیەکا پارتیا وەکھەڤی و دەمۆکراسیێ یا گەلان (دەم پارتی) ب سەرۆکاتیا پارلامەنتەر پەروین بولدان، ژ بۆ ھەڤدیتنێ بەرێ خوە ددە گرتیگەھا ئیمرالیێ دا کو سەردانا رێبەرێ پەکەکێ عەبدوللاھ ئۆجالان بکە.
ئەڤ سەردان د دەمەکێ دە پێک تێ کو بریارە د ھەمان ھەفتەیێ دە، د چارچۆڤەیا پرۆسەیا ئاشتیێ یا ل ترکیەیێ دە، ھەژمارەک گەریلایێن پارتیا کارکەرێن کوردستانێ (پەکەکێ) د مەراسیمەکێ دە ل بەر چاڤێ مەدیایێ و ئالیێن پێوەندیدار چەکێن خوە دەینن.
ھەر چەند بەرێ ھاتبوو پلانکرن کو شاندەیا دەم پارتیێ پشتی جڤینا لگەل سەرۆککۆمارێ ترکیەیێ رەجەب تەییب ئەردۆگان سەردانا ئۆجالان بکە، لێ سەردانا ئیمرالیێ بێیی کو سەدەما وێ وەرە ئەشکەرەکرن، کەتە بەریا ھەڤدیتنا لگەل ئەردۆگان.
شاندەیا کو دچە ئیمرالیێ ژ ڤان کەسان پێک تێ:
– پەروین بولدان – پارلامەنتەرا دەم پارتیێ
– میتحەد سانجار – پارلامەنتەرێ دەم پارتیێ
– ئۆزگور فاییک ئەرۆل – پارێزەر
ل گۆری ئاگاھیان، تێ چاڤەرێکرن کو دەم پارتی پشتی سەردانێ داخویانیەکا فەرمی بدە و ناڤەرۆکا ھەڤدیتنێ ژ بۆ رایا گشتی ئەشکەرە بکە.
