پارتیا وەلاتپارێزێن کوردستانێ پشتگرییێ ددە پێڤاژۆیا دانینا چەکان یا پەکەکێ

پارتیا وەلاتپارێزێن کوردستانێ (PWK) پشتگرییێ ددە پێڤاژۆیا دانینا چەکان یا پارتیا کارکەرێن کوردستانێ (پەکەکێ) و د ڤی واری دە پەیامەک پارڤە کریە.

ئەڤ ژی پەیاما پارتیا وەلاتپارێزێن کوردستانێ یە:

نڤێسینگەها راگەھاندنێ یا پارتیا وەلاتپارێزێن کوردستانێ (PWK):

ئەم پشتگرییێ ددن دانینا چەکان، موخاتابێ پرسا کورد و کوردستانێ، گەلێ کوردستانێ و نوونەرێن وێ یێن سیاسی نە

د 11ێ تیرمەھا 2025ێ دە، کۆمەکا گەریلایێن پەکەکێ ل نێزیکی باژارێ سلێمانیێ یێ باشوورێ کوردستانێ، راگھاندن کو ئەو ل سەر بانگەوازییا عەبدوللاھ ئۆجالان، چەکێن خوە دشەوتینن و داوی ل تێکۆشینا چەکدارییێ تینن. ئەم جارەکا دن دخوازن ژ گەلێ خوە رە راگھینن کو ئەم پشتگرییێ ددن چەکدانینا پەکەکێ، بداوی ئانینا شەر و پەڤچوونان، ئۆپەراسیۆنێن لەشکەری یێن دەولەتا ترکیەیێ و مرنان.

لێ بەلێ، بێگومان، دانینا چەکان یا پەکەکێ نایێ واتەیا چارەسەرییا پرسا کورد و کوردستانێ.

د چارەسەریا پرسا کورد و کوردستانێ دە، نێزیکاھییا ئۆجالان، پەکەکێ و دەم پارتیێ یا کو “دەولەتا سەربخوە، فەدەرالی، ئۆتۆنۆمی و داخوازێن کولتورالیست” رەد دکە و چارەسەرییا پرسێ ب نێرینا “نەتەوا دەمۆکراتیک، جمھوورییەتا دەمۆکراتیک، وەلاتێ ھەڤپار” و ل سەر بنگەھا “ھەموەلاتییا وەکھەڤ” پێشنیار دکن، د ئەسلێ خوە دە، ب شێوەیەک نوو یا دوبارەکرنا سیاسەتا دەولەتا ترکیەیێ یا “یەک دەولەت، یەک ملەت، یەک وەلات، یەک ئال، یەک زمانە”.

پرسا کوردستانێ، پرسا مافێ چارەنووسییا ملەتێ کوردە، پرسا ب ستاتویەکا سیاسی، ئەردنیگاری و نەتەوی، خوەبرێڤەبرنا گەلێ کوردستانێ یا ل سەر ئاخا خوەیە. پرسا کورد، پرسا پێکانینا مافێن زمان، چاندی و ماف و ئازادی یێن دەمۆکراتیک یێن کوردێن کو ل مەترۆپۆلێن ترکیەیێ دژین؛ ھەروەھا پرسا کوردێن ل مەترۆپۆلێن ترکیەیێ جیھێن وەک نفووس لێ زێدە نە، خوەبرێڤەبرنا ھەرێمی یا کوردانە.

دڤێت ب زمانەکی ڤەکری بهێت دیارکرن کو د پرسا کورد و کوردستانێ دە، د شەرت و مەرجێن ئیرۆ دە، وەکە موخاتەب قەبوولکرنا تەنێ رێخستنەک و شەخسەکی، د ئالیێ دیرۆکی، سیاسی و حقووقی دە شاشە و دێ رێیا چارەسەرییا پرسێ زەحمەتر بکە. موخاتەبێ پرسێ ملەتێ کورد، گەلێ کوردستانێ و تەڤاھییا نوونەرێن وێ یێن سیاسی نە.

ئیرۆ پێویستییا ملەتێ کورد، ل سەر بەرنامەیەک کو داخوازێن لەزگین و داخوازێن ستاتویا ملی، جۆگرافی، سیاسی و ئارمانجێن دەمکورت، دەمناڤین و دەمدرێژ د ناڤ خوە دە بپێچە، ب ئیتیفاقەک نەتەوەیی و دەمۆکراتیک یا ماییندە ھەیە.

ل گەل تفاقەکا وەھا ماییندە، ژ بۆ زەمینا چارەسەرییا پرسا کورد و کوردستانێ ب رێیا دیالۆگێ؛ ب رێ و رێبازێن سیاسی، دەمۆکراتیک، سڤیل و ئاموورێن ئاشتییانە بێ ئامادە کرن، ل سەر ئەساسێ داخوازێن لەزگینێن کوردان، دڤێت ئالییێ کوردی بێ ئاڤاکرن و ئەڤ ئالییێ کوردی موخاتابێ دەولەتا ترکیەیێ بە.

ژ بۆ ئاڤاکرنا ئالییێ کوردی، دڤێت پارتییێن سیاسی یێن کوردان، سازییێن جڤاکا سڤیل و کەسایەتییێن کورد یێن قەبوولبار کو د ناڤ جڤاکێ دە خوەدی باندۆرن، بێیی کو وەختێ وەندا بکن وەرن جەم ھەڤ و د ڤی واری دە گاڤان باڤێژن. د ڤێ پێڤاژۆیا حەساس و گرینگ یا کو ئەم تێ دە دەرباس دبن دە، ئاڤاکرنا نوونەرتیەکا وەھا نەتەوی و دەمۆکراتیک وەزیفە و بەرپرسیارییەکا نەتەوەیی و دیرۆکییە و ئەڤ وەزیفە ل سەر ملێ مە ھەموویانە.

دڤێت ئالییێ کوردی کو ئیرادەیا ملەتێ کورد و ھەموو پێکھاتەیێن کوردستانێ تەمسیل دکە و دەولەتا ترکییەیێ، پرەنسیپێن حقووقا ناڤنەتەوەیی و تەجرووبەیێن د ڤی واری دە ژی ل بەر چاڤان بگرە، ل سەر مێزێ روونێن و ب ئاواکی ئەشکەرە و ڤەکری بەرنامە و نەخشەرێیەک چارەسەرییێ ئامادە بکن. ژ دەرڤەی ڤێ یەکێ؛ ھەموو رێ، رێباز و تێگەھێن دن خزمەتا چارەسەرەرییا پرسێ نەکن و دێ پرسێ بێتر ئالۆز و تەڤلھەڤ بکە.

د ڤێ چارچۆڤەیێ دە، پشتی دانینا چەکان یا کۆمەکا گەریلایێن پەکەکێ د 11ێ تیرمەھا 2025ێ دە، ژ چاڤکانییێن فەرمی و نەفەرمی ھات راگھاندن کو سەرۆککۆمارێ ترکییەیێ رەجەپ تەییب ئەردۆگان دێ ل سەر ڤێ مژارێ “داخویانیەکا دیرۆکی” بدە. “داخویانییا دیرۆکی” یا کو دھات پایین، د 12ێ خزیرانا 2025ێ دە، رۆژا شەمبیێ ھات دایین. ژ بلی نرخاندنەکا پێڤاژۆیا کو وەکی “ترکیەیا بێتەرۆر” ھات پێناسەکرن و ھندەک داخویانییێن گشتی یێن رەوشا ھەیی، ژ بۆ کوردان تشتەکی نوو تونە بوو. تشتا نوو؛ پێشخستنا ئارمانجا ژ “ترکیەیا بێتەرۆر” بەرب “ھەرێما بێتەرۆر” و ژ بۆ ڤێ ژی ل سەر ئەساسێ “براتییا ترک، کورد و عەرەبان” دەستنیشانکرنا سینۆرێن ھەگەمۆنک یێن ھەرێمی بوو.

سیاسەتا کو ئەردۆگان ئانی زمان، نووژەنکرنا ستراتەژیەکا ھەگەمۆنی یا ھەرێمییە، کو ئەڤە دەمەکە درێژە ئەو وەکە “نیۆ-عۆسمانیزم” تێ بناڤکرن. کورد و تەڤگەرا نەتەوی یا کوردی ل پێشییا بجھانینا ڤێ ستراتەژیێ ئاستەنگن و ژ بۆ راکرنا ڤێ ئاستەنگیێ، دڤێت پێشی کورد ژ ھەر جورە داخواز و تایبەتمەندییێن خوەیێن نەتەوەیی بێنە دوورخستن و لگەل “دەولەت و جڤاکا ترک” بێنە یەککرن.

ئەم دکارین بێژین کو ھەولدان و سیاسەتا داوی یا ئەردۆگان، باخچەلی و دەولەتا ترکیەیێ، ھەولدانەکە کو دخوازن رێ ل بەر کێس و فرسەندێن کوردان کو ب گوھەراندن و پێشکەتنێن ل رۆژھلاتا ناڤین دەرکەڤن ھۆلێ بگرن و ستراتەژییەک ھەگەمۆنیایی یا نوو پێشخینن.

داتایێن بەردەست نیشان ددە کو ھەلوەست و نییەتا رەجەب تەییب ئەردۆگان، دەولەت باخچەلی و دەولەتا ترکیەیێ ب ئاواکی گشتی نە ئەوە کو ل باکورێ کوردستانێ رێ ل بەر چارەسەرییەکا ماف و ئازادییێن نەتەوەیی و دەمۆکراتیک یێن کوردان ڤەکن؛ رێزێ ل مافێن نەتەوەیی و دەمۆکراتیک، ئازادی و خوەبرێڤەرنەک سیاسی و خوەدی ستاتویا گەلێ مەیێ رۆژئاڤایێ کوردستانێ بگرن. بەرەڤاژییێ وێ، ژ بۆ پێشییێ ل بەر ڤێ بگرە، ئەو د ناڤ رێخستنەکا نوو دە نە.

دڤێت دەولەتا ترکییەیێ دەست ژ ڤێ سییاسەتا خوەیا کو 100 سالە ل سەر ئەساسێ ئینکار، ئاسیمیلاسیۆن و ئیمھایێ دمەشینە بەردە. دڤێت ناسنامەیا کوردی، پەروەردەیا ب زمانێ کوردی، فەرمیبوونا زمانێ کوردی، ئازادییا فکری و خەباتێن رێخستنی بێ قەبوول کرن و ئەڤ ماف د قانوونا بنگەھین یا ترکییەیێ دە بێنە گارانتی کرن. دڤێت، ژ بۆ ھەموو سزایێن کو ژ بەر خەباتێن سیاسی، دەمۆکراتیک و سڤیل ھاتنە برین ژ ھۆلێ رابن و کەسێن کو ژ بەر ڤان سەبەبان سزا خوارنە بێنە ئازاد کرن و ژ بۆ گەریلایێن کو چەکێن خوە دانینە ب ئاوایەکی ئازاد بکاربن ڤەگەرن وەلات گاڤێن پێویستیێن یاسایی بێنە ئاڤێتن.

14/7/2025

نڤێسینگەها راگەھاندنێ یا پارتیا وەلاتپارێزێن کوردستانێ (PWK)