کامپا مەخموور، کو پەنابەرێن ژ باکورێ کوردستانێ لێ نە، جارەکە دن د مەدیایا پەکەکێ دە کەتییە رۆژەڤێ. ل گۆری نووچەیێن د مەدیایا پەکەکێ دە، دەولەتا ئیراقێ جورەک دۆرپێچێ ل سەر کامپێ پێکانییە و دەما خەلکێ مەخموورێ دخوازە پێویستیێن بیناسازیێ یێن وەکە چیمەنتۆ، بلۆک… هتد دەرباسی ناڤا کامپێ بکە دڤێ لەشکەرەکی ئیراقێ ب وان رە بە.
وەکە کارێ خوە یێ هەرتم پەکەکە هەر دەما باسی دەلەتەکە داگرکەرا کوردستانێ دکە ناڤێ پەدەکێ ژی ددە پال وێ دەولەتێ و دخوازە ب ڤی ئاوا پەدەکێ رەش بکە، هەر دەما پەکەکێ ئەڤ یەک پێک ئانیبە ژی بێ گومان ل پشت پەردەیێ راستیەک هەیە کو پەکەکە دخوازە ب ڤی ئاوا و ب رەشکرنا ناڤێ پەدەکێ وێ راستیێ ڤەشێرە و دەرەو و ئیخانەتا خوە پێ بنوخمینە.
هەری داوی رۆژ نیوس دو نووچە دەربارێ کامپا مەخموورە د بن سەرناڤێن “ئامبارگۆیا سەر مەخموورێ کەتیە قۆناخەک مەترسیدار: ١ تۆربە چمەنتۆ، ١ لەشکەر!” و “ئراق جارەک دن دخوازە دەردۆرا وارگەھا مەخموورێ ب تێلان بگرە” وەشاندن و د هەر دو نووچەیان دە ژی ب قاسی کو ئێریشی سەر پەدەکێ کری ئەوقاس ناڤێ دەولەتا داگرکەرا ئیراقێ نەئانیە و ئێریشی سەر وێ نەکریە.
راستە ئەمبارگۆ ل سەر وارگەها مەخموورێ هەیە، لێ بەلێ چما ئەمبارگۆ ل سەرە و کی سەدەم بوو کو وارگەها مەخموورێ بکەڤە رەوشەکە وەها؟
کۆمیتەیا کارووبارێن دەرڤە یا پەکەکێ د سالا 2024 دە لگەل یەکینەیا دەولەتا ئیراقێ پەیمانەک چێکر و دیار کر کو ئەو دخوازن کامپێ ژ نوو ڤە ئاڤا بکن، نەخوەشخانەیەک و دبستانەک ئاڤاکن و 5 ملیۆن بلۆک، کو ھندەک ژ وان ب شکلێ ئالیکارییان بوون، ئاسن، چیمەنتۆ، ماکینەیێن چیمەنتۆیێ و ھتد ئانین وارگەھێ. پشتی سالەکێ، دەولەتا ئیراقێ خوەست سەردانا کامپێ بکە دا کو ببینە کا نەخوشخانە و مەدرەسە ئاڤاکرنە کا خەباتێن بیناسازی چ مەرحەلێ دایە. کۆمیتەیا کارووبارێن دەرڤە یا پەکەکێ ھەول دا کو ڤێ سەردانێ پاشدە بخە. لێبەلێ، سەردان د داویێ دە پێک ھات و ھاتە دەستنیشانکرن کو د کامپێ دە کەمپەکا جڤاکی یا نوو نەھاتیە چێکرن.
ئەو ئاموورێن تێرا چیکرنا نیڤ باژارەکێ دکرن ل ھۆلێ نەدییار بوون و چ بیناسازی چێنەکر بوون. د ئەنجامێ دە، ئیراقێ خوەست کو وی مەوادی پاشدە وەرگرە.
پەکەکێ ھەموو مەواد د تونەلێن کو چێکربوون دە ب کار ئانیبوو. دەولەتا ئیراقێ نھا پەیمانا کو وان د دەمێن بەرێ دە چێکربوو راوەستاندیە و دیار کریە کو ئەڤ رەوشە ل گۆری پەیمانێن ھاتینە ئیمزاکرن نینە. ئانگۆ، رەوشا مەخموورێ نە پرسگرێکەکا لگەل خەلکی یە، پرسگرێکەک د ناڤبەرا پەکەکێ و دەولەتا ئیراقێ دە یە.
تونێلێن کو ژ ھێلا پەکەکێ ڤە ھاتینە چێکرن ژ بۆ خەلکێ مەخموورێ بێمفانە. گەل ژخوە دکارە خوە بپارێزە. ئەو تونێل تەنێ ژ بۆ پێدڤیێن پەکەکێ ھاتنە چێکرن، هەر ژ بەر ڤێ یەکێ حکوومەتا ئیراقێ ئەمبارگۆ خستیە سەر وارگەها مەخموورێ و رێ نادە مەوادێن بیناسازیێ ب هێسانی دەرباسی ناڤا وارگەهێ ببن، یێن کو وارگەها مەخموورێ خستی ڤێ رەوشێ پەکەکە ب خوە یە، نە ت ئالیەک دن.
یا راست پەکەکە کەسێن د ناڤا وارگەهێ دە ژ خوە رە وەکە مەرتالێ زندی بکار تینە، پەکەکە ژ سالا 1994ێ ڤر ڤە خەلکێ مەخموورێ ل گۆری ئەجیندایا خوە ئیستسمار دکە و ژ بۆی بەرژەوەندییا خوە بکار تینە. د سالا 1995ێ دە، دەما کو ئەڤ کەسە ل کامپا ئەتروشێ یا نێزیکی دوھۆکێ بوون، پەکەکێ دخوەست ڤێ وارگەھێ ل دژی پێشمەرگە وەکە سەنگەرەکی شەری بکار بینە. و پەکەکێ کامپ ڤەگوھەراندن قادا شەری و نەچار مان کو بچن ل چۆلێن مەخموورێ ب جھ ببن. ل ور ژی، پەکەکێ وارگەھ وەک بارەگەھ بکار ئانی و خوەست ژ مەشرووعیەتا وارگەھێ یا ناڤنەتەوەیی سوود وەربگرە.
پرسگرێکا وارگەها مەخموورێ ب نووچەیێن دەرەو و سیاسەتا جەوتا پەکەکێ نایێ چارەسەرکرن، ئەڤ پسگرێک دکاریبوو ب دەستپێکرنا ڤەگەرا گوندان یا د سالا 2004ێ دە چارەسەر ببوویا و خەلک دکاریبوو ڤەگەرن گوند و وارێن خوە. لێ پەکەکێ ئەڤ یەک قەبوول نەکر. 21 سال ژ وێ دەمێ ڤە دەرباس بوون، خەلک ب دەستپێشخەرییا خوە چوون ترکیەیێ، پاسپۆرتێن خوە یێن قانوونی وەرگرتن، ژ بۆ گوندێن خوە تەزمینات وەرگرتن و دیسا ڤەگەریان کامپێ. واتە، پرسگرێکا کامپا مەخموور 20 سالن ژ ئالییێ پەکەکێ ڤە دهێت پاشڤە برن.
گەر پەکەکە ب راستی ژی دخوازە ئەڤ پرسگرێک وەرە چارەسەرکرن، ب تەنێ بلا خوە ژ کامپێ ڤەکشینە، ئەڤ پرسگرێک ب نووچەیێن دەرەو و تاوانبارکرنا پەدەکێ نایێ چارەسەرکرن، ئێدی ئالیگرێن پەکەکێ ب خوە ژی ئەڤ یەک فێم کریە.
