فەرماندارێ ھەپەگێ موراد کارایلان، ئاڤاکرنا کۆمیسیۆنا ئاشتیێ ل پارلامەنتۆیا ترکیەیێ وەک گاڤەکا ئەرێنی و گونجای بناڤ کر. دەربارێ رەوشا رۆژئاڤایێ کوردستانێ و سووریەیێ دە ژی گۆت: “ھەتا ل سووریەیێ دەستوورەکێ نوو چێنەبە، چەکبەردانا ھەسەدێ نە مەنتقییە.”
کارایلان ژ بۆی مەدیایا نێزیکی پەکەکێ راگھاند، ئەو ئاڤاکرنا کۆمیسیۆنێ گرنگ دبینن و گۆت، “بێ گومان جھێ چارەسەریێ پەرلەمانێ ترکیەیێ یە. ئاڤاکرنا کۆمیسیۆنەکێ گاڤەکا گونجایییە. لێ دڤێت ئەڤ پێنگاڤ نە ژ بۆ بەرژەوەندیێن سیاسی یێن دەمکی و حەسابێن دەنگان بە، دڤێت ب ئاوایەکی ستراتەژیک و ژ بۆ بەرژەوەندیێن ھەموو گەلێن ترکیەیێ بە.”
“ئازادیا ئۆجالان نە شەرتە، لێ ژ بۆ پێشکەتنا پێڤاژۆیێ فەرزە”
کارایلان بال کشاند سەر رۆلا عەبدوللاھ ئۆجالان د پێڤاژۆیێ دە و گۆت، ئەو ئالیەکی سەرەکی یێ پرسگرێکێ نە و نێرینێن وان دڤێت بهێن وەرگرتن. دیار کر: “ئاکتۆر و موخاتابێ مەیێ سەرەکی رێبەر ئاپۆیە. دڤێت ئەو نێرینێن تەڤگەرا مە یێن دەربارێ چارەسەریێ دە پارڤە بکە. ئەم ھێڤی دکن کو سەری ل رێبەر ئاپۆ بدن. ژ بەر کو ئەو موزاکەرەڤانە، دڤێت وەک موخاتاب بهێت دیتن.”
کارایلان ھەروھا ئانی زمان کو ھەتا ئەندازیارێ پێڤاژۆیێ د زندانێ دە بە، ئاشتیا جڤاکی پێک نایێ و گۆت، “ئازادیا رێبەر ئاپۆ نە شەرتە، لێ ژ بۆ پێشکەتنا پێڤاژۆیێ رەوشەکا خوەزایی و فەرزە.” بەحسا بریارا کۆنسەیا ئەورۆپایێ یا ل سەر “مافێ ھێڤیێ” ژی کر و دا زانین کو دڤێت ترکیە یاسایێن خوە ل گۆری ڤێ بریارێ سەرەراست بکە.
دەربارێ بانگا ئۆجالانا ژ بۆ بداویکرنا تێکۆشینا چەکداری، کارایلان ئەڤ یەک وەک گوھەرینەکا ستراتەژیک یا گرینگ پێناسە کر و گۆت: “ل گۆری خەتا رێبەر ئاپۆ، ئێدی ستراتەژی نە تێکۆشینا چەکداری، لێ سیاسەتا دەمۆکراتیکە. ئەڤ یەک ژ بۆ ھەموو ئالیێن کو ب ڤێ خەتێ ڤە گرێدایی نە دەرباسدارە.”
لێبەلێ، وی جووداھی خست ناڤبەرا ستراتەژیا تێکۆشینا چەکداری و مژارا “چەکبەردانێ”. کارایلان گۆت: “چەکبەردان مژارەکە تاکتیکییە و ب شەرت و مەرجێن ل وەلاتان ڤە گرێدایی یە. بێیی کو یاسا و دەستوورەک کو باوەریێ بدە ھەبە، مافێ خوەپاراستنێ رەوایە.”
مورات کارایلان، بانگێن رایەدارێن ترکێن ژ بۆ چەکبەردانا ھێزێن سووریا دەمۆکراتیک (ھەسەدێ) رەد کر و راگھاند، ھەتا ل سووریەیێ دەستوورەکێ بنگەھین یێ نوو کو مافێن ھەموو پێکھاتەیان مسۆگەر بکە نەیێ ئاڤاکرن، داخوازەکە ب ڤی رەنگی بێواتە و نە مەنتقییە.
کارایلان بال کشاند سەر نەبوونا سیستەمەکێ دادوەری و دەولەتەکا پێباوەر ل سووریەیێ و گۆت: “ل ور دەولەت ھینا نەبوویە دەولەت!” ھەروھا ئێریشێن ھێزێن سەر ب دەولەتێ یێن ل لازقیێ ل دژی عەلەویان و ل سوێدایێ ل دژی دورزیان وەک میناک نیشان دا و دیار کر کو ل شوونا دارزاندنێ، “سێدارەدانێن بێ دادگەهـکرن” تێن کرن. ژ بەر ڤێ یەکێ، ئیسرارکرنا ل سەر چەکبەردانێ د رەوشەکە وھا دە وەک “زڤراندنا بەرێ ئاڤێ بەر ب ژۆرێ یە”، ئانگۆ تشتەکە کو نامەشە.
کارایلان تەکەز کر، ھەسەدە دێ چەکێن خوە ل دژی ترکیەیێ یان ژی چ ھێزەکا دن ب ئاوایەکی ئێریشکار بکار نەینە و گۆت: “لێ ئەگەر ھندەک ب سەر وان دە بچن، ھەلبەت مافێ وان یێ خوەپاراستنێ ھەیە و ئەو دێ خوە بپارێزن.”
کارایلان جارەکە دن تەکەز کر، پێنگاڤا یەکەمین نە چەکبەردان، لێ ئاڤاکرنا سیستەمەکێ قانوونییە و گۆت: “بەریا ھەر تشتی دڤێت ل سووریەیێ قانوون ھەبن. دڤێت دەستوورەکێ بنگەھین کو ژ ئالیێ ھەر کەسی ڤە بهێت ئەرێکرن ھەبت. حقووق تونەیە، لێ دبێژن ‘چەکان بەردن.’ ئەڤ نە مەنتقییە.”
