مەکتەبا سیاسی یا پارتیا دەمۆکراتا کوردستانێ (پەدەکێ) دەربارێ بوویەرا 22یێ تەباخا 2025ێ ل باژارێ سلێمانیێ، کو د ئەنجامێ دە ھەژمارەک قوربانی چێبوون، داخویانیەک بەلاڤ کر و تێ دە نیگەرانیا خوە یا کوور ئانی زمان و بانگ ل ھەموو ئالیان کر کو خوە راگرن، رێزێ ل سەروەریا یاسا و سازیێن فەرمی بگرن و داوی ل ئێریشێن مەدیایی بینن.
مەکتەبا سیاسی یا پەدەکێ راگھاند ئیرۆ 25ی تەباخێ د داخویانیەکێ دە، ئەنجام و باندۆرێن بوویەرا سلێمانیێ بوونە سەدەما نیگەرانیا خەلکێ سلێمانیێ و تەڤاھیا ھەرێما کوردستانێ.
د داخویانیێ دە ھات تەکەزکرن، ھەرێما کوردستانێ قەوارەیەکا دەستوورییە و بەرھەما تێکۆشین و قوربانیدانا گەلێ کوردستانێیە، لەوما دڤێت سەروەریا یاسایێ و ئارامی و سەقامگیریا سلێمانیێ و تەڤاھیا ھەرێمێ وەرە پاراستن.
پەدەکێ دا زانین، دڤێت چارەسەرکرنا ناکۆکی و کێشەیان ب رێیا دیالۆگ و ھەڤتێگھشتنێ بە و ھەر کارەک کو باندۆرەکە نەیینی ل سەر ئارامی، پێکڤەژیان و ناڤوودەنگێ ھەرێما کوردستانێ بکە، نایێ قەبوولکرن.
مەکتەبا سیاسی یا پەدەکێ ئانی زمان، ئەو ژ نیگەرانی و دلگرانیا خەلکێ تێدگھیژن و ژ بۆ بەرژەوەندیا ھەرێمێ و ئارامیا دەروونی یا وەلاتیان، داخواز ژ ھەموو ئالیان کر کو “خوە راگرن” و سەروەریا یاسا و سازیان بپارێزن.
ھەروھا، د داخویانیێ دە ھات دەستنیشانکرن کو “ھەر جورە ئالۆزی و ئێریشەکا مەدیایی خزمەتا ھەرێما کوردستانێ ناکە و دڤێت وەرە راوەستاندن.”
سەرساخی ژ مالباتێن قوربانیان رە
د داویا داخویانیێ دە، مەکتەبا سیاسی یا پەدەکێ سەرساخی ل مالبات و کەسووکارێن ھەموو قوربانیان کر، ھەڤخەمیا خوە بۆ وان نیشان دا و ھێڤیا باشبوونا بلەز ژ بۆ برینداران خوەست.
