سەرۆکێ پارتیا وەلاتپارێزێن کوردستانێ مستەفا ئۆزچەلیک دەربارێ پێڤاژۆیا نوو نێزیکاتیێن ل مافێن کوردان دە تێن کرن دە داخویانیەکا نڤیسکی بەلاڤ کر و گۆت: گەلۆ د پێڤاژۆیا نوو دە ما قەی مە نەھشتیە ھوون مافێن لەزگین یێن کوردان بجیھ بینن.
داخویانیا نڤیسکی یا سەرۆکێ PWK مستەفا ئۆزچەلیک وەھایە:
بەلێ، بەحسا “پێڤاژۆیەکا نوو” تێ کرن. ھەر کەس ژ ئالیێ خوە ڤە ناڤەکی ل ڤێ پێڤاژۆیێ دکە. تێ گۆتن کو دێ گەلەک گوھەرتن بێنە کرن.
دەما ئەم نێرین و پێشنیارێن خوە پێشکێش دکن، ئەم جارنان راستی پرسێن وەکە “ما ھوون ئاشتیێ ناخوازن؟ ما ھوون ل دژی چارەسەرکرنا پرسگرێکانن؟” تێن.
لێ بەلێ، مە ب ئاوایەکی زەلال گۆت و دبێژین: مە د ھەر فەرسەندێ دە، ئەشکەرە کرییە و دکین کو ئەم ئالیگرێ ئازادی، عەدالەت، وەکھەڤی، دەمۆکراسی و ئاشتیێ نە؛ مە راگھاندییە و ددین زانین کو ئەم دێ بێیی “لێ” و “بەلێ”، پشتگرییێ بدن ھەر گاڤەکا کو ژ بۆ ناسکرنا ناسنامەیا کوردی و د ئەنجاما وێ دە راگھاندنا کوردی وەک زمانێ فەرمی، ناسکرنا مافێ پەروەردەیا ب زمانێ دایکێ یێ کوردی؛ ئازادیا رامان، ئیفادە، باوەری و رێخستنێ، چارەسەرییا ئاشتییانە یا پرسا کورد، راوەستاندنا چەکان و بداویکرنا ئۆپەراسیۆنێن لەشکەری، بێن ئاڤێتن.
مە گۆت و دبێژین، پرسا کورد و کوردستانێ، پەیداکرنا ماف و ئازادیێن نەتەوەیی، دەمۆکراتیک و کۆلەکتیف یێن کوردانە؛ پرسا برێڤەبەرییا نەتەوەیا کورد، گەلێ کوردستانێ یا ل وەلاتێ خوە ب ستاتویەکا سیاسی و جۆگرافیکە؛ لێ، ئاڤێتنا گاڤێن پێشین یێن کو مە ل ژۆرێ بەحس کرین، دێ ژ بۆ چارەسەرکرنا ڤێ پرسێ زەمینێ ئامادە بکە.
د ئەساسێ خوە دە، ئەم دخوازین ژ ھەموو رێڤەبەرێن دەولەتا ترکیەیێ، ژ “کۆمیسیۆنا پشتەڤانییا نەتەوەیی، براتی و دەمۆکراسیێ” رە، ژ ئۆجالان، پەکەکێ و دەم پارتیێ رە، ژ ھەموو ئاکتۆرێن نھا د ناڤ ڤێ پێڤاژۆیا کو بەحسا وێ تێ کرن دە نە، بپرسین.
گەلۆ، وە، ل سەر مژارێن کو مە ل ژۆرێ ب کورتی ئانین زمان، کیژان گاڤ ئاڤێتنە، یان ژی وە گۆتییە کو ھوون دێ فلان گاڤان باڤێژن و مە ژی ژ وە گۆتییە نا؟
ئانگۆ، ما قەی وەک پەکەکەیێ وە گۆتییە “ئەم چەکان داتینن”، وەک دەولەتا ترکیەیێ وە گۆتییە “ئەم ھەموو ئۆپەراسیۆنێن لەشکەری رادوەستینن” و مە ژی ژ وە رە گۆتییە نا؟
ئانگۆ، ما قەی وە گۆتییە “ئەم دێ وان کەسێن کو ژ بەر چالاکییێن خوەیێن سیاسی، دەمۆکراتیک و سڤیل و ژ بەر رامانێن خوە د گرتیگەھان دە نە، سەربەست بەردن؛ ژ بۆ کو ھەموو کەسێن کو ژ بەر ڤان دۆزان سزا وەرگرتینە ب ئاوایەکی ئازاد ڤەگەرن وەلاتێ خوە، ئەم دێ ھەموو ڤان دۆزان بەتال بکن؛ ئەم دێ بەشداربوونا گەریلایێن کو چەکێن خوە داتینن د ژیانا جڤاکی و سیاسی دە، بێیی کو راستی لێپرسین و سزادانا یاسایی بێن، مسۆگەر بکن” و مە ژی ژ وە رە گۆتییە نا؟
ئانگۆ، ما قەی وە گۆتییە “ژ بۆ راکرنا ھەموو ئەنجامێن نەرینی یێن شەری، ئەم دێ بەرنامەیەکا تایبەت ب جیھ بکن دا کو چاندەکا نوویا ژ شۆفینیزم، نیژادپەرەستی و دژمناتییێ ھاتییە پاقژ کرن د ھەموو سازییان دە و د ھەر قادا ژیانێ دە جھ بگرە” و مە ژی ژ وە رە گۆتییە نا؟
ئانگۆ، ما قەی وە گۆتییە “ئەم دێ داوی ل ھەموو یاسا و کریارێن کو ھەبوونا 30 ملیۆن کوردان ئینکار دکن بینن، ئەم دێ ناسنامەیا کوردی ناس بکن و دێ بخن بن گارانتییێن یاسایی و دەستووری” و مە ژی ژ وە رە گۆتییە نا؟
ئانگۆ، ما قەی وە گۆتییە “ئێدی، دەما ل مەجلیسا نەتەوەیی یا مەزن یا ترکیەیێ ب کوردی تێ ئاخافتن ئەم دێ میکرۆفۆنان نەگرن، ئەم دێ د قەیدان دە نەنڤیسن “ب زمانەکی نەناس ھات ئاخافتن”، ئەم دێ د سیستەما وەزارەتا تەندورستیێ دە کوردی ژی لێ زێدە بکن، ئەم دێ د سەرۆکاتیا کارێن دیانەتێ دە جیھ بدن خوتبەیا ب کوردی ژی” و مە ژی ژ وە رە گۆتییە نا؟
ئانگۆ، ما قەی وە گۆتییە “پێشی، ئەم دێ دەرسا کوردی یا بژارتە ژ باخچەیێ زارۆکان ھەتا زانینگەھێ بکن دەرسا مەجبووری، پشترە ژی ئەم دێ مافێ پەروەردەھییا ب زمانێ زکماکی یا کوردی مسۆگەر بکن؛ ئەم دێ کوردی لگەل ترکی وەک زمانێ فەرمی قەبوول بکن و ڤان مافان بخن بن گارانتییا یاسایی و دەستووری” و مە ژی ژ وە رە گۆتییە نا؟
ئانگۆ، ما قەی وە گۆتییە “ئەم دێ ھەموو ئاستەنگییێن ل پێشیا ئازادییا رامان، رێخستن، باوەری و ئیفادەیێ و ھەر وەھا قەدەغەیا ل سەر ناڤێ کوردستانێ و ئاستەنگییێن ل پێشییا دامەزراندنا پارتی، کۆمەلە و سازیێن ب ناڤێ کوردستانێ نە راکن و ھەموو ڤان مافان بخن بن گارانتییا یاسایی و دەستووری” و مە ژی ژ وە رە گۆتییە نا؟
ئانگۆ، ما قەی وە گۆتییە “ئەم دێ ھەموو زەخت، نەحەقی و نەوەکھەڤییێن ل سەر ژنان راکن، ئەم دێ ژ بۆ ڤێ یەکێ ھەموو گارانتییێن یاسایی، دەستووری و جڤاکی مسۆگەر بکن” و مە ژی ژ وە رە گۆتییە نا؟
ئانگۆ، ما قەی وە گۆتییە “ئەم دێ ھەموو قەدەغە، ئاستەنگ و زەختێن ل پێشییا ھەموو دین و مەزھەبان راکن، ئەم دێ ڤان ماف و ئازادییان بخن بن گارانتییا یاسایی و دەستووری” و مە ژی ژ وە رە گۆتییە نا؟
ئانگۆ، ما قەی وە گۆتییە “ئەم دێ ھەموو ئاستەنگێن ل پێشیا ناسکرنا ناڤێن کوردی یێن ھەموو ھەرێم، پارێزگەھ، ناڤچە، گوند و جھێن نشتەجھبوونێ یێن کو ناڤێن وان ھاتنە گوھەرتن راکن و ڤی مافی بخن بن گارانتییا یاسایی و دەستووری” و مە ژی ژ وە رە گۆتییە نا؟
ئانگۆ، ما قەی وە گۆتییە “ئەم دێ جیھێن گۆرێن شێخ سەعید، سەیید رزا، جبرانلی خالد بەگ، سەیدێ نورسی و ھەموو مەزنێن کوردان یێن کو جھێ گۆرێن وان نایێن زانین ئەشکەرە بکن” و مە ژی ژ وە رە گۆتییە نا؟
ئانگۆ، ما قەی وە گۆتییە “ئەم دێ شەرحێن کو مە ل سەر پەیمانا مافێن زارۆکان یا نەتەوەیێن یەکبوویی، پەیمانا خوەسەرییا رێڤەبەرییێن ھەرێمی یا ئەورۆپایێ و ھەموو پەیمانێن دن یێن ناڤنەتەوەیی دانینە، راکن و ھەموو پێویستییێن ڤان پەیمانان ب جیھ بینن” و مە ژی ژ وە رە گۆتییە نا؟
ئەم دخوازین بانگی ھەموو رێڤەبەرێن دەولەتا ترکیەیێ، “کۆمیسیۆنا پشتەڤانیا نەتەوەیی، براتی و دەمۆکراسیێ”، ئۆجالان، پەکەکێ و دەم پارتییێ بکن: فەرمۆ، ژ بۆ ئاڤێتنا گاڤێن پێباوەر یێن کو ژ بۆ چارەسەرکرنا ڤان پرسگرێکان رێ ڤەکن، ما ھوون ئامادە نە کو ب ئاوایەکی شەفاف و نە ل پشت دەرییێن گرتی، ھەموو نوونەر و پێکھاتەیێن سیاسی، سڤیل و دەمۆکراتیکێن نەتەوەیا کورد بکن مخاتاب و ب ئۆرگانێن رایەدارێن دەولەتا ترکیەیێ رە بجڤن و چارەسەریا ڤان پرسگرێکان گۆتووبێژ بکن؟
فەرمۆ، گەر ھوون ژ بۆ چارەسەرییەکا ماییندە یا ڤێ پرسێ خوەدی ھەلوەست بن و د ھەموو ڤان مژارێن کو ل ژۆرێ مە ئانینە زمان دە ھوون د ناڤا خوە دە ژی بە ل ھەڤ بکن و گاڤان باڤێژن، ئەم ژی دێ پشتگریێ بدن وە.
بەلێ، “ما شام دوورە، مشار ژی دوورە”.
26.8.2025
مستەفا ئۆزچەلیک
سەرۆکێ گشتی یێ پارتییا وەلاتپارێزێن کوردستانێ (PWK)
