پارتیا وەلاتپارێزێن کوردستانێ (PWK)ێ ب بۆنەیا 1ێ ئیلۆنێ رۆژا ئاشتیێ یا جیھانێ داخویانیەک نڤیسکی بەلاڤ کر.
داخویانیا پارتیا وەلاتپارێزێن کوردستانێ وەھایە:
ئیرۆ 1ێ ئیلۆنێ رۆژا ئاشتییێ یا جیھانێیە.
ئاشتی، د ناڤبەرا دەولەتان، جڤاتان و مرۆڤان دە تونەبوونا شەر، پەڤچوون، تووند و تووژی، وێرانکرن و دژمناتییێ ئیفادە دکە. لێ بەلێ، ئاشتی نە تەنێ نەبوونا شەرە، د ھەمان دەمێ دە رێزداری، ئاھەنگ و ئارامییە ژی. ئاشتی د ناڤبەرا گەلان، جڤاکان و مرۆڤان دە وەک پرەکێیە کو ژ بۆ پێشەرۆژەکە باشتر، بێ ترس و ژ خەتەرییان بدوورکەتی دییاردەیەک ئارامییا جڤاکییە.
ھەگەر ئەم ب ئاوایەکی ھەری سادە و کورت ل ڤێ رامانا ئاشتییێ بنەرن، ئەمێ ببینن کو مرۆڤاھی ل ھەر چار ئالییێن جیھانێ ژی ژ ئاشتییەکە راستەقین دوورە.
ئیرۆ ل رۆژھلاتا ناڤین و ل گەلەک دەڤەرێن جیھانێ، ھەروەھا ل وەلاتێ مە کوردستانێ، شەر، کۆمکوژی و جینۆساید بەردەوام دکن. پرانییا گەلێن جیھانێ ژ رێزگرتن، ئاھەنگ، ئارامییێ دوورن؛ د ناڤ مەترسی، ترس و نەخوەشییێن جوور بە جوور دە دژین.
د ناڤ گەلێن جیھانێ دە، یەک ژ گەلێن ھەری زێدە ژ تونەبوونا ئاشتییێ زەرەر دیتییە بێگوومان ملەتێ کوردە، گەلێ کوردستانێیە. ب تایبەتی ئەڤ 200 سالن کو شەر، کۆمکوژی، جینۆساید، ئاسیمیلاسیۆن، وێرانی، پەنابەری، بێ ئارامی، ترس، مەترسی، ھەر بوویە پەرچەیەکی ژییانا ملەتێ کورد و گەلێ کوردستانێ. نەحەقییا ھەری مەزن ژی ئەوە کو وەکە ملەت و وەلات، وەکە کورد و کوردستان ب چار پەرچەیان ھاتنە پەرچە کرن، ھاتنە داگیر کرن؛ وەکە ملەت، روو ب روویی ئینکار، ئاسیمیلاسیۆن، کۆمکوژی و جینۆسایدان بوویە.
ئەم وەک ملەت و پارتی ل گەل وێ یەکێ نە کو، ھەموو پرس و پرسگرێکێن ل جیھانێ، بێیی شەر و کۆمکوژی و وێرانکارییان؛ ب ئاوایەکی ئاشتییانە،ب گوفتووگۆیان بێنە چارەسەر کرن. ئەڤ، بێگوومان د بەرژەوەندییا ھەموو گەلێن جیھانێ دەیە.
ئەم ل گەل وێ یەکێ نە کو ل رۆژھلاتا ناڤین پرسا فلستین و ئیسرایلێ ل سەر ئەساسێ قەبوولکرنا ھەردو دەولەتان و ب ئاوایەکی ئاشتییانە و ب گۆفتگۆیان بێ چارەسەرکرن. لێ ئاشتییا رۆژھلاتا ناڤین تەنێ ب چارەسەرییا پرسا فلستین و ئیسرایلێ پێک نایێ.
ل رۆژھلاتا ناڤین پرسا ھەری مەزن یا رێ ل بەر ئاشتییێ دگرە ئەوە کو ملەتێ کورد و وەلاتێ وی ھاتییە داگیرکرن، پارچەکرن و دابەشکرن. تەجروبە و ژییانێ ئیسپات کرییە کو ھەتا ملەتێ کورد و کوردستان ل ھەر چار پەرچەیێن کوردستانێ ئازاد نەبن، ل رۆژھلاتا ناڤین ئاشتی و ئارامی پێک نەیێ.
ل باشوورێ کوردستانێ ھەر چقاس دەستکەفتنەکە فەدەرالییێ ھاتبە بدەستخستن ژی، ھینا ژ %45 ئاخا باشوورێ کوردستانێ د بن داگیرکەرییا بەغدایێ دەیە. ھەروەھا رێڤەبەرییا بەغدایێ، ژ بۆ مافێن فەدەرالییێن گەلێ مەیێ ھەرێما فەدەرە لاواز بکە، کێم بکە، ھەموو رێ و رێبازێن نەلرێ دجەربینە و پێک تینە. رەژیما بەغدایێ، ل ھمبەری ھەرێما کوردستانێ ژ ھشمەندی و سیاسەت و ھەلوەستەکا ئاشتییانە دوورە و ناخوازە مادەیا 140 ل گۆری قانوونا بنگەھین یا فەدەرال یا ئیراقێ جھ ب جھ بکە.
رووخاندنا رەژیما بەعس یا بەشار ئەسەدی، رووپەلەکا نوو ژ بۆ گەلێ رۆژئاڤایێ کوردستانێ و ھەموو گەلێن سوورییەیێ رە ڤەکرییە. لێ رەژیما نوویا شامێ، رەژیما ئەحمەد شارع ژی، ژ ھشمەندییەکە ئازادی، دەمۆکراس، عەدالەت و وەکھەڤییێ دوورە. خوە نادە بەر کو سیستەمەکە فەدەرالی، دەمۆکراتک، دادوەر و ئازاد کو گەلێ رۆژئاڤایێ کوردستانێ و دورزی، عەلەوی، کریستییان، تورکمەن، عەرەب و ھەموو گەلێن سوورییەیێ خوە شریکێ وێ سیستەم و دەستھلاتییێ ببینن.
دەولەتا ئیرانێ ژی ل سەر سییاسەتا خوەیا داگیرکەری و تونەحەسباندنا مافێن نەتەوەیی، دەمۆکراتیکیێن ملەتێ کوردیێ رۆژھلاتێ کوردستانێ، ل سەر پێکانینا سێدارەدانان ل سەر ھەموو گەلێن ئیرانێ، بنپێکرن و تونەحەسباندنا ئازادی، دەمۆکراس، عەدالەت و وەکھەڤییێ دە ھەر بەردەوامە.
ل ترکییێ و باکورێ کوردستانێ بەحسا “پێڤاژۆیەکە نوو” تێ کرن. رایەدارێن دەولەتا ترکییەیێ ڤێ “پرۆژەیێ” وەک “پێڤاژۆیا ترکییەیا بێتەرۆر” پێناسە دکن؛ ھندەک ئالی و کەس ژی وەکە “پێڤاژۆیا ئاشتی، چارەسەری و دەمۆکراسییێ” ب ناڤ دکن.
پەکەکێ د کۆنگرەیا خوەیا 12ەمین دە بریار دا کو چەکان دەینە. ئەم ڤێ بریارا چەکدانینا پەکەکێ د بەرژەوەندییێن گشتی و بەرژەوەندییێن ملەتێ کورد دە دبینین و ئەم ھێڤی دکن کو ئەڤ بریار د پراکتیکێ دە بهێت بجیھ ئانین. بێگوومان، دڤێت دەولەتا ترکییەیێ ژی ھەموو ئۆپراسیۆنێن خوەیێن لەشکەری بداوی بینە.
بێشک داویلێانینا چەکدارییێ و شەری گەلەکی گرینگە؛ لێ ئەڤ ب سەرێ خوە پرسا کورد و کوردستانێ چارەسەر ناکە. د ڤی واری دە، دڤێت ب ئاواکی ئۆبژەکتیف بەرنامەیەکە دەمکورت، ناڤین و دووڤوودرێژ بێ ئامادە کرن. مخەتابێ پرسا کورد و کوردستانێ، نە تەنێ کەسەک یان ژی پارتییەکە؛ مخەتابێ ڤێ پرسێ ھەموو ئالییێن سییاسی، سڤیل، دەمۆکاراتیک یێن ملەتێ کوردن. دڤێت ب بەشدارییا ڤان ھەموو پێکھاتەیان “تەمسیلییەتا کوردی” بهێت ئاڤا کرن و تەمسیلییەتا کوردی ببە مخاتابێ دەولەتا ترکییەیێ و چارەسەرییا پرسا کورد و کوردستانێ. ل گۆری مە، دەستپێکا ئاشتی و چارەسەرییێ ژ ڤر دەست پێ دکە.
د پارلامەنتۆیا ترکییەیێ دە ب بەشدارییا پارتییێن کو د پارلەمەنتۆیێ دە نوونەرێن وان ھەنە، “کۆمیسیۆنا پشتگرییا نەتەوەیی، براتی و دەمۆکراسیێ” ھاتییە دامەزراندن.
لێ مخابن، ئەڤ کۆمیسیۆن ب کریار و جڤینێن خوەیێن ھەتا ئیرۆ، نیشان دایە کو ژ ھشمەندی، بەرنامە، ئارمانج و ھەستیارەکە کو بخوازە رێیا ئاشتی، وەکھەڤی، دادوەری، دەمۆکراسی، ئازادی و چارەسەرییا پرسا کورد ڤەکە، گەلەکی دوورە. سەرۆکێ کۆمیسیۆنێ نوومان کوورتوولمووش رێ نەدا کو دایکەکە کورد د جڤینا کۆمیسیۆنێ دە ب کوردی باخڤە. باشە کۆمیسیۆنەکە ب ڤی رەنگی دێ چاوا بکاربە رێیا چارەسەرییا ڤەکە؟
ھەگەر ئەم بەرێ خوە بدن بانگ و داخویانی و گۆتارێن ئۆجالان، پەکەکە و دەم پارتییێ ژی ئەم دێ ببینن کو ژ بۆ ئاشتییەکە بروومەت و مایندە، ژ بۆ مافێن نەتەوەیی، دەمۆکراتکیێن ملەتێ کورد، ژ بۆ بدەستخستنا ستاتویەکە ملی، جۆگرافیک، سییاسی یا ل کوردستانێ نە خوەدی تو بەرنامە و سییاسەتێ نە.
ژ بەر ڤێ راستییێ ژی گۆتار و ھەلوەستێن دەولەتا ترکییەیێ ژی یێن ئۆجالان، پەکەکە و دەم پارتییێ ژی رێ ژ چارەسەرییا پرسا کورد و کوردستانێ رە، رێ ژ ئاشتییەکە راستەقین رە، رێ ژ ئازادی، دەمۆکراس، وەکھەڤی و عەدالەتێ رە ڤەناکە. مخابن رامانا ئاشتییێ ب ئاواکی چەوت شیرۆڤە دکن، ل گۆر بەرژەوەندییێن خوە، ل گۆر ئیدەۆلۆژییێن خوە شیرۆڤە دکن. ئەو ھەم ناڤەرۆکا ئاشتییێ پووچ دکن، ھم ژی مژارێ ب زانەبوون شۆلی و ئالۆز دکن.
ملەتێ کورد بەرییا ھەر تشتی، دکارە دەرییێ ئاشتییێ ب تێکۆشین و خەباتێن خوەیێن بەرفرەھ و پر ئالی، ب خەباتەکا خورت یا ل دیاسپۆرایێ و ب خەباتێن پرالییێن دیپلۆماسییێ ڤەکە. ژ بۆ ھووناندنا خەباتێن وەھا بەرفرەھ و بھێز ژی بەرییا ھەر تشتی دڤێت ب ھشمەندییەک نەتەوەیی و دەمۆکراتیک یەکرێزییا ناڤ مالا کورد بێ پێکانین. دڤێت ل ھەر پەرچەیەکی کوردستانێ و ل دیاسپۆرایێ ل سەر بەرژەوەندی و پرەنسیبێن نەتەوەیی، نیشتیمانی ھەڤکارییێن نەتەوەیی، دەمۆکراتک بێنە ئاڤاکرن؛ ھەروەھا دڤێت د ناڤبەرا تەڤگەرا نەتەوەیی یا ھەر چار پەرچەیێن کوردستانێ دە، کۆۆردیناسیۆنەکا نەتەوەیی، دەمۆکراتک، نیشتیمانی بێ ئاڤاکرن.
1.9.2025
نڤێسینگەها راگەھاندنێ یا پارتییا وەلاتپارێزێن کوردستانێ (PWK)
