پەکەکە: ئەم ھەموو ھێزێن خوەیێن ل ترکیەیێ ڤەدکشینن باشوورێ کوردستانێ
پەکەکێ راگھاند کو ژ بۆ کو “پێڤاژۆیا ئاشتی و جڤاکا دەمۆکراتیک” بگھینن قۆناغا دویەمین، “ھەموو ھێزێن خوەیێن ل ترکیەیێ ڤەدکشینن.”
ئیرۆ رۆژا یەکشەمبێ، 26/10/2025، ل قونتارا قەندیلێ پەکەکێ جڤینەکە چاپەمەنیێ لدارخست و تێ دە ئەشکەرە کر، ئەو هێزێن خوە یێن ل ترکیەیێ ڤەدکشینن و دڤێت نێزیکاتیێن سیاسی و حقووقی دەملدەست بێن نیشاندان و بانگی گەل کر کو “د ئاستا سەفەربەریێ دە تێبکۆشە.”
سەبری ئۆک ئەندامێ کۆنسەیا برێڤەبرا کەجەکێ ، ڤەژین دێرسم یا ئەنداما فەرمانداریا ئەیالەتا سەرحەدێ یا یەژا ستارێ، دەڤریم پالو ئەندامێ کۆنسەیا فەرمانداریا ھەپەگێ و 25 گەریلا تەڤلی داخویانیێ بوون.
داخویانیا ب ترکی ژ ئالیێ ئەندامێ کۆنسەیا برێڤەبرا کەجەکێ سەبری ئۆک و یا کوردی ژی ژ ئالیێ ئەنداما فەرمانداریا ئەیالەتا سەرحەدێ یا یەژا ستارێ ڤەژین دێرسمێ ڤە ھات خوەندن.
داخویانیا پەکەکێ وھایە:
ژ بەر کو شەر و پەڤچوونێن ل رۆژھلاتا ناڤین ژ بۆ پاشەرۆژا کوردان و ترکیەیێ مەترسیەکە مەزن بوون؛ پێڤاژۆیا کو پار ب داخویانیێن سەرۆککۆمار، سەرۆکێ گشتی یێ مەھەپێ دەولەت باخچەلی و رێبەر عەبدوللاھ ئۆجالان دەست پێ کربوو و 27ێ سباتا 2025ێ ب بانگا رێبەر عەبدوللاھ ئۆجالان یا “ئاشتی و جڤاکا دەمۆکراتیک” ناسنامەیەک وەرگرتبوو، د قۆناغەکە گەلەکی گرینگ و کریتیک دە دەرباس دبە.
د ناڤا 8 مەھێن بۆری دە، وەکی ئالیێ کوردان مە ل سەر بنگەھا بانگا ئاشتی و جڤاکا دەمۆکراتیک گاڤێن دیرۆکی و مەزن ئاڤێتن. ژ بۆ کو ژینگەھەکە ئارام و رەحەت یا نیقاشێ وەرە ئاڤاکرن، مە ھەما پشتی بانگێ د 1ێ ئادارێ دە ئاگربەست ئیلان کر. ل سەر بنگەھا رێبازێن گونجاو یێن رێبەر عەبدوللاھ ئۆجالان، د ناڤبەرا 5-7ێ گولانێ دە مە کۆنگرەیا 12ێ یا پەکەکێ ل دار خست، مە بریارێن ھەبوونا رێخستنی یا پەکەکێ و بداویانینا ستراتەژیا تێکۆشینا چەکداری وەرگرت و مە ئەڤ یەک ل ڤان بریاران زێدە کر؛ ئەڤ بریار ئانجاخ راستەراست ب ببرێڤەبریا رێبەر عەبدوللاھ ئۆجالان دکارن بکەڤن مەریەتێ. پشتی دو مەھان 11ێ تیرمەھێ ژی، ل سەر بنگەھا بانگا بدیمەنا رێبەر عەبدوللاھ ئۆجالان، ب برێڤەبریا ھەڤسەرۆکا کۆنسەیا برێڤەبرا کەجەکێ بەسێ ھۆزات، گرووپا ئاشتی و جڤاکا دەمۆکراتیک یا ژ 30 کەسان پێک دھات، ب مەراسیمەکێ چەکێن خوە شەوتاندن و ب ڤی ئاوایی ھەلوەستا مەیا بریاردار و زەلالا ژ بۆ بداویانینا تێکۆشینا چەکداری نیشان دا.
د بن پێشەنگتیا رێبەر عەبدوللاھ ئۆجالان و پەکەکێ دە ڤان گاڤێن دیرۆکی یێن کو ئالیێ کورد ئاڤێتنە، باندۆرەکە کوور ل سەر ژینگەھا سیاسی و جڤاکییا ترکیەیێ کر و ل سەر بنگەھا ئاشتی و دەمۆکراتیکبوونێ روحەک و ئیرادەیەکە نوو دەرخست ھۆلێ. ئەڤ ھەلوەستا بوێرەک و فەداکارا کوردان یا ژ بۆ ئاشتی، دەمۆکراسی و ئازادیێ، ل ناڤا ترکیەیێ و ل دەرڤە د قادا ناڤنەتەوەیی دە ھەر تم ب ئەرێنی ھات پێشوازیکرن.
تەڤی ھەموو نێزیکاتیێن نە بەس یێن کو ھەنە، رێبەر عەبدوللاھ ئۆجالان و تەڤگەرا ئازادیا کوردستانێ، ژ بۆ کو مەترسیێن کو ھەر کو دچە ل سەر ترکیە و کوردان گران دبن بەرتەرەف بکە و ژ بۆ کو بنگەھا پاشەرۆژەکە ب سەدان سالان یا ژیانا ئازاد، دەمۆکراتیک، خوشک و براتیێ دەینە، ب ئارمانجا کو پێڤاژۆیا ئاشتی و جڤاکا دەمۆکراتیک بگھینە قۆناغا دویەمین ھەول ددە گاڤێن نوویێن پراکتیکی و پێشیلێڤەکەر باڤێژە. ل سەر ڤی ئەساسی و ل گۆری بریارێن کۆنگرەیا 12ێ، ئەم ب ئەرێکرنا رێبەر عەبدوللاھ ئۆجالان، ھەموو ھێزێن خوەیێن ل ناڤ سینۆرێن ترکیەیێ ژ جھێن کو ریسکا پەڤچوونێ چێدکن و رێ ل بەر پرۆڤۆکاسیۆنێن موحتەمەل ڤەدکن، ڤەدکشینن قادێن پاراستنا مەدیایێ. بەشەک ژ کۆمێن کو گھشتنە قادێن پاراستنا مەدیایێ نھا ل ڤرن و ب خوە بەشداری ڤێ داخویانیێ دبن. ھەر وھا ل قادێن سینۆر ژی، ل جھێن کو ریسکا پەڤچوونێ لێ ھەیە و ل مەوزیێن کو رێ ل بەر پرۆڤۆکاسیۆنێن موحتەمەل ڤەدکن، تەدبیرێن ب ھەمان رەنگی تێن گرتن.
بێگومان، ئاستا باندۆرا ڤان گاڤێن کو ئەم داڤێژن دێ د پراتیکێ دە دیار ببە. ئەڤ گاڤێن پراکتیکی یێن کو ئەم داڤێژن، د پێکانینا بریارێن کۆنگرەیا 12ێ یا پەکەکێ دە جارەکە دن ھەلوەستا مەیا بریاردار و زەلال نیشان ددن.
گەلەک ئەشکەرەیە کو ئەم گرێدایی بریارێن کۆنگرەیا 12ێ و د پێکانینا وان دە ب بریارن. لێ ژ بۆ کو ئەڤ بریار بکەڤن پراکتیکێ، وەکی کو د بریارێن کۆنگرەیا 12ێ یا پەکەکێ دە ژی ھاتیە دیارکرن، دڤێت نێزیکاتیێن سیاسی و حقووقی یێن کو پێڤاژۆ فەرز دکە، بێیی دەرەنگی بێن ئاڤێتن. د ڤێ چارچۆڤەیێ دە، دڤێت حقووقا ڤەگوھێزا تایبەت ژ بۆ پەکەکێ وەکی ئەساس بێ گرتن و ژ بۆ بەشداربوونا سیاسەتا دەمۆکراتیک، دڤێت قانوونێن پێویستێن ئەنتەگراسیۆنا دەمۆکراتیک و ئازادیێ دەملدەست بێن دەرخستن.
وەکی داوی، بانگا مە د سەری دە ژ بۆ ژن و جوانان و ژ بۆ ھەموو گەلێ مەیە. ئەڤ نە پێڤاژۆیەکە وسایە کو مرۆڤ ژ ھنەکان ھێڤیا تشتان بکە؛ ئەڤ پێڤاژۆ، پێڤاژۆیا ئاڤاکرن و بدەستخستنا ژیانەکە ئازاد و دەمۆکراتیکە کو ب تێکۆشینەکە رێخستنکری پێک تێ. وێ دەمێ، دڤێت ھەر کەسێ کو دخوازە د ناڤا ڤێ ژیانێ دە جھ بگرە، ژ بۆ سەرکەتنا ‘پێڤاژۆیا ئاشتی و جڤاکا دەمۆکراتیک’ د ئاستا سەفەربەریێ دە تێبکۆشە.
مانیفەستۆیا ئاشتی و جڤاکا دەمۆکراتیک تەکەز دێ بگھیژە سەرکەفتنێ!”
