چما گەلێ کوردستانێ دەنگێ خوە ددە پەدەکێ؟
ھلبژارتنێن پارلەمەنتۆیا ئیراقێ دێ د 11ێ مژدارا 2025ێ دە وەرن لدارخستن. پێڤاژۆ زۆر ھەستییارە. ناکۆکی بەردەوامن، و خویایە کو شەر دێ ل گەلەک دەڤەران، ب تایبەتی ل ئیران و ئیراقێ، بەردەوام بکە. ژ بەر ڤێ یەکێ، دڤێت کورد ب فاھمەکی ستراتەژی تەڤبگەرن.
راپرسیێن گشتی و بانگەشەیا مەیدانی نیشان ددن کو پەدەکە دێ د ڤان ھلبژارتنان دە دەنگەک زێدە ب دەست بخە. ژ بەر ڤێ یەکێ چما کورد دەنگێ خوە بدن پەدەکێ؟ ژ بەر دو سەدەمان.
یا یەکەم، ئەو ژ ھەلوەستا پەدەکێ تێ. بێ گومان، مرۆڤ ل دیرۆکا پەدەکێ دنێرن. لێ ئەو نە تەنێ ژ بەر دلسۆزیێن دیرۆکی، لێ د ھەمان دەمێ دە ژ بەر سەدەمێن پراکتیکی یێن ھەیی ژی، پەدەکێ تەرجیح دکن. میناک، پەدەکێ د دەمەکێ دە کو ھەر کەسی ئێریشی کابینەیا نەھەمین دکر کو ژ ھێلا مەسروور بارزانی ڤە دھات رێڤەبرن، ھەمی ژی د ھەولدانەک ھەڤگرتی دە بوون ژ بۆ بداویکرنا کوردستانێ، بارێ حکوومەتێ گرت سەر ملێن خوە. د بن زەختا ل دەرڤەیی وەلاتی ژ ئیران، پەکەکێ، حەشدا شەعبی، و ھەتا ھندەک ھێزێن رۆژئاڤایی، و ل ھوندور ژ حکوومەتا ناڤەندی، دادگەھا بلندا دەستووری، و ھێزێن گەندەل و ھەڤکارێن وان یێن کورد، ھەر کەسی ھێڤی دکر کو ئەڤ حکوومەتە تەسلیم ببە. تەڤی ڤان ھەموو ئێریشان، حکوومەتا مەسروور بارزانی:
1. شۆرەشا چاندنێ کر
2. ریفۆرم د سیستەما بیرۆکراسیێ یا وەستییایی و نەزەلال دە کر
3. د پێشخستنا ھلبەرینا ناڤخوەیی و گەشتیاریێ، دەرڤەیی داھاتێن پەترۆلێ رێیێن داھتی بۆ گەلێ کورد سازکرن.
4. ل دژی ئێریشێن لەشکەری و سیاسی ب شێوازێ خوە بەرسڤ دا و رێگری ل ئێرشان کر.
5. ناسنامەیا کورد د ھەمی قادێن خەباتێ دە بەرز کر.
6. ب چارەسەرکرنا پێدڤیێن بەربچاڤێن ژیانا رۆژانە، وەک ئاڤ، ئەلەکتریک، رێ و بان و پێدڤیێن دن یێن ب ڤی رەنگی دابین کرن، ئاستێ ژیانا خەلکێ کورد باشتر کر.
وەلاتیێن ھەرێما کوردستانێ ژیر و زیرەکن، ب سالان شەر و دەربەدەری کشاندنە. ئەو ھەم دیرۆکا خوە باش دزانن و ھەم ژی بەرژەوەندیێن خوە دزانن.
گەلێ کوردستانێ ژیانەکا کوردەواری، رەحەت و سەرفراز دخوازە.
ئەو دزانن کو “کریارێن پەدەکێ گارانتیا پێشەرۆژا وانە.” ژ بەر ڤێ یەکێ ئەو دەنگێ خوە ددن پەدەکێ…
ھوون ژ کو دەرێ لێ بنێرن ھوونێ ببینن کو، تەنێ هەڤرکێ پەدەکێ ئەو ب خوەیە. ھەر چەند دبە کو یەنەکە ھەول بدە خوە وەکی ھەڤرک نیشان بدە ژی، لێ ئەڤ نە راستە. ئارمانجا یەنەکێ ئەوە کو ب پشتگریا ئیراق، حەشدا شەعبی و ئیرانێ د ھلبژارتنان دە ھەبوونا خوە بپارێزە.
سەرۆکێ یەنەکێ بافل تالابانی د ھلبژارتنێن داوی دە ب قیرین و شکاندنا میکرۆفۆنان ھەول دا کو ڤیزیۆنەکێ ژ بۆ خوە بافرینە. لێ ئەو سەرنەکەت. نھا ئەو دخوازە خوە وەکە مرۆڤەکی ماقیل و تێگھیشتی؛ دەمۆکرات و لیبرال؛ وەلاتپارێز و کوردستانی نیشان بدە. لێ ئەڤ تشتە ژ بافل نایێن. ژ بەر کو “چ د توربێ عەتاری دە هەبیت وی دفرۆشیت.”
قودیکا مرۆڤان کریارە کەس ل گۆتنان نانێرە.
ئەو بەحسا ئازادیێ دکن، ل ئۆتێلا لالەزار جوانێن کورد دشەوتینن و مرۆڤێن وەکە ھاوکار جاف دکوژن.
ئەو بەحسا خزمەتکرنا ژ بۆ چار پارچەیێن کوردستانێ دکن، لێ ئەو پێشمەرگەیێن رۆژھلاتێ کوردستانێ رادەستی دەولەتا ئیرانێ دکن و قوودسا کوردان-کەرکوکێ رادەستی حەشدا شەعبی دکن.
ئەو بەحسا دەمۆکراسیێ دکن، لێ سیاسەتمەدارێن ل سلێمانیێ یان تێنە دەستەسەرکرن یان ژی خوە د سپێرن ھەولێرێ.
ئەو بەحسا بداوی ئانینا گەندەلیێ دکن، لێ ئەو و قوبادێ برا ژ ھەلیکۆپتەرێن خوەیێن تایبەت داناکەڤن. لیستا مال و ملکێن وان یێن ل بریتانیا ژ سلێمانیێ ھەتا تەھرانێ درێژە. پەرەیێن کو ژ گومرکان وەردگرن، دخن بەریکا خوە.
ل سەر دکێ شرینۆک دئاخڤن، لێ ھووندری وی “فاشیستی” لێ دفرە. تو بێژی “گەندەل” ل وان تێ، تو بێ ژی”کۆمپلۆگەر” ل وان تێ، تو بێ ژی “بێ وەفا” ل وان تێ، تو بێژی “خەبەربێژ” ل وان تێ، تو بێژی “ئەحمەق” ل وان تێ. تو چ سفاتێ نە باش بژمێری ھەمی ل بافل تێن. ژ بەر کو ئەو کەسەکی بێ رامان، بێ پرەنسیب و بێ شەخسییەتە.
مە چ گۆت؛ خەلکێ ھەرێما کوردستانێ پر پۆلیتیکە. گاڤا بافل دئاخڤە ئەو پێ دلیزن. لێ خەلکێ باشوورێ کوردستانێ پێشەرۆژا وەلاتێ خوە، یا باژارێ خوە، یا مالباتا خوە و زارۆکێن خوە چ جاران رادەستی بافل تالەبانی ناکن. ژ بەر ڤێ یەکێ خەلکێ ھەرێما کوردستانێ پشتگریەکا ملیۆنی ددە پەدەکێ.
