نامەیەک ڤەکری ژ موراد قەرەیلان رە
· سمكۆ عه‌بدولعه‌زیز
گەر د ناڤا پارتیا تە دە کەسەک مابە و ب دروستی تاما شەهیدبوونێ بزانبە، ئەو کەس تویی، تو ژ هەر کەسەکی دن پێتر “گرانییا خوینێ” دزانی، تە ئاخا کو تێکەلی بێهنا بارووتێ بوویە، بێهن کرییە، تە گەرماهییا لاشێ هەڤالەکی خوە هەست پێ کرییە دەما د ناڤا دەستێن تە دە جانێ خوە ژ دەست ددە، تو باش فێم دکی کا چیایێن کوردستانێ چەوا بوون گۆرێن ب کۆم ژ جوانێن کورد رە.
تو بێهنا وان دزانی… تو واتەیا “دەولەتا کوردی یا مەزن” دزانی، نە ل سەر کاغەز و نەخشەیان، بەلکو ژ گۆشت و هەستیێ وان لەهەنگان یێن تە ب دەستێن خوە و د شەڤێن تاری دە سپارتینە ئاخێ.
گەلۆ چما ئیرۆ هوون شەرم دکن و ب دەنگەگ دلێر و زەلال نابێژن “کوردستان”؟
چما دەما بەحسا دەولەتا کوردی تێ کرن، لێڤێن وە دلەرزن و کەسەک نەشارەزا بە وێ وسا بفکرە هوون باسی تاوانەکێ دکن؟
چما وە خەونا سەدان سالان کر درووشمەک تەیسۆک و ڤالا کو یێن دبێژن ژی فێم ناکن؟
چما وە رێیەک گرت کو تێ دە “وەلات” د ناڤا هەڤووکەک بیانی دە ب ناڤێ سۆسیالیزما ریال، دەمۆکراسییا گەلان وەرە بەرزەکرن؟
ما ئارمانج ب داوی هاتییە؟
ما هوون وەستییانە؟
یان ژی وە ئەو وێرەکی نەمایە کو راستیێ وەک خوە ببێژن؟
تو باشتر ژ هەر کەسەک دن دزانی کو کەسێن شەهید بووین و جانێ خوە فەدا کرین نە ژ بۆی “تێکەلبوونا چاندی” و نە ژ بۆ فەلسەفەیەکە بێی ئاخ و بێی نەخشە بوویە.
ئەو د دۆل و نەهالێن بۆتانێ، دێرسمێ، زاخۆیێ و کۆبانیێ نەکەتنە داکو نەتەوەیا کورد ببە رستەیەک بێ رەنگ د گۆتارەکە تەئۆری دە.
وان د شەڤێن تاری و سار دە هێسر نەباراندنە هەیاکو رۆژەک وەرە و ئالایێ پیرۆزێ کوردستانێ ب ئاخافتنێن شوولی وەرە گوهەراندن، ئاخافتنێن کو ت رامان تونەنە ژ غەینی رەڤین ژ راستیێ.
تو پێش هەموو کەسەک دن دزانی، شۆرەشا بێی ئارمانجەکە نەتەوی یا زەلال، دبە مژ و دومان. مژ و دومان ژی ئیخانەتێ د ناڤا خوە دە ڤەدشێرە.
مەزنترین ئیخانەت نە ئەو فیشەکە یا ژ پشتێ ڤە ل مرۆڤان دکەڤە، نەخێر.. ئیخانەتا هەرە مەزن ئەڤە کو پشتی خوین زوها دبە، تو وەری و رامانا وێ خوینێ بگوهەری.
ڤێ دەمێ دە ژ خوە شەرم نەکە، ئەڤ نە دەما بازارکرنێ یە، ئەڤ نەدەما نەرماتیێ یە، ئەڤ نە دەما خوە ڤەشارتنا ل پشت فەلسەفەیەک بیانی دە یە، دەستبەردانا ژ دۆزا کوردی “پێشکەفتنا هزری” نینە، بەلکو “رەڤینا سیاسی و خیانەتە”.
گوهەرینا خەونا دەولەتا کوردی ب پرۆژەیەک نەدیار ب ناڤێ دەمۆکراسییا گەلان، ژێکرنا مەعنەوی یا سەرێ شەهیدانە.
راستیا د هوندرێ دلێ خوە دە ببێژە، بەرا کو زمانێ تە وێ راستیێ ببێژە.
ببێژە، مە پاشڤەچوون کر، مە دەست ژێ بەردا، مە پشتا خوە دا رێیا دەولەتا کوردی یا مەزن، مە رێ دا کو دۆز د هووندر دە وەرە دزین.
گەر تو نکاری یان حەز نەکی ڤەگەری سەر رێیا راست، هەر ت نەبە واتەیا وەلاتپارێزیێ سەختە نەکە. خوینا شەهیدان نەکە قوربانیا وان درووشمێن ت پەیوەندی ب وان ڤە تونەیە، رێ نەدە دیرۆک نەفرەتێ ل ناڤێن مە بکە.
گەلۆ گەر نها جانێ شەهید “سەبری تێندووریک” ل هەمەبەر تە بسەکنە، تو دکاری تەماشەی چاڤێن وی بکە و ژێ رە ببێژی: تە ژ بۆی دەمۆکراسییا گەلان شەر کر؟ گەلۆ تو دکاری ڤێ یەکێ ژێ رە ببێژی، یان ژی وێ دەنگێ تە د گەرییا تە دە هشک ببە؟
دۆز هێژان ساخە و نەمرییە، لێ ڤایە هەر رۆژ ب بێدەنگی هوون دمرینن.
هەگەر پێدڤی بە پەیڤا داویێ وەرە گۆتن، بلا ئەو پەیڤ ئەڤ بە: “یان ئەم ڤەگەرین سەر رێیا دەولەتا کوردی یا مەزن، یانژی بلا ئەم هەموو بێدەنگ بن، ژ بەر کو بێدەنگی پڕ ژ خاپاندنێ ب شەرەفترە.
