ئاگرێ نه‌فره‌تا ئۆجالان و نه‌ته‌وه‌یا ده‌مۆكراتیك دێ رۆژئاڤا ژی ب شه‌وتینه
بانگه‌وازی و هه‌ولێن رێبه‌رێ په‌كه‌كێ یێن ژ بۆی وه‌نداكرنا ده‌ستكه‌فتیێن كوردان ل رۆژئاڤا كوردستانێ ده‌وام دكن، هه‌ڤسه‌رۆكا ده‌م پارتیێ رادگهینه؛ ئۆجالان نێرینه‌كه نوو ژ بۆی رۆژئاڤا هه‌یه و دکارە ببە کلیلا سەرەکە یا چاره‌سه‌ریێ.
كۆمسیۆنا ئاشتیێ كو د دو رۆژێن رابووری ده سه‌ردانا ئیمرالیێ كرن، وان هه‌ڤدیتنا ب ئۆجالان ره ب هه‌ری ئه‌رێنی نرخاند، ژ به‌ر كو ئۆجالان وه‌كه كو ژێ تێ پێشبینی كرن، هه‌ر تشت د به‌رژه‌وه‌ندییا تركیه‌یێ ده ژ وان ره گۆت و زێده‌تر ژی په‌یامه‌كه دن ژ بۆی به‌رژه‌وه‌ندییا تركیه‌یێ ژی بۆ رۆژئاڤا پێشكێش كر.
پێڤاژۆیا كو كورد تێ ده هاتنه فه‌دا كرن، تركیه ب “پاقژكرنا ده‌وله‌تێ ژ ته‌رۆرێ” دبینه
هات راگهاندن، د هه‌ڤدیتنا كۆمسیۆنێ یا ئیمرالیێ ده، چه‌كدانینا په‌كه‌كێ و ڤه‌كشینا تام یا ژ تركیه‌یێ هاتنه نیقاش كرن، ئۆجالان دخوازه ئه‌ڤ هه‌ردو خال هه‌ری زوو پێك وه‌رن، تركیه ژی دبێژه: ئه‌م ب كریار ژ ئارمانجا مه‌زن “تركیه‌یا بێ ته‌رۆر” نێزیك بوونه. پێڤاژۆیه‌كه كو هه‌موو ده‌ستكه‌فتیێن كوردان ل ژێر ناڤێ براتییا ب تركان ره تێ ده وه‌رن وه‌ندا كرن، تركیه هێژان ب پێڤاژۆیا پاقژكرنا ده‌وله‌تێ ژ ته‌رۆرێ ناس دكه.
ژ 27 سباتا ئیسال 2025ێ، ئۆجالان چ خه‌مساری و ته‌قسیری د ده‌رخستنا بانگه‌وازیان ده نه‌كر، بانگه‌وازیێن بهێزكرنا تركان و لاوازكرنا كوردان.
هه‌ر بهێزبوونه‌كه كوردان هه‌گه‌ر نه د به‌رژه‌وندییا نه‌ته‌وه‌یا ترك ده به، ب ت ئاوایی نایێ قه‌بوول كرن
په‌كه‌كه هلوه‌شاند و چه‌ك پێ دان ئاڤێتن، گه‌ریلا ل باكور نه‌هشتن، كورد لاییقی خوه‌سه‌ری و خوه‌رێڤه‌برنێ نه‌دیتن، نه‌ته‌وه‌یا ده‌مۆكراتیك وه‌كه چاره‌سه‌ری پێشكێش كر، ترك ژی هه‌گه‌ر چ دبێژه براتییا ب كوردان ره لێ هه‌ر تشتێ كو دبه سه‌ده‌ما بهێزبوونا كوردان ل ده‌رڤه‌ی نه‌ته‌وه‌یا تركیه‌یێ ب خه‌یال دبینه، ل گۆری تركیه‌یێ هه‌ر بهێزبوونه‌كه كوردان هه‌گه‌ر نه د به‌رژه‌وندییا نه‌ته‌وه‌یا ترك و ده‌وله‌تا ترك ده به، ب ت ئاوایی نایێ قه‌بوول كرن.
ئۆجالان د سالا 2025ێ ده خزمه‌ته‌كه هه‌ری مه‌زن بۆ تركیه‌یێ كر، وی خه‌ونا كوردان ل باكورێ كوردستانێ وه‌ندا كر، ئیرۆ ژی هاتیه دخوازه وێ نه‌فه‌سا كو رۆژئاڤا كێشایه لێ چك بكه.
د دو مه‌هێن داوین ده ئه‌ڤ جارا دویه‌مینه ئۆجالان په‌یامێن تایبه‌ت بۆ رۆژئاڤا كوردستانێ دشینه، هه‌ری داوی دوهـ په‌یام دایه شاندا كۆمسیۆنا و پارلمه‌نتۆیێ یێن كو ب وی ره جڤیابوون.
بانگا نوو یا ئۆجالان بۆ رۆژئاڤا كوردستانێ
تولای هاتمۆگوڵار هەڤسەرۆکا دەم پارتیێ رادگهینە: ل ئیمرالیێ رەوشا سووریەیێ ب بەرفرەهی هاتیە نیقاشکرن و ئۆجالان نێرینەکا نوو پێشکێش کریە کو دکارە ببە کلیلا سەرەکە یا پێڤاژۆیا ئاشتیێ، ب تایبەتی ژی ل دەڤەرێن باکور- رۆژهلاتێ سووریەیێ.
ئۆجالان د بانگه‌وازییا كو به‌ری دو مه‌هان بۆ رۆژئاڤا كری، هند خالێن سه‌ره‌كه وه‌كه فه‌رمانه‌كێ شاندنه و ژ رایه‌دارێن رێڤه‌به‌رییا خوه‌سه‌ر ره گۆ: جی ب جی بكن.
ئۆجالان ڤه‌كری و ئه‌شكه‌ره ژ رێڤه‌به‌رییا رۆژئاڤا ره گۆ: داخوازیێن خوه‌سه‌ری، فه‌ده‌رالی و هه‌تا برێڤه‌برنا ده‌وله‌تا سووریێ یا ب هه‌ڤبه‌شی نابه وه‌رن كرن، هه‌رن شامێ و ڤه‌گه‌رن په‌یمانا 10 ئادارێ و هه‌ر تشتی ته‌سلیمی ئه‌حمه‌د شه‌رع بكن.
رۆژئاڤا كوردستانێ كوردستانێ كو نها د قۆناغه‌كه هەساس و بریاردار رە دەرباز دبە و دانپێدانه‌كه ناڤنه‌ته‌وه‌یی ژێ ره چێبوویه، ئۆجالان دخوازه ڤی ده‌ری لێ قه‌پات بكه و وه‌كه چاوا باكور قوربانی به‌رژه‌وه‌ندییا خوه و تركیه‌یێ كر، دخوازه رۆژئاڤا ژی ب هه‌مان ده‌ردی ببه.
نه‌رحه‌تییا ئۆجالان ژ رۆژئاڤا ژ یا تركیه‌یێ كێمتر نینه
حه‌ساسیه‌تا ئۆجالان ژ رۆژئاڤا ژ یا تركیه‌یێ كێمتر نینه، تركیه ڤه‌كری و ئه‌شكه‌ره دبێژه: هه‌سه‌ده خه‌ته‌رییا هه‌ری مه‌زنه ل سه‌ر تركیه‌یێ، ئۆجالان ژی عه‌ینی تشت دبێژه، تركیه دبێژه دڤێ هه‌سه‌ده چه‌كان راده‌ستی شامێ بكه، ئۆجالان ژی دبێژه هه‌رن شامێ و ده‌ستێ ئه‌حمه‌د شه‌رع ماچ بكن، ب كورتاسی داخوازیێن تركیه‌یێ و ئۆجالان یێن ژ رۆژئاڤا یه‌كن و ئارمانج ژی نه‌هشتنا هه‌ر تشتێ كو دبه سه‌ده‌ما نه‌رحه‌تییا تركیه‌یێ.
ئۆجالان ئه‌وقاس د ئیسالێ ده ژ بۆی بهێزكرنا تركیه‌یێ و لاوازكرنا كوردان خه‌بتی كو رێبه‌رێ نه‌ته‌وه‌په‌رستێن ترك ده‌وله‌ت باخچه‌لی ئه‌وقاس نه‌خه‌بتی یه، یا راست هه‌ر ئه‌ڤ یێك ژێ دهات پێشبینی كرن ژ به‌ر كو د به‌رێ ده ئۆجالان گۆتبوو: بلا چ ترك خوه ژ من تركتر نه‌بینه.
ئاگرێ نه‌فره‌تا ئۆجالان و پێڤاژۆیا گوهه‌راندنا نه‌ته‌وه‌یا كورد ب نه‌ته‌وه‌یا ده‌مۆكراتیك به‌ربوویه ده‌همه‌نا رۆژئاڤا كوردستانێ ژی و هنه‌كی مایه ب ته‌ڤاهی ب شه‌وتینه.
