دۆزا کوردان ل سووریێ ل همبهری دەرفەتەکه دیرۆکی یە
دۆزا کوردی ل سووریێ قۆناغا پاراستنا دەمکی و بڕێڤەبرنا قەیرانان دەرباز کرییە. ئەڤ دۆزە نوکە پرسیارەکە ل سەر جەوهەرێ هەبوونا نەتەوەیی دهێته كرن، د دەمەکی دا کو نەخشەیێ دەولەتان ل بەر هەلوەشاندنێ یە.
کوردێن ئیرۆ، نەکۆمەکا کۆچبەرانه ل پەناگەهەکێ بگەڕن، بەلکو ئەو ب خۆ خودانێن ئەردی نە. خوەدان ئەزموون، سازی، هێز و جڤاکەکێ ڕێکخستینە. لێ مخابن، ئەڤ هەبوونە هێشتا ل بەندا دانپێدانێ یە، د ناڤبەرا هێزا هەیی و مافێ قانوونی دا، هەلاویستی مایە.
ناکۆکییا مەزن ئەوە، کوردان ڕێ ل بەلاڤبوونا ئاگرێ تیرۆرێ و هلوەشاندنا جڤاکی گرت، لێ ئەڤ رۆلە نەبوو ئهگهرێ وەرگرتنا ناسنامەیا سیاسی. دنیایا دەرڤە، دەرگەهێ ئەولەهیێ ل مە ڤەکر، لێ دەرگەهێ سیاسەتێ هێشتا یێ گرتيیە.
وان ئەم وەک پێدڤیاتی دیتینە، نە وەک هەڤپشک. ئەڤ تێگەهە بۆ مە مەترسییەکا ستراتیژی یە، چونکی هەر تشتێ پێدڤیاتی بیت، ب گوهۆڕینا بەرژەوەندییان دێ بیتە قوربانی.
د فەرهەنگا دەولەتداریێ دا یا ئاشکرایە، هەر هێزەکا نەبیتە یاسا، دێ بیتە بار، و هەر هەبوونەکا دانپێدان پێ نەهێتە کرن، دێ هەر یا لاواز بیت، بلا ب چەک و هێز ژی بیت.
کورد ل سووریێ د ناڤ جەرگێ ڤێ ئاڵۆزیێ دا نە. ئەرد هەیە، لێ ئەرد بێ تاپۆ ناهێته پاراستن. سازی هەنە، لێ بێ دەستوور هەر د بهروهختن.
مەترسییا کوژەک ئەوە پرۆژەیێ مە هێدی هێدی ژ ناڤەرۆکێ بهێتە ڤالاکرن، نە کو ب هێرشەکا سەربازی بهێتە ژ ناڤ برن.
پشتەڤانییا ئەمریکا باشترین نموونەیە بۆ ڤی دهمێ ههبوونێ، ژ ئالیێ سەربازی ڤە بهێزە، لێ د سیاسەتێ دا مژە.
ئەڤ یەک مە د دەمەکێ ڕاوەستیای دا د هێلیت، ئەم د ئهڤرۆیهكا بهێز دا دژین، لێ سوبەهیا مە نەدیارە. دیرۆکا مە تێرا خۆ یا تژی یە ژ باجا ڤێ چاڤەڕێکرنێ.
ژ لایهكێ دی ڤە، هەتا نوکە دۆزا کوردی نەبوویە پرۆژەیەکێ سیاسی یێ دانپێدان پێکری، لەوما دەولەتێن هەرێمی و ب تایبەت ترکیا ب چاڤێ گەفێ بهرێ خوه ددهته مه، نە وەک جیران یان هەڤپشک.
هەتا ئەم نەبینە خوەدان ستاتۆ، دێ هەر ل قۆناغا بەرەڤانیێ مینین و نکارین ببینە خوەدان دەستپێشخەری.
گرێیا کوێر یا دۆزێ نە ئەوە كو کورد دێ چاوا مانا خۆ پارێزن، بەلکو ئەوە دێ چەوا ڤێ مانێ کەنە دەستکەفتەکێ نەتەوەیی یێ هەتا هەتایی.
بەرسڤ د گۆتارێ دا یە: بلا ئەم نەبێژین ئەم فاکتەرێ ئارامیێ نە، بلا بێژین ئەم خوەدان مافین.
ئارامی وەزیفەیەکە دسپێرنە پاسەوانان، لێ ماف ناسنامەیا خوەدان مالانە.
پرۆژەیێ نەتەوەیی دڤێت هێزا سەربازی بکەتە خزمەتکارێ ئارمانجا سیاسی، نە بەرهڤاژی.
سیاسەتا کوردی یا ئەقلانی، نە شەڕێ بێ مەرەمە، نە ژی سەرشۆڕی یە.
شەڕێ بێ پلان، قومارە ب چارەنڤیسێ گەلەکی و سازشکرن ژی تەسلیمبوونا بێ دەنگە.
ڕێکا سێیێ ئەوە: ب ئەقلەکێ سار، بەرژەوەندیێن خۆ دەستنیشان بکەین و هەڤپەیمانیێن خۆ ب گرێبەستێن سیاسی و نڤیسی ببەستین، نە ب سۆزێن زارهكی.
مەترسییا هەرە مەزن ل سەر کوردێن سووریێ، مانا د ڤێ کاودانی دهمكی دا.
دەمێ باوەری ب پاشەڕۆژێ نامینیت، دەستکەفت دبنە بیرەوەری، و شکهستن ژ ناڤ دلێ مرۆڤی دەست پێ دکەت، ل وی دەمی، نەبوونا بڕیارێ ژ هەر چەکەکێ خرابتر هەبوونا مە د هەژینیت.
کورت و کرمانجی: کورد ل سووریێ ل بەردەم دەرفەتەکا دیرۆکی نە، کەرەستەیێن هێزێ ل بەردەستن، لێ هێز ب تەنێ مافی دروست ناکەت.
یا ئەم پێدڤی، بڕیارەکا نەتەوەیی یا ڕوونە کو دورهێلى بکەتە یاسا، و ئەزموونێ بکەتە پاشەڕۆژ.
دیرۆک ل سەر لاوازیێ سزایێ گەلان نادەت، بەلکو ل سەر دەرفەتێن ژدەستچوویی سزایێ وان ددەت.
ئەم یێ د ناڤ دەرفەتێ دا، و تهپك هێشتا د گۆڕەپانا مە دا یە.
