ئەنجاما کو ژ ھلوەشاندنا پەکەکێ وەرە دەرخستن: 30 ئالایێن پارتییێ ناکە یەک ئالایێ کوردستانێ
17ێ کانوونێ، رۆژا ئالایێ کوردستانێیە. ئالایێ کوردستانێ رێویتیەک دژوار-زەخت دەرباس دکە پشتی کو ل باکورێ کوردستانێ ھاتە سەوراندن و پەژراندن دەست پێ کر. ھەر چەند د رەشنڤیسێن مەد دە سەمبۆلەک دشبھە ئالایێ رەنگن ھەبە ژی، ئالایێ کو ئەم ب واتەیا خوەیا نووژەن بکار تینن ڤەدگەرە سالا 1919ێ. ئانگۆ، ئالایێ رەنگین ئەڤ 106 سالن ھەبوونا دیرۆکی، ناسنامەیا ھەڤپار و ئیرادەیا کۆلەکتیف یا گەلێ کورد تەمسیل دکە. ئالایێ رەنگن ل سەرھلدانا ئاگریێ، د سەرھلدانا شێخ سەعید دە و ل مەھابادێ ھاتە بلندکرن. ژ بەر ڤێ یەکێ، ھەکە ھوون ئالایێ رەنگن رەد بکن، ھوون سەد سالێن دیرۆکا کوردان ژی رەد دکن. مینا پەکەکێ… بەلێ، ب رەدکرنا ئالایێ رەنگن، ھەتتا ب نیشاندانا دژمناتیێ ل ھەمبەر وێ، پەکەکە بەشەکا گرینگ ژ دیرۆکا کورد، دەستکەفتی و قوربانیێن بەرخوەدانا کوردان د سەدسالا 20ێ دە رەد دکە.
کو پەکەکێ خوە ھلوەشاندیە ئەم ڤان دژبەرییێن ئەنجامداین ژ بیر ناکین و دێ بەردەوام ل سەر ڤان کریاران ئاخڤین. بەرەڤاژی ڤێ، پەکەکە ھاتە ھلوەشاندن، لێ فکر و رامانێن وێ نەھاتن ھلوەشاندن. ژ بەر ڤێ سەدەمێ، دڤێت برین و زرارا کو پەکەکێ ب رێیا تێگەھێن وەکی تێکۆشینا ئیدەۆلۆژیک، پارادیگمایا نوو، تەڤگەرا ئازادیێ و شۆرەشا زیھنی ل سەر ھشێ کورد و سۆسیۆلۆژیا کورد چێکریە یەک ب یەک وەرن ئەشکەرەکرن و رەخنەکرن. و ب کورتاسی، “پەکەکێ خوە ھلوەشاند، لێ ھەلوەستا خوە یا دژمناھییا ل ھەمبەر ناسنامەیا کورد و سەمبۆلێن کوردستانێ نەھلوەشاند.”
ژ دەستپێکا دامەزراندنا خوە ڤە، چار جاران راستەراست سەمبۆلا پەکەکێ گوھەرتیە. ناڤێ خوە گوھەرتیە. ب دەھان ئالا، پانکارت، سەمبۆل، سازی و رێخستن چێکرنە و ھەر تشت قەبوول کریە. ھەر رەنگ قەبوول کریە، لێ ئالا کوردستانێ قەبوول نەکریە. دەم دەم نەچار مایە کو وێ بکار بینە ژی، ئالا کوردستانێ ھەم وەکی ھەڤرک و ھەم ژی وەکی دژمن دیتیە.
پێشی، ھەول دا کو وێ بێقیمەت و بێ واتە بکە. ئالا رەنگین وەکە ئالا پەدەکێ ئالا بارزانی و ئالا باشوور پێناسە درکر. پشترە، ب ئاوایەکی ئیدەۆلۆژیک و چەپگر دژمناتیا خوە یا ل ھەمبەر ئالا کوردستانێ ب گۆتنێن وەکی سەمبۆلا نەتەوەپەرەستی، پاشڤەروو و ھتد بناڤکر. ئەڤ یەک نە تەنێ د بن ناڤێ پەکەکێ دە کریە. ل رۆژھلات ژی د بن ناڤێ پژاکێ دە کریە. د دەما سەرھلدانا ژینا ئەمینی دە، دەما کو ھەموو کورد یەکگرتی بوون، پەکەکێ ئالا رەد کر و گۆت، “ئەڤ نە ئالا کۆمارا کوردستانا مەھابادێیە.” ل رۆژئاڤا ب ناڤێن یەپەگێ و تەڤ دەمێ ئێریش کرن سەر ئالا کوردستان. د پیرۆزباھیێن جەژنا نەورۆزێ یا 2014ێ دە ل رمێلانێ، ھێزێن یەپەگێ گولە ل کەسێن کو ئالا کوردستانێ ھلدگرتن رەشاندنە. ل باکور و ل ئەورۆپایێ، کەسێن کو ئالا رەنگین د چالاکیان دە ھلدگرتن راستی ئێریشێ ھاتن، وەکی ئالیگرێن پەدەکێ ھاتن بناڤکرن.
پەکەکە و ئەندامێن وێ، کو ئالا رەنگین وەکی سەمبۆلا پاشڤەروویی ب ناڤ دکن، د مەشان دە وێنەیێن ئۆجالان ھلگرتن، وێنەیێ وی ل سەر چیا و زناران نەخشاندن، و لایەنگران وێنەیێ وی ماچ کرن. ھەتا ب مۆدەلەک پێلاڤا مەکاپێ ژی وەکە پیرۆزی ل سەر ملان گێراندن. یانی ل گۆری پەکەکێ، “حەزکرنا ئالا رەنگین کەڤنەشووپیە، لێ حەزکرنا وێنەیێ ئۆجالان پێشڤەروو؛ مەش ب ئالا رەنگین وەکە نەتەوەپەرەستی، لێ مەش ب وێنەیێ ئۆجالان رە ئازادیخوازی بناڤ دکە” ئەڤ رەوشا تراژیکۆمیدیا پەکەکێ یە…
د دیرۆکا خوەیا 50 سالی دە، پەکەکێ چار جاران ستراتەژی و فکرا خوە گوھەرتیە، لێ قەت دەست ژ دژمناھییا دۆمدارا ب راستیا نەتەوەیی یا گەلێ کورد بەرنەدایە. پەکەکێ نھا خوە ھلوەشاندیە و ناڤەکی نەدیتی و نەناس ھەیە، لێ ب تێگەھێن وەکی “کۆموون، کۆموونار، ئەنتەگراسیۆن، ژودەنرات” و ب پەیڤێن دن ھەلوەستا خوە یا دژی-کورد ددۆمینە. ئەڤ نە مومکنە.
ژ پەکەکەیا نە کورد و کوردستانی تێ ھێڤیکرن کو چارەسەریەکێ ژ بۆ پرسگرێکا کورد ل باکورێ کوردستانێ پەیدا بکە.
چاوا دکارە پارتییەک کو لگەل نرخێن نەتەوەیی یێن ھەڤپارێن گەلێ کورد ب ناکۆکە، ل سەر ناڤێ کوردان باخڤە و تشتەکی چارەسەر بکە؟ پەکەکەیەک کو کورد و کوردستانێ ئینکار دکە، ئەو ب سەرێ خوە بەشەک ژ پرسگرێکێ یە، نە ھێزا چارەسەرییێ یە. پەکەکە د پرسگرێکا کورد دە ژ سوودێ بێتر زرار دایە.
مەسەلا، زرارێ دایە یەکیتیا نەتەوەیی یا کورد. گەلێ کو دڤێت ل دۆرا ئالا کوردستانێ ھەڤپار بجڤە ل سەر بنگەھا دلسۆزیا رێخستنی ھاتیە پارچەکرن؛ یێن کو ئالا کوردستانێ دپارێزن ھاتنە ئارمانجکرن. ڤێ نێزیکاتیێ دەستکەفتیێن گەلێ کورد زێدە نەکریە، بەرووڤاژی دەستکەفت قەلس کریە.
و نھا، ب سالان د سەر ڤێ دژمناتیێ رە دەرباس بوونە… چ چێبوو؟ پەکەکێ خوە ھلوەشاند. لێ ئالا رەنگین ھین ژی ب سەربلندی دھەژە… و نھا کورد ئالا رەنگین ژ ھەر دەمێ بێتر دپارێزن و ژێ حەز دکن. و وێ ھەمبێز دکن… دەما وەرزشڤان ب سەر دکەڤن، ئالا کوردستانێ بلند دکن. جوان ب ئالایێ کوردستانێ چالاکییێن جووربەر جوور دمەشینن… تەڤی ھەولدانێن چار دەولەتێن کۆلۆنیالیست و پەکەکێ د ناڤ دە، ئالا کوردی دێ زندی و رۆژ ب رۆژ گەش بمینە…
بەلێ، پەکەکە د دژمناتیا خوە یا ل ھەمبەر ئالا کوردستانێ دە تێک چوو… لێ مەسەلە نە ئالایە. مەسەلە کوردبوونە. ھەر چەند پەکەکێ خوە ھلوەشاند ژی، لێ زھنیەتا خوە نەھلوەشاندییە. ھەلوەست و سەکنا وێ هێژ ژی دژە کوردە.
