سمکۆ عەبدولعەزیز

ناسنامەیا نەتەوەیی نە تەنێ ئەو تشتە کو مرۆڤ ب سروشتی دگەل دا ژ دایک دبیت، بەلکۆ ئەو پرۆسەیە دەمێ ئەم وەکی مللەت دەست ب نڤێسینا چیرۆکا خوە دکین، داکو ئەم خوە بدین ناساندن، نە وەک خەلک ل گۆر حەزا خوە بەحسا مە بکەت.

نەتەوە تەنێ ب کۆمبوونا روویدانان دروست نابت، بەلکۆ ب تێگەهشتنێ دروست دبت.

ئەو پەیاما جەنابێ سەرۆک بارزانی دەرخستی، نە تەنێ گۆتارەک سیاسی بوو ژ بۆ بدەستڤەئینانا پۆستەکێ، بەلکۆ دەستپێکەکە ژ بۆی وێ قوناغێ کو ئەم تێدا بێژین: ئەم هەینە و خوەدی بڕیارین. ئەڤە وێ دگەهینیت کو ئەم ژ قوناغا گازندەکرنێ دەرباز ببینە قوناغا سەپاندنا هەبوونا خوە، ب ئارامی و ب باوەری.

ل جیهانێ، کەس ڕێزێ ل وی لایەنی ناگریت یێ کو ڕێزێ ل خوە نەگریت.

هەتا ئەم ب خوە دانپێدانێ ب مەزناهیا خوە نەکین، نابە چاڤەڕێ بین بەغدا دانپێدانێ ب مە بکت. لەوما سەرۆک بارزانی د پەیاما خوە دە داخوازێ ژ بەغدا ناکت، بەلکۆ داخوازێ ژ مە کوردان دکت کو ئەم د ناڤ مالا خۆ دا ڕێککەڤین کا ئەم دخوازین چەوا دیار ببین.

ئەڤە بانگەوازیکە ژ بۆ هشیاربوونا نەتەوەیی، داکو ئەم ژ وێ پەرچەبوونێ رزگار ببین یا کو وێنەیێ مە ل بەر چاڤێن خەلکی لاواز دکەت.

مەرج نینە هەموو کەس وەک ئێک هزربکەن، لێ دڤێت چیرۆکا مە یا نەتەوەیی ئێک بیت.

 ئەڤ پەیامە ب بێدەنگی دبێژیت: هەر مللەتەکێ کو نەشێت ب ئێک دەنگی بەحسێ خوە بکت، دێ بتە پارچەیەکا بچووک د ناڤ یاریێن خەلکی دا.

مەترسی ل وێرێ یە دەما حزبەک ب تەنێ دەست ب سەر سومبولێن نەتەوەیی دا دگریت، ژبەرکو وێ دەمێ دۆزا نەتەوەیی دبیتە دۆزەکا حزبی و بچووک دبیت.

 لێ دەما دۆز ژ بۆ خوەدیێ خوە یێ ڕاستەقینە کو مللەتە دزڤریت، وێ دەمێ ڕێککەفتن و ئێکگرتن نە لاوازی یە، بەلکۆ مەزنترین هێزە. هێزا ڕاستەقینە ئەو نینە کو ب زۆرێ خوە بسەپینی، بەلکۆ ئەوە کو هەموو لایەک ب دلسوزى لسه‌ر کۆک بن.

کوردایەتی نە تەنێ دروشمە بۆ کۆمکرنا خەلکی، بەلکۆ ئەو ژێرخان و بونیاتە کو دڤێت سیاسەت ل سەر بهێتە ئاڤاکرن.

 کوردایەتی زمانێ ناساندنا مەیە ل جیهانێ. دەمێ ئەم دزانین ئەم کینە و مه‌ چ دڤێت، جیهان نەچارە سەرەدەریێ دگەل مە بکەت وەک ئەم هەیی، نە وەک وێ یا ئەو دخوازن.

خالا هەرە گرنگ د ڤێ پەیاما سەرۆک بارزانی دا ئەوە کو مە فێر دکەت: پۆست و پله‌ نە مولکێ هیچ کەسێ یە، بەلکۆ ئەرکە بۆ خزمەتا وێ وێنەیا مەزن یا نەتەوەیی.

ناکۆکی دڤێت تەنێ جیاوازیا بیروبۆچوونان بیت د ناڤ مالا کوردان دا، نەکو شەڕ بیت ل سەر هەڕفاندنا مالێ.

ب کورتی ئەڤ دەقە دەربازبوونە ژ پێگەهشتنا سیاسی بۆ پێگەهشتنا نەتەوەیی. مە فێر دکەت کو ئێدی بەسە ئەم خوە ب قوربانی بدەینە نیاسین، دەم هاتییە ئەم خۆ وەک خوەدی بڕیار و ئیرادە بدەینە نیاسین.
بهایێ ڤێ گۆتارێ د وێ یەکێ دا یە کو دبێژیت:

 وەرن دا ئەم ب کردار دیار بکین ئەم کینە، بەری کو تەنێ داخوازا مافان بکین.

وەرن دا ئەم مەرجێن خوە دروست بکەین، پاشی ب هێمنی وان مەرجان بکەینە بەشەک ژ واقعێ سیاسی.

ئەڤە یە ئەو داڕشتنا کو خزمەتا تێگەهشتنا کوردی دکەت، زمانەکە مە ژ کارڤەدانێ رزگار دکەت و مە دکەتە خوەدی ناسنامەیەکا سەربەخوە.