پارتیا گەلان یا وەکهەڤی و دەمۆکراسیێ (دەم پارتی)، ئیرۆ رۆژا سێشهمی 30 كانوونا 2025ێ پەیاما سەرسالێ یا رێبەرێ پهكهكێ عهبدوللا ئۆجالان پارڤە کر.
عهبدوللا ئۆجالان د پەیاما خوە دە بەحسا پێڤاژۆیا چارەسەریێ و پەیمانا 10ێ ئادارێ یا کو د ناڤبەرا سووریە و هێزێن سووریەیا دەمۆکراتیک (ههسهدێ) دە هاتیە ئیمزەکرن کر.
ئۆجالان دیار کرییه کو پێکانینا پەیمانا 10ێ ئادارێ دێ پێڤاژۆیێ رهەت بکە و بلەز بکە. د ڤێ پێڤاژۆیێ دە رۆلا ترکیەیێ یا هێسانکەر، ئاڤاکەر و ڤەکری یا ژ دیالۆگێ رە خوەدی گرینگیەکە ژیانییە.
ئهڤ داخوازییا ئۆجالان زهختا ل سهر رۆژئاڤا كوردستانێ و رێڤهبهرییا وێ زێدهتر دكه، تایبهت پشتی كو ل رۆژێن رابووری هاكان فیدان وهزیرێ دهرڤه یێ تركیهیێ ههمان داخوازی كربوو و گۆتبوو: دڤێ پهیمانا 10ی ئادارێ بێی گیرۆ كرن وهره بجیهـئانین.
پەیاما عهبدوللا ئۆجالان وهایە:
دەما ئەم دکەڤن سالەکە نوو، دڤێ ئەم دوجارە ب بیر بینن کو نەتەوەپەرەستیا کو د سەدسالا بۆری دە ب ئێرشێن ئەمپەریالیست رە د ناڤ هەڤ دە ب پێش کەتیە، رۆژهلاتا ناڤین چاوا ب پەڤچوونێن کوور، وێرانی و پەرچەبوونێن جڤاکی رە رووبروو هشتیە.
مەزهەبپەرەستی و نەتەوەپەرەستیێن ئەتنیکی یێن کو ئیرۆ ل هەرێمێ تێن ژیین هەموو، کۆکێن خوە ژ ڤێ دیرۆکا نێزیک و ب ئێش دستینن.
مخابن ستراتەژیا پارچە بکە، ب رێ ڤە ببە و سۆر بکە یا پەرگالا هەگەمۆنیک د بن ئاوایێن جودا دە ددۆمە.
تام ژی ژ بەر ڤێ سەدەمێ پەرسپەکتیفا مە یا ئاشتی و جڤاکا دەمۆکراتیک کو مە تەڤی زەهمەتیان ب پێش خستیە نەتەنێ تەرجیحەکە، وەکی نەچاریەکە دیرۆکی ل پێشیا مە دسەکنە.
ئەگەر راست و تێگهیشتی وەرە نرخاندن ئەڤ پەرسپەکتیف پانزەهیرەکە کو دکارە رێ ل بەر پەڤچوونێن نوو بگرە و ژیانا گەلان یا ب هەڤ رە، وەکهەڤ و ئازاد پێکان بکە.
د هەیاما پێشیا مە دە بەرپرسیاریا مە یا بنگەهین ئەوە کو ئەم رێ ل بەر پەڤچوونەکە نوو بگرن کو دکارە د دەمەکە کورت دە دەرکەڤە و رێ ل بەر ئەنجامێن کو قەرەبووکرنا وان نە ممکنە بگرن.
کریزێن کو ل رۆژهلاتا ناڤین کوور دبن و پەڤچوونێن پۆلیتیک، ئەنجاما نەچارا ختمین و نەددۆمباریا تێگهشتنا شارستانیا دەولەتپارێزا دەستهلاتخواز و دەسپۆتیکە کو ب هەزاران سالن ددۆمە.
چارەسەریا پرسگرێکا کوردان یا کو د ناڤەندا ڤان کریزان دە یە ژی، تەنێ ب ئاشتیا جڤاکی و لهەڤکرنا دەمۆکراتیک پێکانە.
گرینگیەکە ژیانی هەیە کو پرسگرێک نە ب رێبازێن پەڤچوون، شەر، لەشکەری و ئەولەهیێ؛ ل سەر زەمینەکە دەمۆکراتیکا کو ئیرادەیا گەلان ئەساس دگرە وەرە دەستگرتن.
تابلۆیا کائۆتیکا ل سووریەیێ دەرکەتیە هۆلێ ژی نیشانەیا ئەشکەرە یا پێدڤیا دەمۆکراتیکبوونێ یە.
تێگهشتنا برێڤەبریێ یا یەکپەرەست، زەختکار و یا ناسنامەیان ئینکار دکە کو ب سالان ئاژۆت؛ داخوازا ئازادی و وەکهەڤیێ یا کورد، عەرەب، عەلەوی و هەموو گەلان هێ خورتتر کریە.
داخوازا بنگەهین یا کو د چارچۆڤەیا پەیمانا 10ێ ئادارێ یا د ناڤبەرا ههسهدێ و رێڤەبەریا شامێ دە هاتیە ئیمزەکرن دە هاتیە زمان، مۆدەلەکی سیاسی یا دەمۆکراتیکە کو گەل کاربن ب هەڤ رە خوە ب خوە ب رێ ڤە ببن.
ئەڤ نێزیکاتی، زەمینەکە ئەنتەگراسیۆنا دەمۆکراتیکا کو دکارە ب ئاڤاهیا ناڤەندی رە وەرە موزاکەرەکرن ژی دحەوینە. پێکانینا پەیمانا 10ێ ئادارێ، دێ پێڤاژۆیێ رهەت بکە و بلەز بکە.
د ڤێ پێڤاژۆیێ دە رۆلا ترکیەیێ یا هێسانکەر، ئاڤاکەر و ڤەکری یا ژ دیالۆگێ رە خوەدی گرینگیەکە ژیانییە.
