ئیرانا نوكه و جهێ کوردان د هاوکێشەیا هەرێمی دا
سمكۆ عهبدولعهزیز
ئەڤرۆ ئیران د قۆناغەکا هەستیار و دژوار دا دەرباز دبیت، مرۆڤ دشێت بێژیت كو گەهشتیە وێ خالا هیگل بەحس دکەت: «کەلەکەبوونا هەڤدژی و ئالۆزییان بەری قۆناغا تەقینێ».
قەیرانێن ئابووری و جڤاکی و سیاسی هەمی د ناڤ جەستەیەکێ وەستیایی دا سەرێک دکەڤن. داكهتنا بهایێ دراڤی، گرانی، بەربهلاڤبوونا هەژاریێ و نەشیانا دەولەتێ د دابینکرنا ژیانەکا ب روومهت دا، ئەڤه هەموو نیشانێن کێشەیێن تەکنیکی نینن، بەلکو زەنگا نەمانا شەرعیەتێ یە.
دەولەت ئێدی نەشێت خەلکی رازی بکەت، نە ب ئایدۆلۆژیایێ و نە ژی ب ئابوورێ، لەورا ژ دەولەتەکا خودان پاساو بوویە دەولەتەکا تەنێ ب زۆری و ئەمنیەتێ دهێتە برێڤەبرن، ئەڤ گوهۆرینە مەترسیدارترین تشتە د دیمەنی دا.
د ڤێ رەوشێ دا، بارێ کوردان ل ئیرانێ دوجار گرانە:
ژ لایەکێ ڤە وەکی هەر وەلاتیەکێ دی پشکەکن ژ قەیرانا گشتی و د بن هەژاری و بێکاریێ دا دنالن، ژ لایەکێ دی ڤە دەولەت وەک مەترسی تەماشەی وان دکەت ژبەر جوداهییا نەتەوەیی و جوگرافی.
کورد دکەڤنە بەر دو بەرداشان:
بەرداشێ قەیرانا ئابووری و بەرداشێ گۆمانا ئەمنی. ل ڤێرێ کورد دبنە نەینیکا قەیرانا دەولەتێ، هەر تشتێ دەولەت ژێ دترسیت، ل دەستپێکێ ل دەڤەرێن کوردی دیار دبیت بەری بگەهیتە تارانێ.
راستە ئیران نوکە نە د حالەتێ هەرفتنێ دایە، لێ یا تووشی رەقبوون و زوهابوونا دیرۆکی بووی.
رژێم ناکەڤیت، لێ رەق و هشك دبیت، هەر چەند هشك ببیت، زۆرداریێ زێدەتر دکەت، و هەر چەند زۆرداری زێدە بیت، باوەری و شەرعیەت کێم دبیت. ئەڤە وهدکەت خۆنیشاندان بەردەوام بن لێ بێی کو بگەهنە ئەنجامەکی، و دەولەت ژی دمینیت لێ بێی سەقامگیری.
کورد د ناڤ ڤێ گێژاڤێ دا هێشتا نەبووینە ئەکتەرەکێ سەربخۆ، بەلکو پشکەکن ژ شەپۆلەکا مەزنتر، لێ تشتەکێ کوردان هەی خەلکێ دی نینە: بیرەوەرییا نەتەوەیی یا رێکخستی و ئەزموونەکا دیرۆکی دگەل تێگەهێ دەولەتێ.
دەرفەت و مەترسی پێکڤە دیار دبن.
دەرفەت ئەوە:
پرسا کوردی ژ دۆسیەیەکا ئەمنی د گۆتارا دەولەتێ دا، ببیتە پرسەکا سیاسی ل جەم جڤاکێ ئیرانی ب خۆ. واتە ئێدی کوردبوون نەهێتە دیتن وەک گەفەک بۆ پارچەکرنا ئیرانێ، بەلکو وەک کلیلەک بۆ سەرراستکرنا وێ.
مەترسی ئەوە:
کورد ببنە داردەست یان ئامیرەکێ فشارێ د دەستێ هێزێن دەرەکی یان ناڤخۆیی دا بێی کو خودان پرۆژهیێ خۆ بن.
ژ لایێ ستراتیژی ڤە، یا ئەڤرۆ ژ کوردان دهێتە خواستن نە شۆرشەکا بێی وەختە و نە ژی بێدەنگی، بەلکو پێگەهگرتنەکا زیرەکانەیه. دڤێت د ناڤ جەرگێ داخوازێن خەلکی دا بن بۆ دادپەروەری و کەرامەتێ، لێ د هەمان دەم دا ناسنامە و گۆتارا خۆ یا نەتەوەیی ب هێمنی و ئاقلانە بپارێزن. واتە هەڤسەنگیەکێ دروست بکهن: هەم ببنە پشکەک ژ خەباتا گشتی یا مرۆڤایەتی، هەم ژی خۆ د ناڤ وێ خەباتێ دا وندا نەکەن.
کورد ل ئیرانێ ل هەمبەر قۆناغەکا چارەنڤیسسازن: ئەرێ دێ هەر مینن د رۆلێ قوربانیێ دا و گازندان کەن؟ یان دێ بنە ئەکتەرەکێ کارا کو داهاتوویێ ئیرانێ د نەخشینیت؟ پاشەرۆژ ب جودابوونێ یان ب ژ ناڤچوونێ چێنابیت، دڤێت کورد ببنە شەریکەکێ رەخنەگر بۆ ئاڤاکرنا قۆناغەکا نوی.
ئەگەر کورد د ڤێ یەکێ دا سەرکەڤن، نابن تەنێ تەماشەڤان، بەلکو دێ بنە کلیلا چارەسەریێ و ئەگەر شکستنێ بینن، دێ هێنه پەراوێزەکرن.
دەمێ دەولەت ل تارانێ دهەژیت، کورد دێ ل سنۆران ئازارێ کێشن بێی کو دەستەلاتا گوهۆرینێ هەبیت.
ئەڤە دهمێ هەلبژارتنێ یا هێمنە و یا بێ دەنگە، لێ ئێکلایکەرە.
