کەجەکە: ئازادکرنا ئۆجالان بۆ قۆناغا دویێ یا پێڤاژۆیا ئاشتیێ شەرتە
ئەندامەکێ کۆنسەیا برێڤەبریا کەجەکێ راگھاند: “ھەکە دەولەتا ترکیەیێ پێنگاڤێن قانوونی و سیاسی نەهاڤێژە، قۆناغا بهێت یا پێڤاژۆیا ئاشتیێ دێ راوەستە.”
ئەندامێ کۆنسەیا برێڤەبریا کۆما جڤاکێن کوردستانێ (کەجەکێ) موستەفا کاراسو د داخویانیەکا رۆژنامەڤانی دە راگھاند: “پشتی بانگا عەبدوللاھ ئۆجالان، پەکەکێ ژ بۆ پێڤاژۆیا ئاشتیێ گەلەک پێنگاڤێن گرینگ ئاڤێتنە، بریارا ھلوەشاندنا خوە دایە و شەرێ چەکداریێ راوەستاندیە، ھەروەسا ھێزێن خوە ژ باکورێ کوردستانێ و دەڤەرێن خەتەر ژ بۆ چێبوونا ئالۆزیان ڤەکشاندنە.”
کاراسو تەکەز ژی کر: “نھا دەم ھاتیە کو ترکیە دەرفەتێ قانوونی و سیاسی ژ بۆ پێنگاڤێن پەکەکێ پەیدا بکە.” ھەروەسا گۆت: “ھەکە قانوونێن پێدڤی ژ بۆ ئەندام و کادرۆیێن پەکەکێ نەیێن دەرخستن و دەرفەتێ دەمۆکراسیێ نەیێ ئافراندن، ئەو پێڤاژۆ دێ راوەستە و دێ دەرباز نەبە قۆناغا دویێ.”
وی ئەندامێ کۆنسەیا برێڤەبریا کەجەکێ ھەروەسا راگھاند: “ژ بۆ قۆناغا دویێ، دڤێت ئۆجالان بێ شەرت بهێت ئازادکرن.”
پێڤاژۆیا ئاشتیێ یا نوو ل ترکیەیێ پێشکەفتنەکا باش تۆمار کریە، ب تایبەتی ژی پشتی بانگا دیرۆکی یا رێبەرێ پەکەکێ یێ گرتی عەبدوللاھ ئۆجالان ژ بۆ دانانا چەکان ل رۆژا 27ێ سباتێ. ل بەرانبەری وێ یەکێ ژی، پەکەکێ ئاگربەست راگھاند و د دوو رە د تیرمەھا 2025ێ دە ب مەراسیمەکا سەمبۆلیک دەست ب دانانا چەکان کر.
حکوومەتا ترکیەیێ ژی چەند پێنگاڤ ئاڤێتنە، وەکی ئاڤاکرنا کۆمیتەیەکێ ل پارلامەنتۆیێ ل رۆژا 5ێ تەباخا 2025ێ ب ناڤێ “کۆمیتەیا یەکرێزیا نەتەوەیی، براتی و دەمۆکراسیێ” ژ بۆ دانانا چارچۆڤەیا قانوونی یا وێ پێڤاژۆیێ. حکوومەتا ناڤبری ھەروەسا ل سەر ئامادەکرنا قانوونەکێ ب ناڤێ “قانوونا دەرفەتێ” دخەبتە دا کو ڤەگەرا ئەندامێن پەکەکێ یێن کو توندوتویژی نەکرنە رێک بخە و رەوشا گرتیێن سیاسی چارەسەر بکە.
تەڤی ڤان پێنگاڤان، قەبخوازیێن مەزن ھین ژی مانە و کەجەکێ ھایداری دایە کو ئەو پێڤاژۆ ب رەنگەکێ یەکالی نایێ مەشاندن. چارەنڤیسا ئۆجالان و داخوازا ئازادکرنا وی یەک ژ مژارێن سەرەکی یێن نیقاشانە. د ڤێ ناڤبەرێ دە، رەوشا ھێزێن سووریەیا دەمۆکراتیک (ھەسەدێ) ل سووریەیێ و پەیمانا وان یا لگەل حکوومەتا شامێ ئالیەکێ ھەرێمی دایە وێ پێڤاژۆیێ.
