رێڤەبەریا خوەسەر: ھەسەدە ل شێخ مەقسوود تونەیە.. حکوومەتا دەمکی دیالۆگێ رەد دکە

رێڤەبەریا خوەسەر، داخویانیا “حکومەتا دەمکی”یا کو تاخێن شێخ مەقسوود و ئەشرەفیێ وەکی ئارمانجێن لەشکەری نیشان ددە، شەرمەزار کر و دەستنیشان کر کو ھێزێن ھەسەدێ ل ڤان تاخان تونە نە. ھەروھا گۆت، وەزارەتا پاراستنێ یا حکوومەتا دەمکی ھەموو رێیێن دیالۆگێ گرتنە.

رێڤەبەریا خوەسەر ئیرۆ 7ێ چلەیێ تێکلداری گەفێن نوو یێن ھێزێن “حکوومەتا دەمکی”یێن ل دژی تاخێن کوردان یێن حەلەبێ داخویانیەک وەشاند. رێڤەبەریێ ھشیاری دا کو ئارمانجگرتنا ڤان تاخان بنپێکرنەکا گران یا قانوونێن ناڤنەتەوەیییە.

‘تاخێن سڤیلانن، ھەسەدە لێ تونە یە’

رێڤەبەریا خوەسەر ئیدیعایێن حکوومەتا دەمکی یێن کو ڤان تاخان وەکی “ئارمانجێن لەشکەری یێن رەوا” بناڤ دکە، رەد کرن و وھا گۆت:

“ئەم ب ئاشکەرا رادگھینن کو ھەسەدە ل تاخێن شێخ مەقسوود و ئەشرەفیێ تونەیە. ئەڤ تاخ دەڤەرێن نشتەجھبوونێ نە و ب دەهان هەزار سڤیل لێ دژین. پرانیا شێنیان کوردن و ھەژمارەکا مەزن ژ وان کۆچبەرێن عەفرینێ نە کو ب دارێ زۆرێ ژ وارێن خوە ھاتنە دەرخستن.”

‘حکوومەتا دەمکی د زمانێ شەر دە ب ئیسرارە’

د داخویانیێ دە ھات دەستنیشانکرن، ئالیێ کوردی ب پەیمانا 1ی نیسانێ ڤە گرێدایی مایە، لێ حکوومەتا دەمکی دۆرپێچ و راگەشی زێدە کرنە. رێڤەبەریێ ئەشکەرە کر کو تەڤی ھەولدانێن وان یێن دوبارە ژ بۆ ڤەکرنا رێیێن دیالۆگێ، وەزارەتا بەرەڤانیێ یا حکوومەتا دەمکی ھەر جارێ دیالۆگ رەد کریە و ل سەر زمانێ گەف و شەری ئیسرار کریە.

بانگا ل بەرپرسان و جوانێن سووریەیی

رێڤەبەریا خوەسەر بانگ ل بەرپرسێن حکوومەتا دەمکی کر کو ڤەگەرن سەر “رێیا ھش و مەنتقێ” و دیالۆگێ وەکی رێیا یەکانەیا چارەسەریێ بکار بینن. ھەروھا بانگ ل جوانێن سووری ھات کرن کو دووری مەنتقا چەک و شەری بکەڤن و نرخێن ژیانا ھەڤبەش و براتیێ بپارێزن.

چارەسەریا سیاسی و سووریەیا نەناڤەندی

رێڤەبەریا خوەسەر د داویا داخویانیا خوە دە پشتگریا خوە ژ بۆ شێنیێن شێخ مەقسوود و ئەشرەفیێ راگھاند و ھەلوەستا خوەیا ژ بۆ چارەسەریەکا سیاسی دوبارە کر: “ئەم پابەندی چارەسەریا سیاسی و ئاڤاکرنا سووریەیەکا یەکبوویی، دەمۆکراتیک و نەناڤەندی نە، کو ماف و روومەتا ھەموو پێکھاتەیان گارانتی بکە.”