ئەو رەوشا ئەڤرۆ ل ئیرانێ دەرباز دبیت، نە وەک وان شۆڕشانە یێن ئەم د پەرتووکێن دیرۆکێ دا دناسین، نە ژی وەکی کودەتایان و پێلێن نەرازبوونێن کەڤنە، بەلکو ئەوا رووددەت گوهۆڕینەکا هێدی و ل سەرخۆ یە د سروشتێ پەیوەندییا ناڤبەرا جڤاکی و دەولەتێ دا. ئەڤ گوهۆڕینە نە ب ژمارا خۆپێشاندەران و نە ب لەزاتییا کەفتنا رژێمێ دهێتە پیڤان، بەلکو پیڤەرێ وێ ئەوە کا تا چ ڕاددە باوەری و واتە و شەرعیەت د هوشێ خەلکی دا داڕزینە.
پشتی 2003 ژی ل ئیراقێ، کەفتنا دەولەتێ دەرگەهەکێ بەرفرەهـ ڤەکر، لێ د گەل خۆ ئاڵۆزی و باجەکا مرۆڤی یا گران ژی ئینا.
وانە ل ڤێرە یا ئاشکەرایە:
گوهۆڕین ب شێوەیەکێ خۆکار کەسێ خەلات ناکەت، بەلکو وان خەلات دکەت یێن دزانن چەوا ب هوشیاری و سەبر و ستراتیژی سەرەدەریێ دگەل دکەن.
لەورا، هەلویستێ کوردی یێ ئەقلانی ئەڤرۆ، نە د بەرزەبوونێ دایە د ناڤ پێکدادانان دا، و نە ژی د ڕاوەستیانێ دایە ل ڕێزا دەستهەلاتێ، بەلکو د ئاڤاکرنا پێگەهەکێ سەربخوە یێ ئەخلاقی و سیاسی دایە: پێگەهەک کو گوهۆڕینێ دبینیت، تێدگەهیت، و خۆ بۆ ئامادە دکەت، بێی کو سەرکێشیێ ب جڤاکی بکەت د ڕووبرووبوونەکا ڤەکری دا، کو كوردان ئامیرێن وێ نینن.
وەبەرهێنانا ڕاستەقینە یا کوردان د ڤێ دەمێ دا، پێدڤى ب هێزکرنا جڤاکێ مەدەنی و پەرەپێدانا شروڤه‌كرنێ و ڕێکخستنا جڤاکی یا هێمن و ئاڤاکرنا پران دایە دگەل پێکهاتێن دی یێن جڤاکێ ئیرانێ د گەل ئامادەکاریێ بۆ هەمی ئەگەران بێی کو چارەنڤیس ب ئێک ژ وان ڤە بهێتە گرێدان.
هێزا کوردی یا دیرۆکی چو جاران تەنێ د توندوتیژیێ دا نەبوویە، بەلکو د شیانا مانێ دا بوویە، د وێ شیانێ دا بوویە کو ئازارێ بکەتە بیردانک (ذاکرة) و بیردانکێ بکەتە هوشیاری و هوشیاریێ ژی بکەتە پرۆژەکێ دەمدرێژ، ئەڤ قۆناغە ب تایبەتی پێدڤی ب ڤی جۆرێ هێزێ یە.
ئەو روودانێن ل ئیرانێ چێدبن، نە دوماهیکا تشتەکێ ئاشکەرایە، بەلکو دەستپێکا قۆناغەکا نەدیارە. قۆناغەکە کو تێدا شێوازێ سیاسەتێ بخۆ دهێتە گوهۆڕین: ژ ململانێیەکێ ل سەر دەستهەلاتێ بۆ ململانێیەکێ ل سەر واتەیێ.
