رەوانگەھا سووری بۆ مافێن مرۆڤان: ل شێخ مەقسوود 300 سڤیل ب شێوەیەکی ھۆڤانە ھاتنە گرتن
ھێزێن گرێدایی “حکوومەتا دەمکی” ل تاخا شێخ مەقسوود یا حەلەبێ زێدەتری 300 سڤیل گرتن و ب دەھان سڤیل رووبروویێ سڤکاتیێن گران و رەفتارێن دژە مرۆڤی بوونە.
رەوانگەھا سووری بۆ مافێن مرۆڤان (SOHR) بەلاڤ کر، پشتی کو کۆمێن چەکدارێن گرێدایی حکوومەتا دەمکی دەرباسی تاخێن شێخ مەقسوود و ئەشرەفیێ یێن حەلەبێ بوون، دەست ب ئۆپەراسیۆنێن گرتنێ یێن بەرفرەھ کرن. رەوانگەها سووری راگھاند، ھەری کێم 300 سڤیل د شەرت و مەرجێن گران دە ھاتنە گرتن و روومەتا وان ھاتیە بنپێکرن.
سڤکاتیێن نژادپەرەست و رەفتارێن ھۆڤانە
رەوانگەھێ دەستنیشان کر ژی، چەکدارێن ڤان کۆمان ب شێوەیەکی گەلەکی خەراب نێزیکی سڤیلان دبن. چەکدار سڤکاتیێن گران و نژادپەرەست ل سڤیلێن کورد دکن و ھەول ددن وان بچووک بخن. د گرتەڤیدیۆیێن کو د تۆرێن جڤاکی بەلاڤ بوونە دە، تێ دیتن کو سڤیل ل بەر دیوارەکی ھاتنە کۆمکرن و چارەنووسا وان نە دیارە.
چارەنڤیسا ژن و زارۆکان نە دیارە
ل گۆری ئاگاھیێن ژ ھەرێمێ، پشتی کۆنترۆلکرنا ھەر دو تاخان، چەکداران دەست ب گرتنا مێران کریە. لێ بەلێ ھەتا نھا چارەنڤیسا ب سەدان ژن و زارۆکان نایێ زانین. ھات دیارکرن کو ب دەھان کەس وندا نە و مالباتێن وان د ناڤا ترس و خۆفەکا مەزن دە نە.
ھەروھا رەوانگەھێ رەخنە ل سازیێن ناڤدەولەتی گرت کو ل ھەمبەری ڤان بنپێکرنێن سیستەماتیک بێدەنگ دمینن. ھات دەستنیشانکرن کو ئەڤ کریار نە بوویەرێن تاکەکەسی نە، لێ بەلێ پلانەکە ژ بۆ ترساندنا سڤیلان و گوھەرتنا دەمۆگرافی.
