یاریا ل بن مێزێ و کورد د تەرازویا هێزێ دا
سمكۆ عهبدولعهزیز
ئەوا ئەڤرۆ ل رۆژهەلاتا ناڤین دگەزیت، ل سەر مێزێ ناهێتە برێڤەبرن، بەلکو یاری یا ل بن مێزێ یە. ئەوا د بەیاننامهیان دا دهێتە گۆتن تەنێ دەنگڤەدانە، لێ بڕیارا ڕاستەقینە د بێدەنگیێ دا دهێتە پوختەکرن د ناڤبەرا دەزگەهێن هەوالگیری و تۆڕێن بەرژەوەندییان یێن کو سنۆران نانیاسن.
ئەڤ هێزە جوگرافیایێ تەنێ وەک مەیدانا کارکرنێ دبینن و گەلان ژی وەک پیۆنێن شەترەنجێ دگۆهۆڕن.
ئەمریکا ژ دەڤەرێ دەرناکەڤیت، بەلکو شێوازێ هەبوونا خۆ دەستکاری دکەت و لەشکرێ خۆ یێ دیار کێم دکەت، لێ هەبوونا خۆ یا هەواڵگیری و ئابووری و تەکنیکی کویرتر لێ دکەت، ئارمانج نە ڕەڤینە، بەلکو کێمکرنا مەسرەفان و خۆگونجاندنە.
ڕووسیا ڕژێمان ناپارێزیت، بەلکو لاوازییا وان دپارێزیت، چونکی ڕژێمەکا لاواز و هەوجە بۆ وێ ب مفاترە ژ ڕژێمەکا ب هێز و سەربخۆ.
ئیرانێ جیرانێن ب هێز نەڤێن، بەلکو جیرانێن وەسا دڤێن کو بشێت ب ڕێکا میلیشیا و تۆڕێن خۆ یێن تایبەت د ناڤ دا تەڕاتێنێ بکەت.
ترکیا ل ئارامییا سووریێ ناگەڕیت، بەلکو ل سووریەکێ دگەڕیت کو تێدا کورد نەبنە مەترسی. ئیسرائیل ژی ڕۆژهەلاتەکا ناڤین یا ئێکگرتی نەڤێت و ل دویڤ دەڤەرەکا پارچەکری یە چونکی ژێکهەلوەشاندنا دەڤەرێ بۆ وێ دابینکرنا ئەمنیەتا دۆمدرێژە.
د ڤێ هاوکێشێ دا، کورد نە تەنێ دۆزەکا نەتەوەیی نە، بەلکو بوینە گرێکەکا گرنگ د ناڤ سیستەمێ کۆنترۆلکرنێ دا.
ژبەر کو کورد د دابەشکرینە ل سەر چار دەولەتان، یان دبنە پر (جسر) یان دبنە بەربەست، لەوما ب چ ڕەنگان ڕێک ناهێتە دان کو ببنە خوەدان بڕیار و قەوارەیەکێ سەربخۆ.
دهێنە بکارئینان وەک بەربەست د ناڤبەرا ترکیا و سووریێ دا، د ناڤبەرا ئیران و ئیراقێ دا.
و وەک جوداکەر د ناڤبەرا چەمکێ دەولەت و نەدەولەتێ دا.
ئەوا ل شێخ مەقسوود و ئەشرەفیێ چێبووی، تەنێ شەڕەکێ کۆلانان نەبوو، بەلکو دوبارە کێشانەڤەیا هێلێن سۆر بوو: کێ ماف هەیە بمینیت؟ کێ ماف هەیە مەزن ببیت؟ و پێدڤیه كى بهێتە شکاندن؟
بڕیار نە یا وێدەرێ بوو، دەم (تەوقیت) ژی نە هەڕەمەکی بوو، بەلکو گرێدایی بازاڕێ بەرژەوەندیێن ئیقلیمی و نێڤدەولەتی بوو.
د سیاسەتا ئەڤرۆ دا، قەیران ناهێنە چارەسەرکرن، بەلکو دهێنه ئیدارهكرن.
دەولەت ناهێنە ئاڤاکرن بەلکو د حالەتەکێ بێ سەروبەر دا دهێنە هێلان.
ململانێ ب دوماهی ناهێت، بەلکو ئاستێ وێ دهێتە کۆنترۆلکرن.
کورد د ناڤەندا ڤێ یاریێ دا نە چونکی تاکە هێزن کو شیان هەنە ببنە ئەمری واقیع ل دەرڤەی ڤیانا یاریزانێن مەزن ئەگەر هەڤسەنگی بهێنە گوهۆڕین.
لەوما ئارێشە نە تەنێ ئەوە کو ستەم ل کوردان دهێتە کرن بەلکو کارەسات ئەوە کو دهێنە بکارئینان وەک کارتا فشارێ و تەنانەت وەک کارتا ئەخلاقی ژی، بێی کو ڕێک ب دەنێ ببنە پرۆژەیەکێ ڕاستەقینە.
ئەگەر ئەڤ ڕەوشە نەهێتە گوهۆڕین، پاشەڕۆژێ نە تەقینەکا مەزن بەلکو داخورانەکا هێدی و دۆمدرێژ ل دویڤە.
دێ دۆزا کوردی پارچە کەن بۆ چەندین دۆسیەیێن بچویک یێن خوەجهی، و هەر دەمێ لایەنەکێ ئیقلیمی بڤێت تەرازییا هێزا خۆ ڕاست بکەتەوە، دێ کوردان مەزێخیت و هەر دەمێ قەیرانەکا مەزنتر چێبوو، دێ دۆزا کوردی هێتە پاشخستن، و دێ دیسان چیرۆکا وان ب پێنووسێ خەلکێ هێتە نڤیسین.
كورد ل سووریێ دێ مینن ناوچەیەکا جوداکەر نە قەوارەکێ سیاسی.
كورد ل ترکیا دێ مینن ئارێشەیەکا ئەمنی نە هەڤپشکەکێ سیاسی.
كورد ل ئیرانێ دێ مینن مەترسی نە پێکهاتە.
كورد ل ئیراقێ ژی دێ مینن نیڤ-دەولەت نە دەولەتەکا تەمام.
د هەموو حالەتان دا، كورد دێ مینن بابەت (موضوع) نە (ذات).
گوهۆڕینا پێدڤی، بەری هەر تشتەکی، گوهۆڕینەکا هزری و سیاسی یە، نە لەشکری و دانوستاندن.
پێدڤیە کورد ببنە خوەدان گۆتار و تیورا خۆ یا سەربخۆ. پێدڤییه كورد: خۆ پێناسە بکەن، بەرژەوەندیێن خۆ دیار بکەن و بزانن مومکین و مەمنووع چیە.
پێدڤییه كورد ژ کارپێکری ببنە کارکەر، ژ حالەتان ببنە پرۆژە.
پێدڤیە كورد بەری کو بەحسێ خۆ بۆ جیهانێ بکەن، ژ خۆ ڕا ببێژن: ئەم نە پرسیارەکین د ناڤ سیستەمێ هەوە دا، ئەم پێشنیار و بەدیلەکین ل دەرڤەی سیستەمێ هەوە.
ئەگەر ئەڤە نەهێتە کرن، هەر دەستکەفتەکێ کاتی دێ بیتە رابردوو، هەر پاراستنەکا نێڤدەولەتی دێ بیتە پاشکۆیەتی و هەر سەرکەفتنەک دێ بیتە شکەستنەکا پاشخستی.
مێژوو سزایا وی نادەت یێ شەڕی ددۆڕینیت، سزایا وی ددەت یێ تێنەگەهیت کا سروشتێ شەڕی چیە.
ئەگەر کورد ل ئاستێ هزر و سیاسەتێ نەبنە یاریزان، دێ هەتا هەتایێ مینن یاریگەهــ.
مەترسیا ڕاستەقینە ژى نە شکەستنه، بەلکو ڕاهاتن ل سەر وێ یەکێ کو تۆ پێلهك بی د یارییا کەسەکێ دی دا.
