بووبێ ئەسەر

مرۆڤ جارنا ل دیرۆکێ ڤەگەرە وێ باشە. مرۆڤ جارنا تشتان دوبارە بکە ژی رندە. ژ خوە د ناڤا ملەت و دەولەتێن داگیرکەری دە ئەڤ گرینگە. ژ بەر کو خەلکێ وان فامکۆر کرنە. لۆما ژی پێویستیە دوبارەکرنان ژی فەرزە. ئەز ژی نھا ڤێ دکم.

وەکە تێ زانین کو پشتی 1980ێ ل ترکیێ و ب تایبەتی ل باکورێ کوردستانێ ھەر تشت سەرۆبنی ھەڤ کرن. نە روومەت و قیمەت. نە ھێژایی و ھەلوەست ھشتن. ئارمانج ژ ڤێ ئەو بوو کو کێشەیا کورد، بفەتسینن یان تونە بکن. روحیەتا کوردستانی، ئیرادەیا کار و خەباتێن سیاسی تێک برن ئانگۆ کوشتن.

لۆما ژی زیندانا دیاربەکرێ ب پلان و پرۆژە ڤەکرن. ور وەکە تاقیگەهەکێ ب کار ئانین کو کوردان، ژ کوردستانیبوونا وان بدوور بخن. ل گۆر من د گەلەک واران دە ب سەر ژی کەتن.

ژ بەر کو د وێ تاقیگەهێ دا، ھەلوەست، بەرخوەدان و روحێ تەکۆشەریێ دێ چاوا تێک ببن، فێم کرن. ئارمانجا وان یا سەرەکی ئەڤ بوو. ھەر وەھا ب پەکەکەیا خوە دەست ب شەرێ چەکداری کرن. دا کو وان قەھرەمانێن د وێ تاقیگەهێ دە ل بەرخوەدان، تەسلیم نەبوون، ئانگۆ تەسلیم نەگرتن، ژ زیندانێ بەرددان، ب ئالیکاری و پشتگریا دەولەتێ ئەو دشاندن ناڤا گەریلایێن پەکەکێ.

ئارمانج ژ ڤێ ئەو بوو کو یێن د زیندانێ دە تەسلیم نە بوو بوون، ل ور تەسلیم دھاتن گرتن کو ئەو ببن مریدێن زلامێ وان عەڤدللا. یان ژی ب دەستێ زلامێن میتێ (ئیستخباراتان ترکان) کو وەکە شەرڤان د ناڤا پەکەکێ دە جھ گرتبوون، دھاتن کوشتن. واتە ڤەکرنا زیندانا دیاربەکرێ و شەرێ پەکەکێ وەکە دو تاقیگەهێن ژ بۆنا تونەکرنا کوردان بوون. یەکێ د زیندانێ دە ب کوشتن و ئێشکەنجەیان خوەستن گرتیان بکن ترکێن باش. یا دن ژی ل سەرێ چیایان ل سەر ناڤێ شەرێ ئازادیێ کەسێن قەھرەمان، ئاقلمەند، زانا و تێگشتی کوشتن و دکوژن.

ل ترکیێ و باکورێ کوردستانێ ب سایا “بکەر نەدیار” یانی کوژەرێن قەساس نە دیار کو پرانیا وان ژ زلامێن دەولەت و پەکەکەیا کوور بوون. ب ھەڤرە شەخسیەتێن کوردان، کادرۆیێن کو نەھاتبوون گرتن، پرانیا وان کوشتن یان ددان کوشتن.

ل ئالیەکی دن ژی د وارێ دەمۆکراتیک دە ژی، دەولەتێ و ھەدەپێ (دەم پارتییا نھا) ب ھەڤ رە خەبتین کو کەسێن خوەدی ھەلوەستێن کوردستانی بوون، د متینگ ئانگۆ خوەپێشاندانێن ھەدەپێ دە، دانە پێش. پرانیا کەسێن وەھا ژی یان ھاتن گرتن یا ژی کوشتن. یێن گرتین ژی پرانیا وان پشتی کو ژ زیندانێ دەرکەتن بوونە زلامێ دەولەتێ و ئێدی وان ژی چ ل ئەورۆپا و چ ژی ل کوردستانێ، ل سەر خەباتێن ل ئەورۆپا راپۆرت ددان ترکیێ ئانگۆ میتێ.

ئارمانج ژ ڤێ خەباتا ھەردو ئالیێن کوور، بێدەنگکرنا کوردان و ب سەرخستنا فکرێن عەڤدللایێ کوور بوو. باوەریا من دە د ڤی واری دە ژی ب سەرکەتن. ژ وان زلامێن کو د زیندانێ دە بوونە زلامێن دەولەتێ ھێژ ژی چ ل ئەورۆپا و چ ژی ل کوردستانێ د ناڤا مە دەنە. چیرۆک درێژە و ناخوازم وەختێ وە بگرم.

ئەم ڤەگەرن رەوشا نھایا باکورێ کوردستسنێ.

ھەردو ئالیێن کوور (دەولەت و پەکەکە) خەبات، تەڤگەر و چالاکیێن کوردستانی ئانین سەر خەتا مرنێ. واتە باوەر دکرن کو ئێدی دێ ھەر تشت وەکە وان ببە. لێ ئەڤ نەبوو. ژ بەر کو باشوورێ کوردستانێ ب سەرپەرەشتیا بارزانیان ئازادی و فەدەراسیۆن ب دەست خست. ئەڤ ژ بۆنا ھەمی کوردان ھێژایی و نە مرن بوو. ھەبوونا باشوورێ کوردستانێ بوو سەدەم کو ل ترکیێ ھندەک کانالێن دەمۆکراتیک ھاتن ڤەکرن.

ژ وان کانالان ژی یەک ژێ ڤەکرنا پارتیێن سیاسی و ئەشکەرە بوو. ئارمانج ژ ڤێ ژی ئەو بوو کو پشتی شەرێ چەکداری پەکەکە و دەولەتێ خوەستن کو کوردان د وارێ دەمۆکراتیک دە ئەنتەگرەیی ترکیێ ئانگۆ ترکان بکن. واتە کوردان ژی وەکە گەلەک کێم نەتەوەیان بکن ترک.

لێ کوردان و ب تایبەتی رێزدار کەمال بورکای، زوو ئەڤ پلان فێم کرن. لۆما ل گۆر فکر، رامان و رێ نیشاندانا جەنابێ کەمال بورکای، ھەگەر کێم و زەعیف ژی بوون، ل ھەمبەر ھەمی توند و تووژیان ملەتێ کورد بێ ئەلتەرناتیف نەھشت. وان ژی د وارێ دەمۆکراتیک دە، ب سایا ڤەکرنا پارتیەکا یاسایی کو ژ وێ پێڤاژۆیێ نھا ھاک-پارە تم چرووسکەک کو تاریا ملەتێ کورد رۆھنی دکر ھەبوو. مالا وان ئاڤا بە کو ب سایا وێ چرووسکێ ھەبوون و پاراستنا ملەت ھاتە کرن کو ب تەمامی تێک نەچە و نەچوو.

نھا ژی ئەم دبینین کو ب سایا وان خەباتێن دەمۆکراتیک یێن خوە وەکە خەتا کەمال بورکای ددیتن، بێ وەستان ھەتا ئیرۆ  بەردەوامیا کارێ خوە کرنە و دکن. لێ ھندەک کورد ڤێ نابینن یان ناخوازن ببینن. ئیرۆ بەرھەمێن وێ تێنە دیتن. لۆما ژی ژ بەر وان خەباتێن وان یێن دەمۆکراتیک، کورد ل باکورێ کوردسرانێ بێ ئەلتەرناتیف نەمان.

ھەزار مخابن کو تام د دەما رۆژ ب رۆژ ھاک-پار خورت دبوو کو ببن ھێزەک ئەلتەرناتیف، ھندەک خێرنەخوازان ئەو کرن دو بەش ئانگۆ دو پارچە. ئەو گاڤێن بەرب ئالتارناتیفەک باش کو دھاتن ئاڤێتن، قەلس و لاواز بوو.

ل سەر ئەساسێ ڤەکرنا پارتیێن ئەشکەرە و دەمۆکراتیک،  ئیرۆ ئەم دبینن کو گەلەک پارتیێن ئەشکەرایێن باکورێ کوردستانێ ھاتن ڤەکرن. یەک ژ وان ژی پارتیا وەلاتپارێزێن کوردستانی بوو.

ب ڤەکرنا پارتییا وەلاتپارێزێن کوردستانێ خەتەکا نوو، بیر و باوەرەکا تازە بنگەھێ خوە ئانگۆ تووڤێ خوە ئاڤێت سەر ئەردێ کوردستانێ یێ داگیرکری. ھێڤیەکە خورت، باوەریەکە دەلال دا کەسێن کو خوە بێ ئەلتەرناتیف ددیتن.

پارتییا وەلاتپارێزێن کوردستانێ ژی ل گۆر خوە کارێ باش و ھەولدانێن دەلال کرن و دکە، لێ تێرێ ناکە. ب تایبەتی سەرۆکێ پارتییا وەلاتپارێزێن کوردستانێ (PWK) رێزدار مستەفا ئۆزچەلیک ژ دامەزراندنا وێ و ھەتا نھا قەت رانەوەستیایە. چ ژێ ھاتیە کرییە و دکە. د ناڤا PWK دە ژی ھن کادرۆیێن ھێژا وەکە جێگرێ سەرۆکێ PWK رێزدار جانۆ ئامادی و گەلەکێن دن، ل گەل ھەڤ کارێ باش دکن. لێ پرانیا ئەندامێن مەجلیس و ھندەک ژ کادرۆیێن وێ یێن سال مەزن، ھم ژ بەر ترسا پەکەکێ و ھم ژی، ژ بەر بن گەلەکان ژ وان شلە لۆما نە چالاکن. ئەڤ رەوش د ناڤا پرانیا پارتیێن کوردستانی دە ژی ھەیە.

لێ رێزدار مستەفا ئۆزچەلیک قەت رانەوەستیاییە. د ڤان دەمێن تالیدە ھەما ھەما ھەڕۆژ د بەرنامەیەکا تەلەڤزیۆنی یێن کوردستانی دە، ب کۆنفەرانس و جڤینان رەوشێ زەلال دکە. شرۆڤە و دیتنێن PWK ب زەلالی و ڤەکری ژ رایا گشتی رە دبێژە و دنڤیسینە.

ژ بۆنا کو ئەندامێن مەجلیسێ ژی ل سەر وان دیتن و نەرینێن رێزدار مستەفا ئۆزچەکلیک بنڤیسینن و رایێن خوە ژی ل سەر زێدە بکە، تەنھا ب پارڤەکرنا نڤیسێن جەنابی وی خوە کلیت دکن. ئەڤ ژی ژ بۆنا پارتیەکا چالاک نابە. واتە ب مەکینەیەکا خراب سیارە نایێ ئاژۆتن.

ئەرک و بەربرسیاریا ئەندامێن مەجلیس و کادرۆیێن پارتیێ ئەوە کو ئەو ژی ب نەرین و دیتنێن خوە ل سەر خەباتێن سەرۆکێ خوە زێدە بکن دا کو پارتی ب وان نەرین و دیتنان د ناڤا خەلکێ دە جھێ خوە بگرە. ئەم دزانین کو ب گولەک نابە بھار، لێ ئیشەراتا ھاتنا بھارێیە.

گۆتنا تالی:

د ناڤا ھەر پارتیێن سیاسی دە وەکە ھاک-پار و PWK دە کمباخی، کارنەکرن و ئەرکا خوە پێک نەئانین ھەیە. ئەڤ نە تەنێ د ناڤا وان دە وەھایە. لۆما دڤێت زووترین دەم و ژ بۆنا پارتیەکا چالاک و وێرەک ھاک-پار و PWK ھێزێن خوە، قاوەتێن خوە، مەژیێن خوە. بیر و باوەریێن خوە بکن یەک دا کو ب کەدەک وێرەک و نەتەوەیی ل باکورێ کوردستانێ خەباتێن سیاسی بێنە کرن کو ئەلتەرناتیفەکا نەتەوەیی پێک بینن.

ب ڤی حالی و ب ڤێ لاوازبوونێ ھوون باوەر بکن ئەم دێ ھەمی ب ھەڤرە وەندا بکن. ئەڤ وەنداکرن ژی دێ ببەیا تالی کو ئێدی چ سەد سال ژی نەما بکارە کوردان ئازاد بکە. ل سەر مە کوردێن باکورێ کوردستانێ فەرز و زەروورییە کو ئەم ھێزێن خوە بکن یەک. دەستپێک بلا ژ ھاک-پار و PWK دە بە، پشترە ژی پارتی، کەس و کەسایەتێن دن ژی دکارن بەشداری ناڤا ڤێ یەکتیێ ببن. لێ دڤێت ئەم ژ دەرەکێ دەستپێ بکن.

ژ بەر کو نھا باخچەلی و عەڤدللا ب ھەمی ھێزێن خوە کار دکن کو کوردان تونە بکە. دڤێت ئەم ژی ب ھەمی ھێزێن خوە کار بکن دا کو کورد ل سەر لنگێن خوە بن و بگهیژن مافێن خوە یێن رەوا…