دەرەوا مەزنا ئۆجالان: “براتیا گەلان” ب زەلالی ل رۆژئاڤا خویا بوو
ب سالانە کو عەبدوللاھ ئۆجالان هەڤۆکا “براتیا گەلان” وەکی ئالتەرناتیفەک پێشڤەروو ژ بۆ دەولەتا نەتەوەیی و نەتەوەپەرەستیا کلاسیک پێش دخە. ل سەر روویێ ئەردێ، ئەڤ سلۆگان سۆزا ژیانا وەکھەڤ، رەدکرنا زلما نەتەوەیی و ئەنتەگراسیۆنا دلخوازا گەلان ددە. لێبەلێ، ئەزموونا پراتیکییا ڤێ رامانێ، نەمازە ل سووریەیێ، ڤالاھیەک کوور د ناڤبەرا گۆتن و کرنان دە ئەشکەرە کریە.
ل سووریەیێ، پرۆژەیا کو ب ناڤێ رێڤەبەریا خوەسەرا دەمۆکراتیک و براتیا گەلان د بن ئیدۆلۆژیا ئۆجالان دە ھاتە دەستنیشان کرن، د پراتیکێ دە بوو سەدەم کو کورد ب ئاوایەکی گەلەمپەری وەرن خاپاندن و ئاڤاهیەکە بێ بناغە و خەیالی ل رۆژئاڤا کوردستانێ وەرە ئاڤاکرن.
ژ هەرکەسی زێدەتر ئۆجالان دزانە کو پرۆژەیا براتیا گەلان پرۆژەیەکە لاوازە و د ڤێ پرۆژەیێ دە ت جاری کورد نکارن مافێن خوە بدەست بخن، بەرەڤاژی گەر هات و تشتەک د دەستێن کوردان دە بە ب ڤێ پرۆژەیا سەقەت تەقەز وێ وی تشتی ژی ژ دەست بدن وەکە مە ل رۆژئاڤا کوردستانێ ب چاڤێ خوە دیتی. ژ بەر کو ت دەور و دەورانان براتیەکە راستەقینە د نێڤبەرا کورد و نەتەوەیێن دن یێن کو ئەردێ کوردان داگیرکری چێنابە، ژ دەرڤەی کوردێن کو ب ئیدۆلۆژییا سەقەتا ئۆجالان هاتنە خاپاندن چ کوردەک دن نکارە عەرەب، فارس و ترکەکی وەک برایێ خوە قەبوول بکە، ژ بەرکو ئەڤ گەلانە داگیرکەرێن کوردستانێ نە و توجاری قەبوول ناکن وەکە برا ب کوردان رە بژین، ئەو هەرتم دخوازن سەردەست بن و کورد ژی بندەستێن وان بن.
بوویەرێن داوی یێن ل سووریەیێ ئەڤ حەقیقەت ب زەلالی نیشان دا کو ڤێ پرۆژەیا ئۆجالان نە ب تەنێ پرسگرێکا کورد بەر ب چارەسەرکرنێ ڤە نەبریە بەلکو ئاستەنگیێن هەرە زێدەتر د رێیا چارەسەرکرنا پرسگرێکا کورد دە چێکرنە.
دەرەوا مەزنا ئۆجالان تام د ڤێ دەیە: ڤەگوھەراندنا تێگەھەکە خوەشک و مرۆڤی بۆ ئاموورەک ئیدەۆلۆژیک دا کو سەردەستیا سیاسی یا پارتیا خوە پێ رەوا بکە. “براتیا گەلان” دەما کو ل سەر ھلبژارتنا ئازاد، پڕەنگیا راستین و مافێ رەخنەکرنێ ئاڤا ببە، واتەدارە؛ نە دەما کو ئەو ببە پەردەیەک ژ بۆ یەکدەستکرنا دەستھلاتداریێ و دوورخستنا یێن دن. ئەزموونا سووریەیێ نیشان دایە کو بێیی هەبوونا هێزەکە لەشکەری یا راستین، ت سلۆگان، ھەتا یێن ھەری خوەشک ژی دێ ژ بلی خاپاندنێ تشتەک نەبن.
راستە کوردان ل رۆژئاڤا کوردستانێ کو پەکەکێ ژ بۆی رازیکرنا عەرەبان ناڤێ وێ گوهەراند و کرە “باکور رۆژهلاتێ سووریەیێ” د بن سەیوانا ڤێ دەرەوا مەزنا ئۆجالان خوەستن عەرەبان وەکە برایێ خوە حەساب بکن، ب وان رە سازیێن رۆژئاڤا برێڤە ببن و هێزەکە هەڤگرتی یا لەشکەری لگەل وان چێکن، لێ بەلێ تەنێ دەما عەرەب د تەنگاسیێ دە بوون خوە بێدەنگ کر و وسا نیشان دان کو براتی و دەمۆکراسیا گەلان قەبوول کریە، لێ بەلێ دەما دیتین دکارن سەردەست بن و کوردان تەپەسەر بکن، ل دژی کوردان سەکنین، ئەردێ کوردان داگیرکرن، مالێ وان تالان کر، سڤکاتی ل پیروکال، زارۆک و جوانێن کورد کرن، و ل دژی وان سەکنین بەرێ لۆلیا تڤەنگا خوە دا سینگا کوردان.
ل ترکیێ، ئیراقێ و ئیرانێ ژی هەمان رەوس دەرباس دبە، ئەڤ نەتەوەیێن داگیرکەرێن کوردستانێ ب تەنێ وێ دەمێ براتیا کوردان قەبوول دکن کو کورد بندەستێن وان بن، دەما مژار دبە مافێن کوردان یێن رەوا ئێدی وەکە گوورگێن برسی ئێریشی کوردان دکن و وان دکوژن، دەربەدەر و بێ مال حال دکن.
یێ کو دڤێت ل سەر بوویەرێن ل رۆژئاڤا قەومی وەرە رەخنەکرن و لەعنەت کرن ب تەنێ ئۆجالان نە تو کەسەک دن، ژ بەر کو ئۆجالان و پارتیا وی یا هلوەشیایی دخوازن کوردان ب هندەک هەڤۆکێن وەکە براتیا گەلان و جڤاکا دەمۆکراسی مەحکوومی بن دەستێ داگیرکرێن وان بکن، هەتا کو کورد خوە ژ ڤێ ئیدۆلۆژییا پیس و گەمار خەلاس نەکن، نکارن چ مافەکی خوە یێ نەتەوی ب دەست بخن.
