ناڤەرۆکا ھەڤدیتنا عەبدوللاھ ئۆجالان یا ل گەل کۆمیسیۆنا پارلامەنتۆیا ترکیێ ھاتە وەشاندن

پشتی دەرباسبوونا دو مەهان لسەر هەڤدیتنا د نێڤبەرا سەرۆکێ پەکەکێ عەڤدللا ئۆجالان لگەل شاندا کۆمیسیۆنا پارلامەنتۆیا ترکیێ، “کۆمیسیۆنا ھەڤگرتنا نەتەوەیی، براتی و دەمۆکراسیێ”، کۆمیسیۆنێ هەموو گرتەکێن ڤێ هەڤدیتنێ پارڤە کرن.

هەڤدیتنا د ناڤبەرا ئۆجالان و کۆمیسیۆنا پارلامانتۆیا ترکیەیێ دە د 24ێ چریا پێشین یا سالا 2025ێ دە ل گراڤا ئیمرالیێ هاتبوو ئەنجامدان، دوهـ دەرەنگیا شەڤ کۆمیسیۆنێ ناڤەرۆکا ڤێ هەڤدیتنێ ل سەر مالپەرا فەرمی یا پارلامەنتۆیا ترکیەیێ ب سەرناڤێ “گرتەکێن ھەڤدیتنا گرتیگەھا ئەولەھیا بلند یا ئیمرالیێ” پارڤە کرن.

د ڤان گرتەکان دە ئاخافتنێن پر بالکێش هەنە کو نابە کورد ب هێسانی و سادە لسەر وان رە دەرباس بن، د هەر جوملەیەکە ئۆجالان دە بێهنا ئیخانەتەکە مەزن ل کورد و کوردستانێ تێ، ئۆجالان مینا سالا 1999ێ دەما چوویە ترکیەیێ جارەکە دن دبێژە، “ئەز ژ بۆی خزمەتکرنا دەولەتا خوە ‘ترکیەیێ’ ئامادەمە”، هەر وەها دبێژە، “ئیسرایل ژ بۆ هەژمۆنا خوە یا ل ھەرێمێ ‘دەولەتبوونا کوردان’ دخوازە لێ ئەز ل دژی ڤێ یەکێ مە. ئەز د ناڤ یەکپارچەییا ئاخا سووریەیێ دە سیستەما ‘دەمۆکراسیا ھەرێمی و ‘کۆمونێ’ دپارێزم.”

د ڤێ هەڤدیتنێ دە، ئۆجالان بەحسا دەستپێکا ژیانا خوەیا سیاسی کریە و دیار کریە کو گاڤا وی یا ھەری پێشیێ یا د ناڤ سیاسەتێ دە د ناڤ کۆمەلەیا نەتەوەپەرەستێن ترکیەیێ (ئولکو ئۆجاکلار) دە بوویە و دەستنیشان کریە کو پرسا کورد پرسگرێکەکە ھەزار سالییە و ژ سێ قۆناغان پێک تێ.

ئۆجالان د دەربارێ رەوشا رۆژئاڤا ژی گۆتیە، “دڤێت ل گەل برێڤەبریا سووریەیێ و ئەحمەد شەرع دیالۆگ وەرە دانین و ھەگەر دەرفەتێ بدن من، ئەز دکارم مژارا ھەسەدێ ب ئاوایەکی “براتی” چارەسەر بکم و سووریەیێ نەخم بن باندۆرا ئیسرایلێ.”

د دەربارا بانگا دەولەت باخچەلی یا ژ بۆی “مافێ هێڤیێ” ئۆجالان دبێژە: “باخچەلی ئەڤ ئیفادە نە ژ بەر خوە دە ب کار ئانیە. ئەز نکارم د شەرت و مەرجێن تەجریدێ دە کار بکم. ئەگەر دەرفەتێن پراکتیک و تەئۆریک بێن دابینکرن و مافێ ھێڤیێ بهێت دایین ئەز ئامادەمە خزمەتا دەولەتێ بکم. ئەگەر ئەڤ دەرفەت وەرن دایین و سەرکەفتی نەبم، ئەز قەبوول دکم کو بهێم دادگەهکرن.”

دەربارێ پەکەکێ دە ژی ئۆجالان تەکەز کریە کو پشتی بانگێن وی، قەندیلێ گوھ دایە بانگەوازیا 27ێ شوباتێ و پەکەکێ “ب ئاوایەکی کریاری خوە هلوەشاندیە”.

ئۆجالان گۆتیە پێڤاژۆیا دەست ژ چەکبەردانێ ژ سەدی 70 تەمام بوویە و ھەر وھا خەمگینیا خوە ژ بۆ ئێرشا توساشێ ئانیە زمان.

ئۆجالان د داویا هەڤدیتنێ دە دیتنا خوەیا چارەسەریێ ژی وھا پێناسە دکە:

“لێگەرینا مە نە ژ بۆ دەولەتەکا جودا یان ژی فەدەراسیۆنێ یە. دەولەتا کو ئەم لێ دگەرین، کۆمارا ترکیەیێ یە. مۆدەلا ئەز پێشنیار دکم ‘کۆمارا دەمۆکراتیک’ و ‘دەمۆکراسیا ھەرێمی’یە. کوردێ بێ ترک، ترکێ بێ کورد نابە. ئەز ئێشا مالباتێن شەھیدان دزانم، ونداکرنا ھەر لەشکەرەکی ژ بۆ من تراژەدیەکە.”

تەمامیا گرتەکێن ھەڤدیتنا ل گەل ئۆجالان وھایە:

“مژار: داخویانیێن عەبدوللاھ ئۆجالان یێن د ھەڤدیتنا کو د 24/11/2025ێ دە لگەل ئەندامێن کۆمیسیۆنێ پێک ئانی دە.

عەبدوللاھ ئۆجالان:

بەری ھەر تشتی دیار کر کو پرسگرێکا کوردان پرسگرێکەکا ھەزار سالییە، 3 قۆناغێن ڤێ پرسگرێکێ ھەنە و د ڤێ چارچۆڤەیێ دە دڤێت پێڤاژۆیا کۆنژۆنکتورێ (رەوشا سیاسی و ئابووری) وەرە لبەرچاڤگرتن، دخوازە خەلەتیا مەزن یا د دیرۆکێ دە ب بەرچاڤگرتنا ئیدەۆلۆژیا برێز فەتی (یلدز) ڤەبێژە.

دیار کر کو کۆمەلەیا یەکەما کو ئەو (عەبدوللاھ ئۆجالان) ل ئەنقەرەیێ چوویێ “ئولکو ئۆجاکلار” (کۆمەلەیا نەتەوەپەرەستێن ترک) بوویە و وی ل ور دەست ب سیاسەتێ کریە.

گۆت کو پرسگرێکا کوردان ژ قادا دەولەتێ دەرباسی قادا سیاسی بوویە، ئەو دێ نھا ڤێ پرسگرێکا جدی لگەل سیاسەتمەداران نیقاش بکە و ئەو ڤێ یەکێ پر گرینگ دبینە.

دیار کر کو ئەو د سەری دە دخوازە سپاسیا برێز سەرۆککۆمار و برێز دەولەت باخچەلی بکە، ب تایبەتی برێز دەولەت باخچەلی وێرەکیەکا کو د دیرۆکا کۆمارێ دە کێم تێ دیتن نیشان دایە و ژ بەر ڤێ یەکێ سپاسدارێ وییە.

گۆت کو ئەو ل پشت ھەموو گۆتنێن خوەیە، ئەگەر شەرت و مەرج گونجاو بن، دەرفەتێن وی یێن تەئۆریک و پراکتیک ژ بۆ پێکانینا ڤێ یەکێ ئامادە نە.

دیار کر کو برێز باخچەلی (دەولەت باخچەلی) ب گۆتنێن خوە سوودەکا مەزن ل سیستەماتیکا تێکلیێن ترک-کورد یا سەد سالی کریە.

گۆت کو وان (عەبدوللاھ ئۆجالان و پەکەکە) ژ سەردەما تورگوت ئۆزال، واتە ژ سالا 1992ێ ڤە، ب دۆرێ د سەردەمێن ئەردال ئینۆنو و سولەیمان دەمیرەل دە لگەل دەولەتێ تێکلی و دیالۆگ دانینە.

دیار کر کو دەستەک د ھوندرێ دەولەتێ دە ناخوازە پرسگرێکا کوردان لگەل وان (عەبدوللاھ ئۆجالان و پەکەکێ) وەرە چارەسەرکرن و ھەر جارێ میکانیزمایا داربەیێ کەتیە دەورێ.

(ل سەر گۆتنا حوسەیین یایمان کو گۆتبوو ‘ئەم ب ھەستیاریا مالباتێن شەھیدان ھاتنە’) ئۆجالان گۆت کو ونداکرنا ھەر لەشکەرەکی ژ بۆ وی تراژەدییە، ئەو چ جاران پێ شاد نەبوویە و دڤێت ئەڤ جوان ب ڤی رەنگی نەمرن.

دیار کر کو ئەگەر ئەو ل ترکیێ و ھەرێمێ ب راستی بگھیژن چارەسەریێ و کاربن دەری ژ جھێ راست ڤەکن، دێ دەریەکی مەزنێ دەرفەتێ ڤەبە و ئەڤ دێ ھەرێمێ ژ نوو ڤە دیار بکە.

گۆت کو ئەگەر ئەو ب سەر نەکەڤن، دبە کو مەکانیزمایا داربەیێ ل دژی برێز دەولەت باخچەلی و برێز سەرۆککۆمار بخەبتە و برێز دەولەت باخچەلی ژی د ئاخافتنێن خوە دە بەحسا ڤێ یەکێ کریە.

دیار کر کو محەمەد عەلی بیراند د سالا 1988ێ دە بێیی دەستوور لگەل وی (عەبدوللاھ ئۆجالان) ھەڤپەیڤین کریە، ئۆزال تەلەفۆن کریە و گۆتیە ‘تە چ کر محەمەد عەلی، تە ئەز شەوتاندم’؛ دەما ڤەگەریایە ئەنقەرەیێ تام دەما کو ب ھەموو ھێزا خوە دخوەست ژ بۆ چارەسەرکرنا ڤێ مەسەلێ بخەبتە، 4 رۆژان پشتی وەشاندنا ڤێ ھەڤپەیڤینێ د رۆژنامەیا مللیەتێ دە سویقەست ھاتیە کرن؛ د 17ێ نیسانێ دە دەما کو ئەو دا لگەل مدوورێ قەلەمێ یێ تایبەتێ ئۆزال، کایا تۆپەری ھەڤدیتنەکێ کەت، ئۆزال ژ نشکا ڤە مریە و ئەڤ سویقەست ھاتیە ڤەشارتن، ئەو گومانێ ژ مرنا وی دکە؛ ئەگەر سەرکەفتن پێک نەیێ، ئەو دێ نە تەنێ ئێرشی برێز دەولەت باخچەلی بکن، دێ ئێرشی ھەموو مەھەپێ بکن، ئەو دزانە کو چاوا ئێرشی ئەردۆگان کرنە.

گۆت کو مخاتەبێن وی ھایدارن کو ئەو (عەبدوللاھ ئۆجالان) چاوا کرنە ‘بزنا گونەھان’، ئێرشێن کو ل دژی وی تێنە کرن ئێرشێن ل دژی ئاشتی و یاسایا براتیێ نە، ھندەک کەس ‘ئاژانێن باندۆرێ’ نە و ڤان تشتان ب زانەبوون دکن.

دیار کر کو برێز دەولەت باخچەلی گۆتیە ‘ئەگەر ئەڤ پرسگرێک نەیێ چارەسەرکرن، نە ژ ئاناتۆلیایێ و نە ژی ژ ترکیەیێ تشتەک نامینە’.

گۆت کو مستەفا کەمال (ئەتاتورک) ل چاناککالەیێ شەرەکی مەزن دایە، گۆتییە ئانزاکان ‘شەھیدێن وە شەھیدێن مە نە ژی’؛ وی خوەست کو مالباتێن شەھیدان وی (عەبدوللاھ ئۆجالان) ژی ب ڤی رەنگی پێناسە بکن، ئەو ب رێز ل مالباتێن شەھیدان دنێرە و دزانە کو ئێشا وان چ قاسی مەزنە.

دیار کر کو وی د سەردەما بۆری دە ژ سەرۆکێ ژیتەمێ رە گۆتیە ‘وە ئەڤ پرسگرێک ئانی ڤێ ئاستێ و ئاڤێت ھەمێزا من، ھەموو گونەھ نەیێن منن’؛ 4 فەرماندارێن ھێزان دیار کرنە کو ئەگەر ئەنجامەکا ئەرێنی دەرنەکەڤە دێ سزایێ بدارڤەکرنا وی وەرە پەژراندن، وی ژی (عەبدوللاھ ئۆجالان) گۆتیە ‘ژ بۆ من ژ بلی چارەسەریا دەمۆکراتیک تو چارەسەریا دن نە پێکانە’.

گۆت کو ژ سیستەماتیکا پەیمانێن نوویێن ئامەریکا و بنیامین نەتانیاھو رە ‘پەیمانێن ئیبراھیمی’ تێ گۆتن، پرۆژەیەکا وھا د دەورێ دەیە؛ پرۆژەیا شیتیێ یا ئیرانێ ھەیە، نھا ھندەکی ب پاش ڤە کشیایە لێ ئیدیعایێن وان بەردەوام دکن.

دیار کر کو پێڤاژۆیا چارەسەریێ ھەر چ قاسی ئالۆز بە و ب ئیمتیحانەکا مەزن رە روو ب روو بە ژی، ب کێمانی د ئاستا کو گھیشتنە دە ‘نە تەنێ ژ بۆ نیەتا باش، ئەو دێ دەریەکی ڤەکن کو نە 100 سالێن پێش، 1000 سالان رەنگڤە ددە’؛ ئەو دێ دەریەکی براتی و چارەسەریێ یێ 1000 سالی ڤەکن.

گۆت کو تەڤی گۆتنێن نە مەعقوول یێن د مەدیایێ دە، مەسەلەیەکا وھایا ترکیەیێ ھەیە و د رەوشەکا وسا دەیە کو نایێ بپاشخستن، ئەو بخوە ژی چارەسەریا تەکەز دخوازن.

دیار کر کو برێز (دەولەت) باخچەلی ئەڤ دەستێ خوە درێژ کریە، برێز سەرۆککۆمار ژی ل ملازگرێ ئاخافتنەک ل سەر خورتکرنا ئەنیا ناڤخوە کریە، ل سەر وێ برێز (دەولەت) باخچەلی وەکی سوودەکێ گۆتیە ‘ئەز دەستێ خوە درێژ دکم’؛ لێ رێخستنێ ل قەندیلێ دەنگێن جودا دەرخستنە، ھەتا چالاکی پێک ئانینە، ئەو ژ چالاکیا توساشێ پر خەمگین بوویە.

گۆت کو ب بیرانینا گۆتنا برێز (دەولەت) باخچەلی یا ‘ئەگەر دەرفەت وەرن دایین ئەز ئامادە مە خزمەتا دەولەتێ بکم’ و گۆتنا ‘کەرەم بکن’، ھەتا د جڤینا کۆما دەم پارتیێ دە ئاخافتنا وی بخوازە -د ناڤ دە مافێ ھێڤیێ ژی- ‘دیرۆکی’یە.

گۆت کو ئەو ل پشت گۆتنا خوەیە، ئەگەر شەرت و مەرج گونجاو بن، دەرفەتێن وی یێن تەئۆریک و پراکتیک ژ بۆ پێکانینا ڤێ یەکێ ئامادە نە.

دیار کر کو د ناڤ رێخستنێ دە ترک ژی ھەنە، سەرکێشیا وان ژی کەسەکی ب ناڤێ دوران کالکان کو ترکە دکە، د ناڤ رێخستنێ دە کۆمەکا وھایا ب ئەسلێ خوە ترک ھەر تم ھەبوویە، ژ سەری دە کەڤنەشۆپیەک وھا ھەیە؛ دەما رامانا وی گھیشتیە قەندیلێ، وان ئاگربەستەکا یەکالی راگھاندیە و ب وێ ڤە گرێدایی مانە.

دیار کر کو ئەو بەرێ خوە ددە دەکلاراسیۆنا 27ێ شوباتێ، دڤێت ئەو ڤێ یەکێ بینە بیرا مرۆڤان و ب تایبەتی دخوازە دەستنیشان بکە کو ھەر ھەڤۆک خوەدی تایبەتمەندیەکا پرۆگراماتیکە، ھەر ھەڤۆک پرۆگرامەکە (ل سەر ڤێ یەکێ فەتی یلدز بەرسڤ دایە و گۆتیە ‘ئەم پێ ھایدارن’).

گۆت کو وی د بانگا خوە دە ئانیە زمان کو پرسگرێکا کورد چاوا دکارە وەرە چارەسەرکرن، قەندیل ژی تام ل گۆری ڤێ دەکلاراسیۆنێ تەڤگەریایە و (پەکەکێ) خوە فەسخ کریە، پشتی ڤێ یەکێ د بن رێبەریا بەسێ (ھولیا ئۆران) دە چالاکیا شەوتاندنا چەکان پێک ھاتیە، د ڤێ چارچۆڤەیێ دە وێ (بەسێ) بەرپرسیاری نیشان دایە؛ ب پێکانینا ڤێ رە ژ سەدی 70ێ تشتێن کو ل سەر ملێ وی (عەبدوللاھ ئۆجالان) بوون ھاتنە کرن، پشتی ڤێ گەشەدانێ د بن رێبەریا سەبری (ئۆک) دە ئەندامێن رێخستنێ یێن ل ترکیەیێ ژ ترکیەیێ ڤەکشیانە.

دیار کر کو ئەو سالا دەرباسبوویی سەرکەفتی دبینە، د ڤێ ھەیامێ دە چ شەھید نەھاتنە دایین و چ شەر دەرنەکەتینە، ھەر وھا ب ڤی رەنگی ڤەبوونەکا سیاسی یا مەزن پێک ھاتیە، د ڤێ چارچۆڤەیێ دە پشتگریا رایا گشتی زێدە بوویە؛ باوەر دکە کو د پێڤاژۆیا پێش دە ھندەک نیشانێن پرسێ یێن د ھشێ رایا گشتی دە نە ژی دێ ژ ھۆلێ وەرن راکرن.

گۆت کو وەکی برێز دەولەت باخچەلی ژی گۆتیە، دڤێت ژ بۆ وی (عەبدوللاھ ئۆجالان) کانالێن راگھاندنێ وەرن ڤەکرن.

دیار کر کو د دەما بۆری دە سولەیمان دەمیرەل ل مێردینێ گۆتیە ‘ئەز رەئالیتەیا کورد ناس دکم’، ھەر وھا د ڤێ ھەیامێ دە ئەحمەد تورک و سڕی ساکک شاندنە جەم وی (عەبدوللاھ ئۆجالان) ل حەلەبێ، ژ وان رە گۆتیە ‘ئەم ناسنامەیا کوردان ناس بکن، ھوون ژی چەکان بەردن’؛ وێ دەمێ ئەڤ دەرفەت ھاتیە ونداکرن لێ سولەیمان دەمیرەل ژ بۆ چارەسەرکرنا ڤێ پرسگرێکێ پر خەبتیە.

گۆت کو د سالا 1997ێ دە ھەولدانەکە (نەجمەدین) ئەرباکان ژی ھەبوویە، حافز ئەسەد و عەبدولحەلیم خەدام گازی وی (عەبدوللاھ ئۆجالان) کریە و 3 نامە نیشانی وی دانە، پشتی وێ 28ێ شوباتێ پێک ھاتیە؛ نامە کورتەیا مژارێن وەکی 5 سال موافیەت، بێپاربوونا ژ مافێن سیاسی بوون لێ دەرفەت نەھاتیە دایین.

دیار کر کو لژنەیا ئەولەھیا نەتەوەیی (مەگەکە) لگەل سەبری (ئۆک) و یێن دن کەتیە تێکلیێ و د سالا 1997ێ دە ناڤێ وێ کرنە ‘تێکلیێن لگەل جڤاکێ’ لێ پشتی وێ ھاتیە ئاستەنگکرن، ئەو باوەر دکە کو موداخالەیەکا ژ دەرڤە چێبوویە.

گۆت کو ل کلیسێ فەرماندارێ ھێزێن بەژاھی ئاتیللا ئاتەش داخویانیا ‘ئەگەر دەرنەکەڤە ئەم دێ د ناڤا 2 رۆژان دە سووریەیێ داگیر بکن’ دایە، راگھاندنەکا پر خورت ھەبوویە کو ئەو پر باش دزانە ب سەر مۆسسادێ رە بوویە؛ وەکە رێیا کو عەرەفات خستنە ناڤێ، ژێ رە گۆتنە ‘یا ستۆکھۆلما باکورێ ئیراقێ، ئێدی جھێ کو تو ل ڤێ دنیایێ پێ لێ بکی نەمایە’؛ ژ بۆ کو ڤێ یەکێ پووچ بکە دەما ل باکورێ ئیراقێ ل بەندێ بوو، ب رەنگەکی بلەز ژ ئاتینایێ دەرکەتیە، ل ور بەرپرسێ گشتی یێ ئیستیخباراتا یەونانێ ستاڤراکس گۆتیە ‘ژ بلی ئۆسلۆیێ تو نکاری ژ ڤر دەرکەڤی، ئەم دێ نەھێلن تو ھەری چ دەرێ، ھەتا وەلاتێ خوە ژی’؛ ئەو (عەبدوللاھ ئۆجالان) د ناڤ شاشبوونێ دە مایە، ب رەنگەکی کو قەت د حەسابێ دە نەبوو چوویە مۆسکۆیێ، کەسەکی جھوو ب ناڤێ ژرنۆڤسک (ڤلادیمیر) ئەو پێشوازی کریە، گۆتنە ‘ئەم دکارین تە د مالەکێ دە ڤەشێرن ژ بلی ڤێ ت دەرفەتەک نینە’؛ وی ژی (عەبدوللاھ ئۆجالان) گۆتیە ‘ئەڤ پارتیەکە فەرمییە، ئەو دێ چاوا من ل مۆسکۆیێ ڤەشێرن’ و ئاقلێ وی ئەڤ تشت نەگرتیە، پشتی وێ پەیاما ‘ل سەر روویێ دنیایێ ژ بلی مۆئسادێ چ جھێ تەیێ ستارگەھێ نین ئە’ ھاتیە دایین.

دیار کر کو ھەتا دوشانبەیێ ھاتیە برن و د ھەوایا سار دە 3-4 فرمژمێران ھاتیە سەکناندن، ئاقلێ مرۆڤی ناگرە کو مۆسکۆ یا سۆسیالیست-کۆمونیست چاوا ھاتیە ڤێ رەوشێ؛ پشت رە چوویە رۆمایێ، ڤێ جارێ ژی گۆتنە ‘جا و مۆسساد چڤیکێ نافرۆشن’؛ دیسا ئاتینایێ جەرباندنە و ڤێ جارێ ل بالافرگەھا مینسکێ گۆتنە ‘تو دکاری وەکی بێوەلات بمینی’؛ گەلۆ تەڤگەرەکا وھا نزم دبە، پشت رە برنە نارۆبیێ و ل ور چیرۆک ب تەمامی ژ کۆنترۆلا وان دەرکەتیە، بالیۆزێ کو ئەو باوەر دکە ئاژانەکی ئینگلیزە دەمانچەیەک دایە وی، گۆتنە تەنێ پاراستنا وی ئەوە و دڤێت ل جەم وی بە؛ پشت رە ژیتەمێ ژ وی (عەبدوللاھ ئۆجالان) رە گۆتیە ‘ئەگەر تە ئەو چەک ب کار ئانیبایە ئەم دا تە تەقەز ل ور کوژین؛ گۆت کو ئەو ڤان تشتان ژ بەر کو برێز باخچەلی (دەولەت باخچەلی) ژ نێزیک ڤە ئەلاقەدار دکن ڤەدبێژە.

گۆت کو ئەگەر ئەو نەبە پارچەیەک ژ چارەسەریێ، شەرێ ترک و کورد یێ 100 سالی نەچارە و ئەڤ پر گرینگە.

دیار کر کو ‘ترکێ بێ کورد، کوردێ بێ ترک’ نابە، برێز (دەولەت) باخچەلی پر ب ڤێ ڤە گرێدایییە، ئەڤ ئیدەۆلۆژیا کۆمارێیە، ب پۆزیتیڤیزمێ رە تێکلدارە، تەسفیەیا کوردان ھەوجە دکە، ترکمەن ژی د ناڤ دە نە، ئەو ژی ھاتنە حەلاندن؛ گۆت کو ئەو ڤان تشتان ڤەدبێژە دا کو دیار بکە ‘برین چاوا چێبوون، چ بوو سەدەما سەرھلدانێ’.

ژ بەر ڤێ یەکێ گۆت کو ئەڤ ئیدەۆلۆژی ل ترکیەیێ ھندەکی ب باندۆرە، (مخاتەبێن وی) ڤێ پر باش دزانن، سەدەما ھەر جورە سەرھلدانێ ژی ئەڤە.

گۆت کو دەما دۆرا سەرھلدانا شێخ سەعید ھات، ئیدەۆلۆژیا شەرێ رزگاریێ ب تێگھیشتنا ئومەتا ئیسلامی پێک ھات، پشت رە دەما ژ ڤێ تێگھیشتنێ دوور کەتن ئەڤ بوو سەدەما بەرتەکان، ئەو بەرتەک ژی بوو سەدەما سەرھلدانێ (فەتی یلدز ل ڤر گۆتیە: ‘ژ ھەموویان رە سەرھلدان تێ گۆتن لێ سەرھلدان نینن،’ و دیار کریە کو پرانیا وان تەڤگەرێن تەدھیشێ نە).

دیار کر کو ناڤێ سەرھلدانێن کوردان سەرھلدانا کوردبوونێیە، یا وی ژی ب راستی سەرھلدانەکە؛ ھەر چ قاسی ژێ رە ‘شەرێ رزگاریێ یێ مۆدەرن، گەریلا’ گۆتبن ژی، ئەڤ ژ سەرھلدانەکا کوردی وێدەتر نەچوویە و ئەڤ نەھاتیە دەرباسکرن، دەست ب رەوشەکا تراژدیک کریە؛ د سالا 1993یێ دە خوەستیە ئەنجام بگرە، ئۆزال ب رێیا تالەبانی ژ بۆ وان پەیام شاندیە.

ئۆزال ژ وان رە گۆتیە ‘ھەر تشتێ کو تە کریە نە خەلەتە، تە د ناسکرنا ناسنامەیا کوردان دە رۆلا خوە لیست، ھەکە تو شەرێ چەکداری بدۆمینی دێ ھەموو ھەولدانێن تە بادلھەوا بچن’؛ وی ژی فکرییە لێ دەرەنگ مایە، وان حەق ھەبوویە، وێ دەمێ ئەو ‘خام’ (نەگھشتی/خامە) بوویە، د کێلیەکا دیرۆکی دە ئۆزال مریە.

دیار کر کو شاھدیا وان (ئەندامێن کۆمیسیۆنێ) گرینگ دبینە، ئەو شاھدێن زانستی نە، دڤێت بێژن ‘زانست ل دەرڤە ڤێ دبێژە’، ساپتاندن (شێوراندن/بەرەداییکرن) پر ترسناکن.

گۆت کو د نامەیەکا ژ گرتیگەھێ ھاتی دە وھا ھاتیە گۆتن: ‘پێڤاژۆیا ھلوەشینا ئیمپاراتۆریا عۆسمانی لگەل دەستپێکرنا سەرھلدانێن کوردان بوویە’؛ عەبدولحەمید تەدبیر گرتیە و مەکتەبێن حەمیدیە دانە ئاڤاکرن، ئەڤ تەدبیر پر جدی بوویە؛ عەبدولحەمید فێم کریە کو سەرھلدانێن کوردان دبنە سەدەما رووخاندنا عۆسمانیان.

دیار کر کو سۆلتان عەبدولمەجید ھەول دایە لگەل میرێن کوردان چارەسەریەکا دۆستانە ب پێش بخە، د وێ دەمێ دە چاریا رووس و فرانسا ژ بۆ ل سووریەیێ دەولەتەکا سوریانی و ل باکور (رۆژھلاتا ئاناتۆلیایێ) دەولەتەکا ئەرمەنی ئاڤا بکن خەبتینە.

گۆت کو دەرکەتنێن برێز باخچەلی (برێز دەولەت باخچەلی)یێن ل سەر قودس و سەلاحەدینێ ئەیووبی پر گرینگ دبینە، باوەر دکە کو د فەتحکرنا قودسێ یا سەلاحەدینێ ئەیووبی دە دابینکرنا یەکیتیا ترک و کورد پر ب باندۆر بوویە.

دیار کر کو داپیرا وی ب ئەسلێ خوە ترکمەنە، سلتانێ سەلچووقیان سانجار ژ بۆ خوە پایتەختا بەرێ یا دەولەتا میدی، ھەمەدان ھلبژارتیە؛ د ڤێ جۆگرافیایێ دە فێم کریە کو ‘کورد بێ ترک، ترک بێ کورد ناژین’.

گۆت کو د سەرکەفتنا سۆلتان ئالپارسلان یا ل مەلازگرێ دە پەیمانا لگەل میرگەها مەروانیان یا ل فارقینێ و میرگەها کورد یا ل خەلاتێ و پشتگریا وان گرینگ بوویە، ئەڤ ژی د پرتووکا کو عۆسمان توران نڤیساندیە دە خوەندیە.

دیار کر کو مەلازگر سەرکەفتنەکە کو کوردان ژی ب بەرفرەھی تێ دە شەر کریە، تێ گۆتن کو دەریێ ئاناتۆلیایێ ژ ترکان رە ڤەبوویە لێ ھەتا فراتێ، روحا، مەلەتیێ فرەھ بوویە و ڤێ یەکێ ھشتیە کو کورد نەفەسێ بستینن.

گۆت کو ئەتاتورک گۆتییە بەگێ عەشیرێ یێ ل بەیازتێ ‘ھەکە ئەم د ڤێ شەری دە لگەل ھەڤ شەری بکین نە کوردستان دمینە نە ترکیە، ھەر دو ژی وندا دکن’؛ ژ خەینی یەکیتیێ چ رێیا رزگاریێ نینە، پشت رە شەر ھاتیە قەزەنجکرن و کەدا کوردان نایێ پاشگوھکرن.

دیار کر کو رۆژێن دەرباسبوویی ل ھەولێرێ کۆنگرەیەک و ل ئالمانیایێ کۆنگرەیا جھوو-کورد ھاتیە کرن، ئەڤ پر گرینگن، گەلۆ مخاتەبێن وی ھای ژ ڤێ ھەنە (ف. یلدز گۆتیە کو دزانە).

گۆت کو ئەو ڤێ ڤەدبێژە دا کو ھێزا مۆئسادێ فێم بکن، د بۆری دە گۆتنە بالەفرا کو ئەو تێ دەیە ل چ باژارێن ئەورۆپایێ یێن ناتۆیێ نا داینە، کۆنترۆلەکا بێباوەر ھەبوویە؛ ‘یا گرینگ ئەڤە کو ئەو ب دەستێ ترکەکی ھاتبە لێدان، ب ڤی رەنگی رێخستن دێ بکەڤە بن فەرمانا وان، سویقەست و کوشتنێن بێباوەر مینا یا ل غەزەیێ دێ دەست پێ بکرا؛ وێ دەمێ یێن کو خوە شەوتاندن ھەبوون، قیامەت رابوو، ئیرۆ ژی دڤێت موخاتەبێن وی ڤێ ڤەبێژن، ئیرۆ ھین ژی گرینگیا خوە دپارێزە، دیرۆک وھا پێش کەتیە، وی پێنگاڤێن بێتەرەدووت ئاڤێتنە.

گۆت کو ژ بۆ شیرۆڤەکرنا ئیرۆ دڤێت ئەڤ ئاگاھی وەرن زانین، ژ بەر ڤێ یەکێ ئەشکەرە کریە.

دیار کر کو ئەو دێ (مخاتەبێن وی) قەدەرا رۆژھلاتا ناڤین بگوھەرینن، ئەو دێ گۆگێ (تۆپێ) باڤێژە وان.

گۆت کو وی سەدەما سەرھلدانا پەکەکێ ئانیە زمان، چما وی داوی لێ ئانیە و دخوازە مەکانیزمایا ریسکا مەزن ئەشکەرە بکە، دبە کو ھەر تشت نە وەکی کو ئەو دزانن بە، دڤێت ئەو وی خەلەت فێم نەکن.

دیار کر کو (برێز دەولەت) باخچەلی دەولەتێ ب قاسی وی دزانە، دبە کو ئەو (ئۆجالان) مەزن بکە لێ دڤێت ھەر ئیحتیمال وەرە حەسباندن، ئەزموونا وی پر مەزنە.

(تێ نرخاندن کو ئەو کەسێن دخوازن پێڤاژۆیێ خەرا بکن پر ب ھێز دبینە.)

گۆت کو ئەو مەھەپێ پر باش ناس دکە، ھەکە مەھەپە باخچەلی (برێز دەولەت باخچەلی) راست نەدیتا دێ ل پەی وی نەسەکنیا و پشتگری نەدانا وی، ئەو ڤێ دزانە.

دیار کر کو بریارا داوی یا جەهەپێ (د کۆمیسیۆنا مەجلیسێ دە) پر بالدارە لێ ئەو ڤێ ژ بۆ دەرڤەییکرنا جەهەپێ نابێژە.

گۆت کو نھا ل سووریەیێ تشتێن دن دقەومن، ئەو (عەبدوللاھ ئۆجالان) سووریەیێ پر باش ناس دکە ژ بەر کو 20 سالان ل ور ژیایە.

دیار کر کو ئەندامێن کۆمیسیۆنا مەجلیسێ د ھندەک مژاران دە ژ وی (عەبدوللاھ ئۆجالان) پێشدەترن لێ د ھندەک مژاران دە ئەو (عەبدوللاھ ئۆجالان) ژ وان پێشدەترە.

گۆت کو ئەو دێ بەحسا پێنگاڤێن گرینگتر یێن ژ بۆ جڤاکێ بکە، د رەوشا ئاسایی دە باوەر دکە کو دڤێت پەکەکە د سالا 1993یێ دە هاتبا هلوەشاندن، تێکلیا ترک-کورد تێکلیەکا سیمبیۆتیکە، د ڤێ چارچۆڤەیێ دە میناکا زیا گۆکالپ نە میناکەکە بێسەدەمە.

دیار کر کو ترکتیا ئاناتۆلیایێ ب کوردبوونێ ڤە، کوردبوونا مەزۆپۆتامیایێ ژی ب ئاناتۆلیایێ ڤە گرێدایییە.

گۆت کو دڤێت نە تەنێ پەکەکە دەست ژ چەکان بەردە لێ ب زھنی ژی (دژمناتی) ب داوی ببە، د ناڤبەرا ھەر دو نەتەوەیان دە تێکلیا براتیێ ھەیە، د ناڤبەرا وان دە سەرھلدان، شەر و پەڤچوون چێبوویە (ل سەر ڤێ یەکێ ف. یلدز؛ ‘د دەما کو نووچەیێن شەھیدان دھاتن دە ژی ت کەس نەچوویە جامێ جیرانەکی خوەیێ کورد نەشکاندیە، تەڤی ڤان ھەموو بوویەران چ جاران دژمناتیا کورد و ترک چێنەبوویە’ ئانیە زمان).

دیار کر کو (ترک و کورد) ھەزار سالن ب ھەڤ رە دژین، ترکمەنێن کاراکەچیلی یێن ل رحایێ ژ وی کوردترن، گەرمیانۆگلاری ژی د ئەسلێ خوە دە کورد بوون لێ لگەل دەمێ بوونە ترک، دڤێت ئەڤ راستیا دیرۆکی نەیێ پاشگوھکرن، دڤێت ھەر دو ناسنامە ژی رێزێ ل ھەڤ بگرن، ھەولدانێن تونەکرنا ھەڤ خەفکەکە.

گۆت کو وی رامانا سۆسیالیزما رییال ژ سالا 1995ێ ڤە تەرک کریە، ڤەگوھەرینا زھنی پێڤاژۆیەکا ب ئێشە، ئەو پێڤاژۆ ھاتیە بەردان و دڤێت مرۆڤ ب زھنی دەست ژ چەکان بەردە، د پراکتیکێ دە دێ وەخت بگرە، دڤێت ئەو ئەندامێن رێخستنێ ئامادە بکە، دوران کالکان ژ وی (عەبدوللاھ ئۆجالان) بێتر دبێژە ‘ئەمێ چ جاران چەکان ب کار نەینن’.

دیار کر کو مەسەلا سووریەیێ ب قاسی یا ترکیەیێ گرینگە، لگەل مالباتا ئەسەد گەلەک تێکلیێن وی ھەبوونە، ژ خوە ب پاراستن و پشتگریا وان یا نێزیک ژیایە.

گۆت کو ھەسەدە ب پشتگریا ئامەریکا و ئیسرایلێ خوەدی ھێزەکا چەکداری یا ھەری کێم 100 ھەزار کەسییە و ژ یا کو تێ زانین بێتر بەلاڤ بوویە، ھەرێمێن دن ژی دکارن د ناڤ دە وەرن حەسباندن؛ بەلگەیێن کۆنگرەیێ نەگھیشتنە وی لێ واتەیا کۆنگرەیا ل ئەورۆپایێ (کورد-جھوو) و یا ل ھەولێرێ (6ەمین فۆروما ئەولەھیێ یا رۆژھلاتا ناڤین) ئەڤە کو ‘دەما ئەم ل ڤر (ئیمرالی) بەر ب چارەسەریێ ڤە دچین، ئەو ژی ل ور بەر ب چارەسەریێ ڤە دچن’.

دیار کر کو فەرھاد عەبدی شاھین (مەزلووم عەبدی) یەک ژ کەسێن ھەری نێزیکی وییە و ب وی ڤە گرێدایییە.

گۆت کو جڤینا ل ھەولێرێ و کۆنگرەیا ل ئەورۆپایێ د بن بانێ ئالمانان دە ھاتیە کرن، دبێژن ‘تام دەما کو کورد گھیشتنە ئاستا ئاڤاکرنا دەولەتێ، ئاستەنگیا ھەری مەزن نھا ئاپۆ یە’؛ تشتێ کو ئەو (عەبدوللاھ ئۆجالان) وەکی رێباز پێشنیار دکە جڤاکا دەمۆکراتیکە.

دیار کر کو ئەو ژ بۆ جڤاکا دەمۆکراتیک و ئەو ژی ژ بۆ دەولەتبوونا کورد شەر دکن.

گۆت کو ژ بۆ ئیسرایلێ کورد پر پێویستن ژ بەر کو تێکچوونا ھەڤسەنگیێن رۆژھلاتا ناڤین ب جیۆپۆلیتیکا کوردان ڤە گرێدایییە، بێیی جیۆپۆلیتیکا کورد ئیسرایل نکارە هەژمۆنا خوە یا ل رۆژھلاتا ناڤین پێک بینە.

دیار کر کو ئەو (عەبدوللاھ ئۆجالان) کۆمارا ترکیەیێ وەکی پرۆتۆ-ئیسرایل، دەولەتبوونا کورد ژی وەکی پۆست-ئیسرایل دبینە؛ چاوا کو بەرێ ژ بۆ ئاڤاکرنا ئیسرایلێ کۆمار پیدڤی بوو، نھا ژی ژ بۆ ھەگەمۆنیا ل رۆژھلاتا ناڤین ژ بۆ ئیسرایلێ دەولەتبوونا کوردان پیدڤیە، نەخوە نکارە ل سەر پیان بمینە و هەژمۆنا خوە ئاڤا بکە.

گۆت کو ل گۆری ئاگاھیێن داوی وەرگرتنە، ‘پرۆپاگاندایەکا بەرفرەھ ھەیە کو دبێژن شانسێ وە یێ دەولەتبوونێ ژ ئالیێ ئاپۆ ڤە تێ ئاستەنگکرن؛ ئەڤ تەسپیتەکا پر گرینگە.

دیار کر کو ئەو دێ ژ بۆ سەرنەکەفتنا وان ھەر تشتی بکن لێ ئاڤانتاژەکا وان ھەیە؛ گرانیا وی د ناڤ تەڤگەرا کورد دە ھەیە، گرانیا برێز (دەولەت) باخچەلی د ناڤ نەتەوەپەرەستان دە چ بە، یا وی ژی د ناڤ تەڤگەرا کورد دە وسایە، ئەڤ ژ بۆ ئیران، ئیراق و سووریەیێ ژی دەرباسدارە.

گۆت کو نە پەیمانا ئیبراھیمی یا کو ئیسرایل پێشنیار دکە و نە ژی پرۆژەیا شیتیێ یا کو ئیران پێشنیار دکە ژ بۆ بەرژەوەندیا وەلاتێ مە نە گونجاون، ل شوونا ڤێ ئەنتەگراسیۆنا دەمۆکراتیک گرینگە.

دیار کر کو دڤێت بالێ بکشینن سەر پێکھاتەیا کورد یا دەمۆکراتیک، ئەو نابێژە دەولەت؛ مخاتەبێ وی چ قاسی نەتەوەپەرەستیا دەمۆکراتیک بە، یا وی ژی ئەو قاسی جڤاکپارێزیا دەمۆکراتیکە.

گۆت کو ئەو بەحسا پارچەیەکی لگەل دەولەتێ تێکلدار ناکە، برێز (دەولەت) باخچەلی ڤێ پر باش دزانە (ل سەر ڤێ یەکێ فەتی یلدز گۆتیە: ‘وی ئەشکەرە کریە کو دەولەتبوون نینە، ئاڤاھیەکە فەدەراتیڤ نینە، ئۆتۆنۆمی نینە،’ و عەبدوللاھ ئۆجالان ژی ئەڤ یەک پەژراندیە).

وەکە ئەنجام، گۆت کو دەولەتا کو ئەو لێ دگەرن کۆمارا ترکیەیێ یە، وی ئەڤ ب زەلالی گۆتیە؛ کورد دێ لگەل ڤێ دەولەتێ ل رۆژھلاتا ناڤین جھ بگرن، ئەو دێ خوە ب رەنگەکی دەمۆکراتیک ئۆرگانیزە بکن، ئەلەقەیا وێ لگەل ئۆتۆنۆمیا فەدەرال نینە، ئەڤ نە ئیجادا وییە، ئەڤ سۆسیالیزما راستە، وی ب ڤی رەنگی ژ چەپگران رە گۆتیە؛ یا کو سۆسیالیزما 200 سالی رووخاندیە تێگھیشتنا وان یا سۆسیالیزمێ یە.

وەکە ئەنجام، گۆت کو جڤاکا دەمۆکراتیک و کۆمار دڤێت ب ھەڤ رە ئەنتەگرە ببن.

دیار کر کو کۆکا پەیڤا ‘کۆمون’ ب کوردییە، تێ واتەیا جڤاک، کۆم بوون؛ د سەردەما ناڤین دە شارەداری بوویە، شارەداریبوونا گەل، شیرکەتبوونا گەل، دەمۆکراسیا ھەرێمییە؛ وی ئەڤ ژ بۆ ترکیەیێ ژی پێشنیار کریە.

گۆت کو تشتێ ژ بۆ ترکیەیێ دخوازە، ژ بۆ سووریەیێ ژی دخوازە، ئەڤ دەمۆکراسیا ھەرێمی و کۆمون (شارەداریا دەمۆکراتیک)ە؛ ئەو ھەر رۆژ ل سەر ڤێ مژارێ دفکرە، د ڤێ چارچۆڤەیێ دە دکارە لگەل وان (ھەسەدێ) دیالۆگێ دەینە، باوەر دکە کو ئەو دێ گوھداریا وی (عەبدوللاھ ئۆجالان) بکن لێ د ڤێ واتەیێ دە ئەو دێ یەکالی تەڤنەگەرن، دڤێت ئەحمەد شەرع ژی مینا ھەسەدێ ژ بۆ سووریەیا دەمۆکراتیک پێنگاڤێن پۆزەتیڤ باڤێژە.

دیار کر کو ئەو ڤالا بەحسا دیرۆکێ ناکە، ل سووریەیێ نەتەوەپەرەستیەکا عەرەبی یا پر خورت ھەیە، ل ور ترکمەن ژی ھەنە، ئەو دێ (ھەسەدێ) مینا کوردان مافێن وان ژی بپارێزن.

ژ بەر ئەردھەژا د 6ێ شوباتێ دە چێبوویە سەرساخی خوەست، گۆت کو ئەو دخوازە خەباتا کو ئەو دێ بکن ژ بۆ بیرانینا کەسێن د ڤێ ئەردھەژێ دە ژیانا خوە ژ دەست دانە بکن.

ل سەر مژارا سووریەیێ (ف. یلدز؛ گۆتیە کو ھەسەدێ د 10ێ ئادارێ دە پەیمانەک چێکریە) 8 خالێن وێ پەیمانێ ھەنە، وان ئەساس دگرن (حوسەین یایمان؛ دیار کریە کو ئەو [عەبدوللاھ ئۆجالان] لیدەرێ وێ رێخستنێ (ھەسەدێ)یە، ھەر کەس د کۆمیسیۆنا مەجلسێ و رایا گشتی دە مەسەلا سووریەیێ تینە زمان، گەلێ ترک د سەری دە دخوازە پێنگاڤێن شێنبەر یێن ژ بۆ بەردانا چەکان ل سووریەیێ و رادەستکرنا زارۆکێن دایکێن دیاربەکرێ ژ مالباتێن وان رە ببینە)، گۆت کو ژ بۆ ڤەگەرا زارۆکێن دایکێن دیاربەکرێ بۆ مالباتێن وان کۆمیتەیەک ھاتیە ئاڤاکرن (حوسەین یایمان؛ دیار کریە کو براتیا دیرۆکی یا د سەری دە گۆتیە پر گرینگە، ت کەسی ئیترازەک ل سەر ڤێ نینە، ئێدی ئەو دکارن میکانیزمایا داربەیێ بشکینن، برێز سەرۆککۆمار و برێز دەولەت باخچەلی د ڤێ مژارێ دە ب بریارن، ڤێ جارێ ئەو دکارن ب سەر بکەڤن)، گۆت کو دڤێت د مژارا میکانیزمایا داربەیێ دە مرۆڤ بالدار بە، ناخوە ئەڤ میکانیزما دکارە مینا بولدۆزەرەکێ د سەر پێڤاژۆیێ رە دەرباس ببە.

پێشنیارا وی ژ بۆ سووریەیێ دەمۆکراسیا ھەرێمییە، گۆت کو ئەساسا ئاڤاکرنا (ئاک پارتیێ) شارەدارییە، کێماسیێن قانوونێ ھەنە و ئەو دخوازە ڤێ قانوونێ ل ھەموو باژاران بەلاڤ بکە؛ د دەمۆکراسیا ھەرێمی یا دەمۆکراسیا ئاتینایێ دە ژ ھەر ھەرێمێ نوونەرەک تێ ھلبژارتن و ئەو وێ ھەرێمێ تەمسیل دکە، ئەڤ ھەرێمیبوون و دەمۆکراسییە؛ باوەر دکە کو ژ بۆ سووریەیێ نە ل سەر ئەساسا مەزھەبی و نە ژی ل سەر ئەساسا ئەتنیکی، دەمۆکراسیەکا خورتکری یا د چارچۆڤەیا ھەرێمی دە پێدڤییە، پرسگرێکا بنگەھین ئەڤە کو ناڤەرۆکا ڤێ تێگەھێ دێ چاوا وەرە داگرتن و چاوا د دەستوورا بنگەھین دە وەرە بجھکرن.

گۆت کو ژ بۆ دەولەتەکێ ھێزێن ئونیتەر یێن ناڤەندی چ قاسی پێدڤی بن، دەمۆکراسیا ھەرێمی ژی ئەو قاسی پێدڤییە، یەک بێی یا دن نابە (ل سەر ڤێ یەکێ ف. یلدز پرس کریە کو گەلۆ د دەمۆکراسیێن ھەرێمی یێن ل سووریەیێ دە دێ ھێزەکا پاراستنێ ھەبە یان نا)، گۆت کو د چارچۆڤەیا ئاساییشێ دە دێ ھێز ھەبن، دڤێت ل سووریەیێ دو ھێز بهێن حەلاندن، ل سووریەیێ نەتەوەپەرەستیا عەرەبی خورتە، تشتێن کو مالباتا ئەسەد ل سووریەیێ کرینە ل بەر چاڤانن، ھەکە شەرتێن دەمۆکراتیک نەیێن دابینکرن دبە کو ئەحمەد شەرع ژی سبە ڤەگوھەرە دیکتاتۆرەکی.

دیار کر کو ترکمەن ژ کوردان پتر د رەوشەکا خرابتر دە نە، کۆمەلەیەکا کو خوە ئیفادە بکن، کۆمونا ترکمەنان نینە؛ گەلۆ مخاتەبێن وی کۆمونێ فێم دکن یان نا.

گۆت کو کۆمون جڤاکەکە، تێ واتەیا جڤاکا سڤیل و دڤێت ھەبە.

دیار کر کو دبە یەک-دو مالبات دەرکەڤن و ھەموو رانتا حەلەبێ ب خوە ڤە گرێ بدن، دڤێت ژ بۆ ڤێ تەدبیر وەرن گرتن، ئەڤ ژ بۆ ھەموو گەلان دەرباسدارە؛ ترکمەنان ھەزار سالن ل ور ھەولدانێن مەزن دانە، بوویەرا وان یا وەکی جڤاکا سڤیل ل گۆری خوەزایا کارە؛ چەرکەس و ئەرمەنی ژی ھەنە، دڤێت ئەو ژی خوە بکن جڤاکەکا سڤیل یا مۆدەرن.

ھەکە ئەو سووریەیێ بێ جڤاکا سڤیل یان ژی بێ دەمۆکراسیا ھەرێمی بھێلن، گۆت کو دێ حافز ئەسەدەکی نوو دەرکەڤە؛ ژ بۆ پێشی ل ڤێ بگرە ئەو دێ ھێزا خوە ب کار بینە، د پراکتیکێ دە ژی دێ ھەر تشتێ ژ دەستێ وی تێ بکە.

دیار کر کو ئیسرایل سووریەیەکا ل گۆری چاندا خوە دخوازە، ئەو نکارن سووریەیێ ب تەمامی د بن کۆنترۆلا ئیسرایلێ دە بھێلن، ئەڤ خەتەرناکە؛ وی نەگۆتیە ‘ئەم لگەل ئیسرایلێ شەری بکن’ لێ سۆز دایە کو ئەو دێ ب ھۆستایی، ب براتی و ھێدی ھێدی (عەبدوللاھ ئۆجالان) حەل بکە؛ گۆت کو ب بانگەکێ نابە، تێکلیەکا خورت پێدڤی دکە و بێیی دیالۆگێ ئەوێ چاوا بکە.

دیار کر کو ئەو مەھەپێ وەکی نەتەوەپەرەستێ دەمۆکراتیک دنرخینە و ژ بۆ ترکیەیێ پر پێویستە، دڤێت ئەڤ تەجروبە تەقەز ب روحەکی ئیتیفاقێ وەرە پارڤەکرن و نێرینا دژمناھیێ یا کەڤن وەرە دەرباسکرن؛ گۆت کو نە پەڤچوون، ئەو مەجبوورن ئیتیفاقێ ئاڤا بکن، ھشەکی کو ژ ھەموو پارتیان وێدەترە ھەیە.

گۆت کو رامانا ‘دڤێت ئەز پێشینیا دەولەتێ ژ پارتیا خوە پێشتر ببینم’ ژ بۆ پارتیێن دن ژی ھەوجەیە.

دیار کر کو یا وان ل ڤر کۆم دکە و نێزیکی ھەڤ دکە عاقلێ دەولەتێیە، ھەکە جەهەپە ژی (د ھەڤدیتنا کۆمیسیۆنێ دە) ھەبوویا دا باش بیت.

گۆت کو ھەکە ئەو ب ھەڤ رە بخەبتن، ئیران ژی دێ مەجبووری تەڤلی ئەنتەگراسیۆنا ب ناڤەندیا ترکیەیێ یا ل سووریە و ئیراقێ ببە؛ ل ور ئازەری ھەنە و ب کێمانی ب قاسی کوردان گرینگن، ب تەڤلیبوونا وان یا د ئەنتەگراسیۆنا دەمۆکراتیک دە ئەڤە دێ ببە یەکیتیا رۆژھلاتا ناڤین، ئەڤ دێ ب ئەنتەگراسیۆنا دەمۆکراتیک رە پێک وەرە.

دیار کر کو ل ترکیەیێ دێ کۆمارا دەمۆکراتیک، ل رۆژھلاتا ناڤین ژی دێ رۆژھلاتا ناڤین یا دەمۆکراتیک ھەبە.

گۆت کو دڤێت بێیی لەزێ ب ھەڤ رە بخەبتن، ل سووریەیێ ئەو ل دژی دەولەتا یەکگرتی تشتەکی نابێژە لێ دڤێت چ جاران بێ دەمۆکراسیا ھەرێمی و بێ جڤاکا سڤیل نەبە، دڤێت نەبە قوربانا دیکتاتۆریەکا نوو.

(ل سەر پرسا حوسەین یایمان یا ‘چاڤکانیێن پەترۆلێ و دەریێن سینۆر دێ چ ببن’) گۆت کو مۆدەلەکی پارڤەکرنێ دکارە وەرە پێشخستن، تشتێن ژ بۆ سووریەیێ پێشنیار دکن دێ ژ بۆ ئیرانێ ژی نیقاش بکن.

دیار کر کو ئەو ترکیەیەکا مەزن و یا کو پرسگرێکێن خوە چارەسەر کریە دخوازن؛ نە تەنێ تەرکاندنا چەکان، وان شۆپێن د سەرێ خوە دە ژی ژێ برنە و یا ھەری گرینگ ژی دێ د ھەیاما ھەری نێزیک دە ژ ھەموو دین، گەل و چاندێن ل رۆژھلاتا ناڤین رە مۆدەلەکا ھەڤکاریێ پێشنیار بکن.

گۆت کو بەری ڤێ چ قاس گۆتنێن نیگەتیڤ ھەبوون، ژ نھا و پێ ڤە دڤێت گۆتن ب رەنگەکی پۆزەتیڤ پێش بکەڤن؛ ژ بۆ ڤێ ژی دێ کۆمیسیۆن دەریەکی دیرۆکی ڤەکە، دێ راپۆر ئامادە بکن و پێشکێشی مەجلسێ بکن؛ گۆت کو وان بەحسا ئالیێ حقووقی نەکریە، ئەڤ د بن بەرپرسیاریا وان دەیە لێ ژ بۆ پێکانینا گۆتنێن مخاتەبێن وی د پراکتیکێ دە، دڤێت ئازادیا راگھاندنێ د سەری دە بە.

دیار کر کو پشتی پێنگاڤێن فەسخکرنا پەکەکێ و بێچەککرنێ، ئەو دێ دیسا پێنگاڤێن پۆزەتیڤ باڤێژە؛ ژ بەر ڤێ یەکێ دڤێت قانوونا کو کۆمیسیۆن دەرخە قانوونەکا تایبەت ژ بۆ ڤێ مژارێ بە.

گۆت کو دڤێت رەوشا حقووقی یا ھەموو کەسێن لگەل پەکەکێ تێکلدارن، ژ یێ ھەری ژۆر ھەتا یێ ھەری ژێر وەرە زەلالکرن؛ پێشنیارا ‘پرەنسیبا ھێڤیێ’ یا برێز (دەولەت) باخچەلی دڤێت وەرە نرخاندن، ب ڤی رەنگی دێ ژ عەفوویا گشتی وەرە خلاسکرن، عەفوویا گشتی ژ بۆ ترکیەیێ نە گونجاوە.

رێز و سلاڤێن خوە ژ بۆ کۆمیسیۆنێ شاندن، گۆت کو ‘بریار د دەستھلاتداریا وان دەیە، ژ بەر ڤێ یەکێ دڤێت مژار ببە مەجلسێ’.

دیار کر کو باندۆرا ئیرانێ ل سەر پەکەکێ ب کێمانی ب قاسی یا ئیسرایلێ ھەیە، ئەو ب خوە بەشداری ئایدۆلۆژیا ئیرانێ نابە.

گۆت کو ھەر دو (ئیران و ئیسرایل) د ناڤ تێکلیێن دەولەتێ دە نە، ژ بۆ وی دێ بێژن ئەم دا دەولەتێ راگەهینین، ئاپۆ ئاستەنگ کر’؛ گۆت کو ئەو دێ ئاستەنگ بکە، ئەو دێ وەکی ئەندامەکی کۆمارا ترکیەیێ تەڤبگەرە و دێ بێژە جڤاکا دەمۆکراتیک ژ بۆ کوردان شێوازا چارەسەریێ یا ھەری ئیدەئالە.

دیار کر کو ئەو ئێدی ترکیەیێ وەکی دەولەتا خوە (یا عەبدوللاھ ئۆجالان) دبینە، ئەو (عەبدوللاھ ئۆجالان) دخوازە ترکیە ببە کۆمارا دەمۆکراتیک.

گۆت کو د مژارا ئاڤاکرنا کۆمارا دەمۆکراتیک دە ئاک پارتیێ پێنگاڤێن جدی ئاڤێتنە.

دیار کر کو ئەو (عەبدوللاھ ئۆجالان) دخوازە چاندا کوردان د ھوندرێ کۆمارێ دە ب جھ بکە، ئەڤ دەولەمەندیەکە، خوەست کو ئەڤ ب رەنگەکی دن نەیێ شرۆڤەکرن.

گۆت کو برێز باخچەلی (برێز دەولەت باخچەلی) ئیفادەیا مافێ ھێڤیێ ڤالا ب کار نەئانیە، بێی ڤێ ئەو (عەبدوللاھ ئۆجالان) نکارە بخەبتە؛ پشتی کو ئەڤ ھات کرن ھەکە د مژارا سووریەیێ دە سەرنەکەڤە، ئەو دێ دادگەهکرن و رەخنەیان قەبوول بکە؛ د رەوشا خوە یا نھا دە نکارە ل دژی ئیسرایلێ دەرکەڤە، دەما بەرێ ل جەم ئەسەد بوو، ئیسرایل ئەو (عەبدوللاھ ئۆجالان) خستیە چ رەوشێ پر ئەشکەرەیە.

دیار کر کو وی (عەبدوللاھ ئۆجالان) سۆز دایە.

گۆت کو ژ بۆ پارتیا دەمێ ژی وەکی شاندە (بۆ ئیمرالی) ھاتنە، گولستان (کلچ کۆچیگیت) ژی دکارە تەڤلی ببە.

(ل سەر گۆتنا حوسەیین یایمان کو گۆتبوو: ‘ھندەک سیاسەتمەدار و کەس ب گۆتنێن خوە پێڤاژۆیێ ژەھری دکن’) گۆت کو د پەکەکێ دە ژی ھندەک کەس ڤێ دکن، د ناڤ پێڤاژۆیێ دە ھەکە دەرفەتێن خەباتێ یێن وی (عەبدوللاھ ئۆجالان) زێدە ببن ھەموو دکارن وەرن ھەلکرن لێ وەخت پێدڤییە؛ گۆت کو شەرت و مەرجێن وی ژ بۆ ڤێ نە گونجاون؛ ھەتا ئەو ساخ بە ئەڤ پێنگاڤ و ئەڤ سەدسال دێ ب سەرکەفتی دەرباس ببە؛ مخاتەبێن وی ژ ڤێ رە دبێژن ‘سەدسالا بێتەرۆر’ لێ ئەو دبێژە ‘سەدسالا بێتوندی’ ب قاسی مخاتەبێن خوە ھێزا وی یا تەڤکاریێ ھەیە.

دیار کر کو دڤێت ب ئیتیفاقێ بمەشن، ئەو ژ ھاتنا ئەندامێن کۆمیسیۆنێ یا ڤر (ئیمرالی) پر ب ھێڤی بوویە و قۆناغەکا دیرۆکی دەست پێ کریە؛ ھێڤی دکە کو مخاتابێن وی ژی ببن ناڤێن سەرەکی یێن کو دکارن ڤێ سەرکەفتنێ پێک بینن؛ گۆت کو ئەو (د دەربارێ پێڤاژۆیێ دە) گەشبینە.

فەتی یلدز:

دیار کر کو وەکی ئەندامێن کۆمیسیۆنا یەکیتیا نەتەوەیی، پشتگری و براتیێ؛ ب ھلبژارتنا د ناڤ خوە دە، ئەو ب خوە ل سەر ناڤێ پارتیا تەڤگەرا نەتەوەپەرەست (مەھەپێ)، برێز حوسەیین (یایمان) ل سەر ناڤێ ئاک پارتیێ و خانم گولستان (کۆچیگیت) ل سەر ناڤێ پارتیا دەمێ ژ بۆ گرتنا داخویانیێن وی (عەبدوللاھ ئۆجالان) ھاتنە.

گۆت کو کۆمیسیۆنێ ھەتا نھا 18 جڤین پێک ئانینە، گوھداریا ھەموو بەشێن جڤاکێ ژ رێخستنێن جڤاکی، بارۆ، مالباتێن شەھیدان ھەتا دایکێن شەمبیێ کریە، ئەڤ گوھداریەکا دەولەمەند بوویە.

دیار کر کو د داویێ دە ب راپۆرەکا کو دێ بنڤیسن دێ ڤێ بگھینن ئەساسەکی و رێیێن چارەسەریێ نیشان بدن؛ کۆمیسیۆن هێژ ب داوی نەبوویە، د قۆناغا راپۆرکرنێ دە نە، سەدەما ھاتنا وان ئەڤە و دڤێت ئەڤ ھەڤدیتن وەکی جڤینا 19ێ یا کۆمیسیۆنێ وەرە نرخاندن.

گۆت کو ئەو نکارن درێژ درێژ ل سەر رابردوویا سیاسی یا ترکیەیێ باخڤن، وەکی دامەزرینەرێ رێخستنێ ئەو ژیانا وی (عەبدوللاھ ئۆجالان) و قۆناغێن سیاسی یێن کو تێ رە دەرباس بوویە دزانن؛ د داویێ دە تێگەھێن شارەداریا کۆمونال و لیبەرال یێن کو ل سەر دخەبتە فێم کرنە، ئاخافتنا ل سەر دیرۆکا رێخستنێ د ڤێ کێلیێ دە نە پێدڤییە.

دیار کر کو ئەو دزانن کو وی (عەبدوللاھ ئۆجالان) ژ رێبازا چەکداری دەرباسی رێبازا سیاسی بوویە، ل سەر وەلاتیبوونا وەکھەڤ، پێنگاڤێن چاندی و کۆمونالیتەیێ کوور بوویە.

گۆت کو وی فێم کریە کو د بانگا خوەیا شوباتا 2025ێ دە گۆتیە دڤێت ھەموو پێکھاتە تێکۆشینا چەکداری بەردن و ھەبوونا خوەیا رێخستنی بەلاڤ بکن؛ ڤێ یەکێ جڤاک پر رەحەت کریە، گەل ڤێ گەشەدانێ دشۆپینە؛ گۆت کو دەما ئەو (مەھەپە) دبێژن دەست ژ چەکان بەردن، گرینگە کو پێکھاتەیێن ل سووریە، ئیراق و ئیرانێ ژی د ناڤ دە بن.

دیار کر کو پرسگرێکێن ھەیی دکارن د چارچۆڤەیا دەمۆکراسیێ دە وەرن چارەسەرکرن، ئەڤ ژی تەنێ ب داویکرنا تەرۆرێ ل ترکیەیەکە بێتەرۆر پێکانە.

گۆت کو د چریا پێشین یا 1999ێ دە د سالۆنا دادگەھێ دە ئەو بخوە (ف. یلدز) وەکی پارێزەرێ شەھیدان جھ گرتیە.

دیار کر کو د سالێن 1970یێ دە تەڤگەرا کورد د ناڤ چەپگریێ دە بوو ژ بەر وێ نەھاتبوو فەرقکرن، نھا تام بەرەڤاژی چەپگری د ناڤ تەڤگەرا کورد دەیە.

گۆت کو دەما ئەو ل ڤر بەر ب چارەسەریێ ڤە دچن، ئەندامەکی رێخستنێ ب ئەشکەرەیی دبێژە ‘چ چارەسەری، چ بێچەککرن’؛ وان نۆتەک لێ زێدە کریە کو دبێژە ‘بریارا عەبدوللاھ ئۆجالان تەنێ ترکیەیێ ئەلەقەدار دکە’؛ دیار کر کو گەل دزانە کەسێ ل سەرێ ھەسەدێ (فەرھاد عەبدی شاھین) کەسەکە کو عەبدوللاھ ئۆجالان پەروەردە کریە.

گۆت کو دڤێت ھەڤالێن پارتی یان ژی یێن د سیاسەتا ترک دە نە، زمانێ بەریا لۆزانێ و دەستوورا بنگەھین یا 1924ێ ب کار نەیینن، ئەڤ پێڤاژۆیێ ژەھری دکە.

دیار کر کو دەما سەبری ئۆک ژ ترکیەیێ ڤەکشیا، ھەبوونا چەکان د دەستێ ئەندامێن رێخستنێ دە د رایا گشتی یا ترک دە بوو سەدەما ئینفیعالێ؛ د ڤێ خالێ دە ھاتیە دیتن کو (پەکەکە) تام ل گۆری بانگا وی (عەبدوللاھ ئۆجالان) تەڤنەگەریایە.

گۆت کو ل سووریەیێ (ھەسەدێ) پێبەندبوونا ب پەیمانا ئەنتەگراسیۆنێ یا 10ێ ئادارێ لازمە.

دیار کر کو د مژارا سووریەیێ دە دڤێت ئەو (عەبدوللاھ ئۆجالان) داخویانیەکا نوو بدە.

گۆت کو ئەڤ دەولەت دەولەتا مە ھەموویانە، (چەپگری) پێ نەحەسیایە کو کەدێ شەکل گوھەراندیە.

دیار کر کو ئەو دزانن دەما د داخویانیا خوە یا یەکەم دە گۆتیە ‘دەست ژ چەکان بەردن’، ژ ھەموو پێکھاتەیێن پەکەکێ رە گۆتیە (ل سەر ڤێ یەکێ عەبدوللاھ ئۆجالان؛ گۆتیە کو ل ئیرانێ ھەر رۆژ دارڤەکرن چێدبن، ئەو [عەبدوللاھ ئۆجالان]ێ ژ ئیرانێ بخوازە کو ‘مافێن دەمۆکراتیک بدە ئازەری و کوردان و دارڤەکرنان ب داوی بکە’، ژ بۆ ڤێ دڤێت ئەو ئینسیاتیڤێ ب کار بینن؛ ھەلبەت ئەڤ نایێ واتەیا شەر لێ ھەتا بدارڤەکرن بەردەوام بکن [پژاک] دێ دەست ژ چەکان بەرنەدە، نھا دڤێت بکەڤن پێڤاژۆیەکا دیالۆگ و ئاگربەستێ لگەل ئیرانێ، خەباتەکا ئەنتەگراسیۆنێ دکارە ل سەر ئیرانێ وەرە فەرزکرن).

گۆت کو چاڤدێری ھەنە کو پەکەکە ھێزێن خوە یێن ژ ئیراقێ ڤەکشاندی دشینە سووریەیێ، ئەڤ رەوش ب داخویانیا بەرێ رە ناکۆکیێ چێدکە.

حوسەیین یایمان:

دیار کر کو ئەو ل سەر ناڤێ کۆمیسیۆنێ ل ڤرن، ملەت دێ پرسێن خوە ژ وی بپرسە، گوھێ ھەموو ترکیەیێ ل ڤرە، ھەوایا ل ڤر دێ باندۆرێ ل ھەموو ھەرێمێ بکە، ئەڤ ژ بۆ ترکیە و ھەرێمێ دیرۆکییە.

گۆت کو وەکی تفاقا جومھورێ، برێز سەرۆککۆمار و برێز دەولەت باخچەلی ژ بۆ چارەسەرکرنا ڤێ مەسەلەیێ ریسکەکە پر مەزن گرتیە؛ ژ بەر وێ ملەت ل بەندا پێنگاڤێن زووترە ژ بۆ چارەسەریا مەسەلێ.

وەکی ئەنجام گۆت کو دڤێت ئەو ل سەر ناڤێ کۆمیسیۆنێ و ترکیەیێ ب سەر بکەڤن، نەخوە ئەتمۆسفێر و ھەوایا ل کۆلانان دکارە ڤەگوھەرە رەوشەکە پر جودا.

دیار کر کو ملەت بانگا وی (عەبدوللاھ ئۆجالان)یا 27ێ شوباتێ گرینگ دبینە لێ د مژارا پێنگاڤێن پراکتیک دە داخواز ھەیە کو بێھتر وەرە کرن، ئەو ب ھەستیاریا ھەموو مالباتێن شەھیدان ھاتنە.

گۆت کو وی د شاندا مرۆڤێن ئاقلمەند دە جھ گرتیە، ب بەرتەکێن پر جدی رە روو ب روو مایە؛ دڤێت ئەو ب سەر بکەڤن، د خالا پێنگاڤێن پراکتیکی دە ئەنجاما کو ژ ڤر دەرکەڤە دێ ببە سەدەما بەردەوامیا پێڤاژۆیێ یان ژی ئەنجامەکا دن.

دیار کر کو د ڤێ دیرۆکیبوونێ دە ھەم کۆمیسیۆنا پارلامەنتۆیێ و ھەم ژی ئەڤ ھەڤدیتن واتەیەکا پر دیرۆکی قەزەنج دکە؛ ھەر کەسێ ھەڤدیتنێن دەولەت-رێخستنێ دشۆپینە دزانە کو د سالێن 1993-1995-1999-2009-2014ێ دە ئەڤ فەرسەندا گوھەرتنا دیرۆکێ ھاتیە؛ دیار کر کو داخویانیا 27ێ شوباتێ و گرێدایی ڤێ دڤێت پێنگاڤێن پراکتیکی لەز ببن، ھێڤی ژ کۆمیسیۆنێ پر زێدەیە و دڤێت نەیێن خەلەتیێن بەرێ؛ گۆت کو دەستەکی نەدیار و میکانیزمایەکا داربەیێ ھەیە، رێیا دەرکەتنا ژ ڤر ئەڤە کو ل سووریە و ترکیەیێ ل ھەر دەرێ رێخستن ل گۆری بانگا عەبدوللاھ ئۆجالان تەڤبگەرە.

گۆت کو بیردانکا دیرۆکی، ئەوێ براتیا 1000 سالی یا ترک و کوردان ب ھەڤ رە دابین بکن یان ژی دێ شەرەکی/خەرابوونەکێ/کریزەکا پر مەزنتر ژ یا ئیرۆ وەرە ژیان کرن (ل سەر ڤێ یەکێ فەتی یلدز گۆتیە: ‘ئیدیعایێن کو چ جاران ژ بۆ ترکیەیێ پێکنەیێن دێ ببن سەدەما ئاستەنگکرنا پێڤاژۆیێ، دڤێت بال وەرە کشاندن سەر ڤێ’).

دیار کر کو گەفا داربەیێ ھەیە، دڤێت ئەڤ وەرە زەلالکرن.

گۆت کو مەسەلا بنگەھین وەکی شاندەیەکێ کو ھەموو حافزەیێ و راستیا دیرۆکی دزانە، ھەکە ترکیەیەکا بێتەرۆر پێک وەرە، ترکیە ل بەندا پێنگاڤێن پراکتیکە (ل سەر ڤێ یەکێ عەبدوللاھ ئۆجالان گۆتیە ‘ئەو ل پەی پێنگاڤێن پۆزیتیڤە’).

دیار کر کو ھەر کەسێ تێ کۆمیسیۆنێ دبێژە دڤێت پێنگاڤێن پراکتیک وەرن ئاڤێتن و دڤێت پر ب لەز وەرە تەڤگەرین.

گۆت کو بەرخوەدانەک ھەیە، ژ بەر کو بارکرنا ناڤەندا رێخستنێ ژ قەندیلێ بۆ قادا سووریەیێ پرسگرێکێ چارەسەر ناکە؛ گۆت کو دڤێت ئەو (عەبدوللاھ ئۆجالان) وەکی لیدەرێ رێخستنێ تەعلیماتەکا تەقەز بدە، ھەموو رایا گشتی و ترکیە ل بەندا ڤێیە، دەما وی ئەڤ پێک ئانی دێ ئەتمۆسفێرەکا دن ب پێش بکەڤە.

دیار کر کو ھەر بەشا د کۆمیسیۆنێ دە ھاتی گوھداریکرن دیار کریە کو ھەکە توندی ب داوی ببە ترکیە دێ پر پێش ڤە بچە؛ ژ بەر وێ پێنگاڤەکا ئێکلاکەر پێدڤییە، دێ د ھشێ وان دە بە کو میکانیزمایا داربەیێ دکارە بکەڤە دەورێ.

گۆت کو راکرنا ھەموو ناکۆکیێن دیرۆکی و دیتنا رێیەکا نوو وەزیفەیا کۆمیسیۆنێیە.

دیار کر کو ئەو بخوە ژ کۆکا ترکمەن و ‘ئولکوجو’یە و ژ بۆ براتیێ دەستپێشخەری کریە.

گۆت کو ئاڤاکرنا کۆمیسیۆنێ دیرۆکییە، ب پرانیا بکێرھاتی ھاتنە ڤر؛ ‘ملەت ژ وان دپرسە ئەنجام چیە، گەلۆ ل سووریەیێ دێ دەست ژ چەکان وەرن بەردان؟ گەلۆ دایکێن ل دیاربەکرێ زارۆکێن خوە دخوازن دێ بگھیژن زارۆکێن خوە؟ گەلۆ چەک دێ نە تەنێ د دەست دە لێ د زھنێ دە ژی وەرن بەردان’، ئەڤ پرس ل بەندا بەرسڤێ نە.

دیار کر کو دەما ژ ڤر دەرکەڤن دێ رۆژنامەگەر بپرسن، ئەو دێ داخویانیەکێ بدن؛ گۆت کو مەسەلا بنگەھین یا ل ڤر، مەسەلا ‘زڤراندنا پەدالێ’یە کو سەرۆکێ تەشکیلاتێ ئانیە زمان؛ رایا گشتی ژی دزانە کو پرسگرێک د رۆژەکێ دە چارەسەر نابن، دیارکرنا نەخشەیا رێ، دایینا پەیامێن پۆزەتیڤ، بلندکرنا ھێڤیێن جڤاکی پر گرینگە؛ ل ترکیەیێ پسیکۆلۆژیەکا سیاسی یا وھا ھەیە، ئەو مەجبوورن ب ھەڤ رە ب سەر بکەڤن.

گۆت کو دڤێت ئەڤ پێنگاڤا دیرۆکی ب ئەنجامەکا دیرۆکی ب پێش ڤە ببە، نەخوە نکارە پێش ڤە بچە.

دیار کر کو ئەو ‘گەشبینەکی ب ئیحتیاتە’، تشتێن د بۆری دە قەومینە ت جاران ژ بیر ناکە و دڤێت ژ بۆ پێکانینا ترکیەیەکا بێتەرۆر بخەبتە.

گولستان کلچ کۆچیگیت:

دیار کر کو ئەو (عەبدوللاھ ئۆجالان) پر باش و ساخلەم خویا دکە، تەندورستیا وی ژی پر باش خویا دکە؛ وان گوھداریا گەلەک بەشان کریە، ل سەر ناڤێ کۆمیسیۆنێ ل ڤرن، دخوازن گوھداریا وی بکن، دخوازن رامانێن وی (عەبدوللاھ ئۆجالان) لگەل رایا گشتی پارڤە بکن.

پرس کر کو ئەنتەگراسیۆنا کوردان یا د ھوندرێ کۆمارێ دە ب دابینکرنا رێخستنبوونا خوە، دێ کاراکتەرێ کۆمارێ چاوا بە، دێ ببە کۆمارەکا چاوا، ئەو ڤێ مەراق دکە.

دیار کر کو ژ بۆ پێشڤەچوونا پێڤاژۆیێ، ژ بۆ خورتکرنا دەستێ وی (عەبدوللاھ ئۆجالان) و ژ بۆ پێکانینا ھەموو گۆتنێن وی د پراکتیکێ دە، ئەو دخوازن رامانا وی بزانبن کو چ دکەڤە سەر ملێ کۆمیسیۆنێ.

دیار کرنە کو سبە 25ێ چریا پاشین رۆژا تێکۆشینا ل دژی توندیا ل سەر ژنێیە، سلاڤێن ژنان گھاندنە وی.”