د جڤینا ئۆجالان یا لگەل شاندەیەکە بلندا ئەولەهیێ یا دەولەتێ چ هاتە گۆتن..
ل گۆری ئاگاھیێن کو ژ چاڤکانیێن پارلامەنتۆیێ و رۆژنامەیا نەفەسێ ھاتنە وەرگرتن، د 27ێ ئادارێ دە ل ئیمرالیێ ھەڤدیتنەکە گەلەکی گرینگ پێک ھاتیە. ئەڤ جڤینا کو د ناڤبەرا عەبدوللاھ ئۆجالان و شاندەیەکە بلندا ئەولەھیێ یا دەولەتێ دە چێبوویە، نێزی 5 دەمژمێران دۆم کریە. تێ دیارکرن کو ئەڤ ھەڤدیتن نە تێکلیەک ئاسایی یا رووتینە؛ بەرەڤاژی وێ، “دەولەت” ب ھەموو گرانی و ب نەخشەرێیەکێ ل سەر مێزە روونشتیە.
د ناڤا پارتیا دەمێ دە تێ ئاخاڤتن کو د وێ جڤینێ دە ل سەر “ھەیامەک 10 رۆژان” لھەڤکرنەک پێک ھاتیە. کەسێن کو ئیدیعا دکن پێڤاژۆ راوەستیایە، بالێ دکشینن سەر ڤێ خالێ. مژارا ھەری سەرەکەیا نیقاشان ستاتویا ئۆجالانە. پارتیا دەمێ دەستنیشان دکە کو ئەڤ مژار نە تەنێ تەکنیکییە؛ نیقاش ل سەر وێ یەکێیە کو گەلۆ دێ شەرت و مەرجێن ھەیی یێن ل ئیمرالیێ بەردەوام بکن یان دێ مۆدەلەک نوو و جودا ژ بۆ پێڤاژۆیێ وەرە مەشاندن.
خالەکا دن یا گرینگ یا نیقاشان، نێزیکاتیا حکوومەتێ یا دەربارێ ئەندامێن رێخستنێ دەیە. دەولەت دخوازە د رێزکنامەیێن یاسایی دە “پۆلینکرنێ” بکە؛ ئانگۆ ژ بۆ کەسێن چەک بکار نەئانینە، کەسێن بەشداری چالاکیان بوونە و کادرۆیێن برێڤەبر، قانوونێن جودا وەرن سەپاندن. لێ بەلێ، عەبدوللاھ ئۆجالان ئەڤ پێشنیارا “پۆلئنکرنێ” ب ئەشکەرە رەد کریە. ل گۆری چاڤکانیێن پارتیا دەمێ، داخواز ئەوە کو ھەکە قانوونەک دەرکەڤە، دڤێت ھەر کەسی (یێن د بن لێپرسینێ دە نە و یێن ب لیستەیا سۆر تێنە لێگەرین ژی تێ دە) ب ئاوایەکی گشتی بگرە ناڤ خوە.
ھەر چەند د ناڤبەرا داخویانیێن قەندیل، دەمێ و ئیمرالیێ دە جارنان جوداھی و ناکۆکی ھەبن ژی، ئاگاھی نیشان ددن کو پێڤاژۆ ب تەمامی نەشکەستییە. ل گۆری نرخاندنان، ھەر دو ئالی ژی ھێژ دەری ل سەر ھەڤ نەگرتنە. د رۆژەڤێ دە ئامادەکاریا سەردانەکە نوویا ژ بۆ ئیمرالیێ ھەیە و ئەڤ یەک نیشان ددە کو دیالۆگ د ئاستەکێ دە بەردەوام دکە.
د ڤێ ناڤبەرێ دە، “کۆمیسیۆنا ھەڤگرتنا نەتەوەیی، براتی و دەمۆکراسیێ”یا کو د 17ێ سباتێ دە ل پارلامەنتۆیێ ھاتبوو ئاڤاکرن، راپۆرا خوە تەمام کریە. تەڤی کو دھات ھێڤیکرن د مەھا نیسانێ دە گاڤێن قانوونی وەرن ئاڤێتن، ئەڤ یەک ژ بۆ مەھا گولانێ ھات پاشخستن. چاڤێن رایا گشتی نھا ل سەر داخویانیێن فەرمی و گاڤێن کو دێ د رۆژێن پێش دە ژ ئالیێ دەولەت و ئالیێن سیاسی ڤە وەرن ئاڤێتنە.
