ل سەر رەحمی کۆچ ب تۆھمەتا “سڤکاتیکرنا ب ژنا کورد” لێپرسین ھات دەستپێکرن
حەنەکەک (پێکەنۆک) کو ژ ئالیێ رەحمی کۆچ، سەرۆکێ مالباتا کۆچ ھۆلدینگێ ڤە د دەما ڤەکرنا نەخوەشخانەیا ئامەریکی یا ل ئیزمیرێ دە ھات گۆتن، بوو سەدەما نەرازیبوونەکە مەزن یا جڤاکی و سیاسی. ل سەر بەلاڤبوونا دیمەنێن ڤێ روودانێ، سەردۆزگەریا گشتی یا ئیزمیرێ ب تۆھمەتا “سڤکایەتیا ل بەشەکی جڤاکێ” لێپرسینەکە فەرمی ل دژی کارسازێ ناڤدار دا دەستپێکرن.
روودان د دەما سەردانا ئۆدەیێن پشکنینێن پزیشکی یێن نەخوەشخانەیێ دە قەومی. د دیمەنێن کامەرایان دە تێ دیتن کو رەحمی کۆچ پێکەنۆکەکێ ژ مێڤانێن ل دۆر خوە رە ڤەدبێژە کو تێ دە بەحسا دیالۆگا پزیشکەکی و ژنەکە کورد یا ل سەر داخوازا ژێکرنا جلان دکە. بەلاڤبوونا ڤان گۆتنان ل سەر تۆرێن جڤاکی فکار و بەرتەکێن توند ل پەی خوە ئانین.
پشتی دەستپێکرنا لێپرسینێ، وەزیرێ دادێ یلماز تونچ داخویانیەک دا و راگھاند کو عەدالەت ل گۆری دەولەمەندی، پاشناڤ یان ژی ستاتویێ بریارێ نادە. وەزیری تەکەز کر کو گۆتنێن وەھایێن روومەتا ژنان و بەشەک ژ جڤاکێ ئارمانج دگرن، د بن ناڤێ “میزاح” یان “حەنەکێ” دە قەت نایێن قەبوولکرن و ل دژی ھەر جورە نێزیکاتیێن جوداکاری و نەفرەتێ ئەو دێ ب بریارداری بسەکنن.
ل ئالیێ دن، بەردەڤکێ ئاک پارتیێ عۆمەر چەلیک ژی ل سەر ناڤێ پارتیا خوە ئەڤ کریار ب توندی شەرمەزار کر. چەلیک دیار کر کو چ وەلاتی ل گۆری ئەتنیک، باوەری یان زایەندێ نابە مژارا زمانێ سڤکاتیێ و تەڤلیکرنا ناسنامەیا “ژنا کورد” د گۆتارێن وەھا دە کریارەکا کرێتە. چەلیک بانگا لێبۆرینا فەرمی کر و گۆت کو ھەموو وەلاتی خوەدی روومەتەکە وەکھەڤن.
ل سەر زێدەبوونا بەرتەکان، کارساز رەحمی کۆچ داخویانیەک وەشاند و داخوازا لێبۆرینێ کر. کۆچ د داخویانیا خوە دە دەستنیشان کر کو چ مەبەستەکا وی یا خەراب یان سڤکاتیکرنا ب ژنێن کورد و چ پێکھاتەیەکا دن تونەیە و گۆت کو ئەڤ تەنێ وەکی سەرپێھاتیەکە پێکەنۆک ھاتیە زمان و ئارمانجا وی نە روورەشکرن بوویە.
