ئیسرایلێ ناڤەندا پترۆکیمیایێ یا ماھشەھرێ یا ئیرانێ بۆمبەبارانکر
شەرێ راستەخوەیێ ناڤبەرا ئیسرایل و ئیرانێ گھیشت قۆناغەکە نوو و خەتەر. ئارتێشا ئیسرایلێ د چارچۆڤەیا ئێریشێن خوەیێن ئاسمانی یێن بەرفرەھ دە، ڤێ جارێ ناڤەندەکە ھەری گرینگا پیشەسازیا پترۆکیمیایێ و ئابۆریێ یا ل باشوورێ رۆژئاڤایێ ئیرانێ ب گرانی بۆمبەباران کر.
ئارتێشا ئیسرایلێ ئیرۆ (دوشەم، 8ێ خزیرانا 2026ێ) ب داخویانیەکە فەرمی راگھاند کو ھێزێن وان یێن ئاسمانی، ل سەر بنگەھا زانیاریێن ھوورگولی یێن سازیا ئیستیخباراتا لەشکەری، ئێریشەکە سەرکەفتی برنە سەر کۆمەلگەھا پەترۆکیمیایێ یا بەندەرێ ماھشەھرێ. ھات دەستنیشانکرن کو ئەڤ ناڤەند وەکی یەک ژ ستوونێن سەرەکەیێن ئابۆریا ئەنەرژیێ یا ئیرانێ تێ حەسباندن.
ل ئالیێ دن، رێخستنا تایبەتا ئابۆریا پەترۆکیمیایێ یا ماھشەھرێ راستەخوە نووچە پشتراست کر و ئەشکەرە کر کو د ئەنجاما ڤێ ئێریشا ئاسمانی دە پارزینگەھا ستراتەژیکا کاروونێ راستەراست ھاتیە لێدان. رێڤەبەریا ناڤەندێ ژ بۆ پاراستنا جانێ کارمەندان فەرمانەکە لەزگین دەرخست داکو ھەموو کارکەر قادا پیشەسازیێ ب تەمامی ڤالا بکن و ژ ھەرێمێ دوور بکەڤن.
ئەڤ بۆمبەبارانا ل سەر پارزینگەھا ماھشەھرێ، تەنێ دەمژمێرەکێ پشتی ئێریشێن ئاسمانی یێن دژوار یێن ل سەر ناڤەند و رۆژئاڤایێ ئیرانێ پێک ھات. ئارتێشا ئیسرایلێ تەکەز دکە کو ئەڤ گاڤا لەشکەری “بەرسڤەکە راستەخوە و توند”ە ل دژی ئێریشێن مووشەکی یێن ئیرانێ یێن کو دەمژمێرێن بۆری ھاتبوون ئەنجامدان.
ھێژایی بیرخستنێیە کو سوپایێ پاسدارانێ ئیرانێ شەڤا بۆری ب دەھان مووشەکێن بالیستیک بەر ب باژارێن ئیسرایلێ ڤە ئاڤێتبوون و ھندەک ژ وان مووشەکان ل پایتەخت تەل ئەڤیڤێ کەتبوون. تەھرانێ سەدەما ڤێ ئێریشێ وەکی پابەندنەبوونا ئیسرایل و ئامەریکایێ یا ب ئاگربەستێ و بەردەوامبوونا بۆمبەبارانێن ل سەر لبنانێ و دەڤەرا داھیێ یا بەیرووتێ نیشان دابوو.
