ئامەریکایێ ئاخا ئیرانێ بۆمبەباران کر و تەھرانێ بەرسڤ دا
ل سەر فەرمانەکە راستەوخو یا سەرۆکێ ئامەریکایێ دۆنالد ترامپ، فرۆکەیێن شەری یێن ئامەریکایێ چەند بنگەھێن سەربازی و سیستەمێن بەرەڤانیا ئەسمانی د ناڤ ئاخا ئیرانێ دە بۆمبەباران کرن. ل ئالیێ دن، ئارتێشا پاسداران یا ئیرانێ ژی ب ئاڤێتنا مووشەک و درۆنان بەرسڤ دا بنگەھێن ئامەریکایێ یێن ل ھەرێمێ.
فەرمانداریا ناڤەندی یا ھێزێن ئامەریکایێ (سێنتکۆم) بەربانگا ئیرۆ (چارشەم، 10ی خزیرانا 2026ێ) ب داخویانیەکێ راگھاند کو ل سەر فەرمانا راستەوخو یا سەرۆک دۆنالد ترامپ، وان دەست ب وەشاندنا گورزێن سەربازی ل سەر چەند ئارمانجان د ناڤ ئاخا ئیرانێ دە کریە. ئامەریکا ڤان ئۆپەراسیۆنان وەکی “چالاکیەکە بەرەڤانکرنا ژ خوە” وەسف دکە.
ل گۆری بەیاننامەیا سێنتکۆمێ، فرۆکەیێن شەری یێن ھێزا ئەسمانی و ھێزا دەریایی یا ئامەریکایێ د ڤێ ئۆپەراسیۆنێ دە، ب رێیا بکارئانینا تەقەمەنیێن ھوور و سیستەمێن پێشکەفتی چەند خالێن ستراتەژیک یێن ل نێزیکی تەنگاڤا ھورمزێ کرنە ئارمانج. د ناڤ جیھێن ھاتنە لێدان دە سیستەمێن بەرەڤانیا ئەسمانی یا ئیرانێ، وێستگەھێن کۆنترۆلا زەڤی و رادارێن چاڤدێریا کەناراڤان جھ دگرن. سێنتکۆمێ تەکەز کر کو ئەڤ بەرسڤدانەکە ھەڤسەنگ بوویە ل بەرامبەری خستنا ھەلیکۆپتەرەکە ئاپاچی یا ئامەریکی ژ ئالیێ ئیرانێ ڤە و ئێریشێن ل سەر کەشتیێن بازرگانی.
ژ ئالیێ خوە ڤە، مەدیایێن فەرمی یێن ئیرانێ پشتراست کرن کو تەقینێن بھێز ل پارێزگەھا ھورمزگانێ، بەندەرا عەباسێ، گراڤا قشم و دەڤەرا سیریکێ روو دانە. تەلەڤیزیۆنا فەرمی یا تەھرانێ دیار کر کو د ئەنجاما ئێریشان دە دو ئەمبارێن ئاڤێ ھاتنە ھنگافتن و ئاڤا ڤەخوارنێ ل دەڤەرا بامانیێ قوت بوویە. د ھەمان دەمێ دە، ئارتێشا پاسداران یا ئیرانێ ب مووشەکێن بالیستیک و درۆنان ئێریشی بنگەھێن ئامەریکایێ یێن ل بەحرەین، کووەیت و ئوردونێ کر. وەزیرێ دەرڤەیێ ئیرانێ عەباس ئیراقچی ل سەر رەوشێ ھشیاری دا و گۆت: “ئەم چ گەفان بێ بەرسڤ ناھێلن.”
بەرپرسەکی ئامەریکایی ژ رۆژنامەیا “نیو یۆرک تایمس”ێ رە راگھاند کو پرانیا مووشەک و درۆنێن ئیرانێ بەری کو بگھن ئارمانجێن خوە، د ئەسمان دە ھاتنە تەقاندن. ل گۆری نرخاندنێن دەستپێکێ، چ زرارێن جانی د ناڤ رێزێن ئارتێشا ئامەریکایێ دە نینن و چ زرارێن مەزن ژی نەگھیشتنە بنگەھێن وان یێن سەربازی.
ئەڤ روودانا سەربازی پشتی وێ یەکێ تێ کو سەرۆکێ ئامەریکایێ دۆنالد ترامپ دوھی (سێشەم، 9ێ خزیرانا 2026ێ) ل سەر تۆرا جڤاکی یا “تروس”ێ ئەشکەرە کربوو کو ھێزێن ئیرانێ ھەلیکۆپتەرەکە وان یا ژ جوورێ “ئاپاچی” د دەما دەوریەیێ دە ل سەر تەنگاڤا ھورمزێ ھنگافتیە. ترامپ دابوو خویارکرن کو ھەر دو بالافرڤانێن د ناڤ ھەلیکۆپتەرێ دە ب سلامەتی ژ ئالیێ تیمێن سێنتکۆمێ ڤە ھاتنە رزگارکرن، لێ واشنگتۆن نەچارە کو بەرسڤا ڤێ پێنگاڤا ئیرانێ بدە.
