سێنتكۆم: ئامەریکایێ ل ناڤا ئاخا ئیرانێ چەندین ئارمانجێن سەربازی بۆمبەباران کرن
فەرمانداریا ناڤەندییا ئامەریکایێ (سێنتكۆم) راگھاند، وان پێلەکە نوویا ئێرشان ل دژی ئیرانێ پێک ئانیە و تێ دە سیستەمێن پاراستنا ئاسمانی و ناڤەندێن راگھاندنێ یێن سەربازی کرنە ئارمانج.
فەرمانداریا ناڤەندییا ئامەریکایێ (سێنتكۆم) ب داخویانیەکێ ئاشکەرە کر، ھێزێن وان ل دژی چەندین ھەرێمێن ئیرانێ ئۆپەراسیۆنەکە بەرفرەھا ئاسمانی و دەریایی پێک ئانیە. د داخویانیێ دە ھات دیارکرن کو د ڤێ پێلا نوویا ئێرشان دە، ب تایبەتی سیستەمێن چاڤدێریا سەربازی، ناڤەندێن پەیوەندیان و بنگەھێن پاراستنا ئاسمانی یا ئیرانێ ھاتنە لێدان.
ل گۆری سێنتكۆمێ، ئۆپەراسیۆن سەرێ سبەھا ئیرۆ 11ێ خزیرانا 2026ان، ھاتیە پێکانین. د ئێرشێ دە ھێزێن مارینز، ھێزێن ئاسمانی و دەریایی یێن ئامەریکایێ ب ھەڤ رە بەشدار بوونە. دەستنیشان کر ژی، د ئۆپەراسیۆنێ دە “تەقەمەنیێن ھووربین” ھاتنە بکارانین، دا کو زیان نەگھیژە سڤیلان.
ئامەریکایێ سەدەما ڤێ ئۆپەراسیۆنێ وەکی “پاراستنا رەوا” بناڤ کر و راگھاند، ئەو بنگەھێن سەربازی یێن ھاتنە لێدان، گەفەکە راستەراست بوون ل سەر ھێزێن ئامەریکایێ و ئەولەھیا کەشتیێن بازرگانی یێن د رێیێن ناڤنەتەوەیی دە.
ل تەھران و کهرهجێ دەنگێ تەقینان ھات بھیستن
ل ئالیێ دن، چاڤکانیێن ھەرێمی ل ئیرانێ راگھاندن کو ل پایتەخت تەھران و دەردۆرا وێ دەنگێ چەندین تەقینێن گەلەکی ب ھێز ھاتیە بھیستن. مەدیایا فەرمی یا ئیرانێ پشتراست کر کو ل باژارێ كهرهج (رۆژئاڤایێ تەھرانێ) و باژارێ وەرامین (باشوورێ رۆژھلاتێ تەھرانێ) تەقین چێبوونە.
ئەڤ ئێرش پشتی چەند ساعەتان ژ ئێرشەکە دن یا ئامەریکایێ یا ل سەر پەراڤێن باشوورێ ئیرانێ پێک ھات. تەڤی کو زرارێن مەزن تێن تەخمینکرن، لێ ھەتا نھا رایەدارێن کۆمارا ئیسلامییا ئیرانێ دەربارێ قەبارەیا زیانێن جانی و مادی و سەدەما تەقینان دە ت داخویانیەک بەلاڤ نەکریە.
