تەل ئەڤیڤ نەخشەرێیا نوویا واشنگتۆنێ رەد دکەت: رێکەفتنا ئامەریکا و ئیرانێ مەترسیەکا مەزنە
کریزەکە بێدەنگ لێ کوور د وارێ دیپلۆماسیێ دە د ناڤبەرا ئیسرایل و دەولەتێن یەکبوویی یێن ئامەریکایێ دە دەرکەتیە ھۆلێ. ھەژمارەکە بەرپرسێن بلند و شارەزایێن دۆسیەیا ئیرانێ ل تەل ئەڤیڤێ ھشیاریەکا توند دان کو لھەڤکرنا داوییا د ناڤبەرا رێڤەبەریا دۆنالد ترامپ و تەھرانێ دە، ل سەر پیڤانێن ئەولەھیێ یێن ئیسرایلێ مەترسیەکا راستەوخۆ و ستراتەژیک چێدکە.
ل گۆری راپۆرتەکە تایبەتا کانالا 12ێ یا ئیسرایلی، وان بەرپرسێن ئەولەهیێ یێن ئیسرائیلێ راگھاندیە کو ئالیێ ئامەریکایی د ڤێ دیپلۆماسیێ دە نە تەنێ ل سەر چارچۆڤەیا گشتی لھەڤکرن کریە، بەلکی مەرجێن سەرەکی یێن تەھرانێ ژی قەبوول کرنە. شارەزایێن ئیسرایلی ھشیاریێ ددن کو ئەڤ پێنگاڤە دێ بیتە سەدەما ڤەکرنا ب تەمامی یا تەنگاڤا ھورمزێ و ئابۆریا ئیرانێ یا کو د بن دۆرپێچان دە لاواز ببوو، ژ نوو ڤە زندی بکە.
د راپۆرتێ دە ھاتیە ئەشکەرە کرن کو د ڤێ رێکەفتنێ دە پرسا شیانێن ئەتۆمی و ناڤۆکی یێن ئیرانێ بۆ قۆناغەکا نەزەلالا پاشەرۆژێ ھاتیە ئاڤێتن، کو ئەڤ گاڤ ژ ئالیێ ئیسرایلێ ڤە وەکی سیاسەتا دانا قستان بۆ دەم وەرگرتنا تەھرانێ تێ پێناسەکرن. ھەروھا بەرپرسێن ئەولەھیێ نیگەرانن کو شەرتێ ڤەگوھاستنا یورانیوما دەولەمەندکری بۆ دەرڤەیی وەلات، بۆ درووشمەکی نەزەلالێ بن ناڤێ کێمکرنا ئالۆزیان ھاتیە گوھەرتن، د دەمەکێ دە کو سیستەما مووشەکێن بالیستیک یا ئیرانێ ب چ ئاوایەکی د ناڤ دەقێن لھەڤکرنێ دە جھ نەگرتیە.
ھەر چەندە کو ئۆفیسا سەرۆکوەزیر بنیامین نەتانیاھو ژ بەر تێکلیێن نێزیک یێن لگەل سەرۆکێ ئامەریکایێ دۆنالد ترامپ ھەول ددە د ئاستا فەرمی دە چ ھەلوەستەکا توند نیشان نەدە، لێ بەلێ چاڤکانیێن ئیستیخباراتی بێدەنگیا خوە شکاندنە. ئەو دەستنیشان دکن کو ئەڤ رێکەفتنە ئیرانێ ب راوەستاندنا پشتگریا گرووپێن چەکدار یێن ل ھەرێمێ پابەند ناکە، بەلکی رێیێ بۆ خوەش دکە کو جارەکە دن پەیوەندیێن خوەیێن لەشکەری یێن لگەل حزبولاھا لبنانێ و ئەنیێن شەری نوو بکە.
بەرپرسێن ئیسرایلی د بەردەوامیا نرخاندنا خوە دە ئەنجامێن ڤێ لھەڤکرنێ دشبهینن پەیمانا ئاگربەستا غەززەیێ و دپرسن کا پەیمانا بێچەککرنا حەماسێ چ لێ ھات کو نھا ئەو باوەریێ ب ئاگربەستا شێست رۆژی یا ئیرانێ بینن. ل گۆری نێزیکاتیا نوویا تەل ئەڤیڤێ، راوەستاندنا زەختا سەربازی یا راستەخۆ یا ئامەریکایێ، پێگەھا ئیرانێ ل رۆژھلاتا ناڤین هێژ بھێزتر دکەت و گەفا سەربازی یا راستەقینە یا ل دژی تەھرانێ ژ رەھان ڤە لاواز دکەت.
