کەمال کلچدارۆغلو دێ ل گرتیگەھا ئەدرنەیێ سەردانا سەلاھاتتین دەمیرتاش بکە
نەجدەت ساراچێ کو د تیما سەرۆکێ گشتی یێ پارتیا گەل یا کۆماری (جەهەپێ) کەمال کلچدارۆغلو دە جھ دگرە، ئەشکەرە کر کو کلچدارۆغلو د رۆژێن پێش دە دێ ل گرتیگەھا ئەدرنەیێ سەردانا ھەڤسەرۆکێ بەرێ یێ پارتیا دەمۆکراتیکا گەلان (ھەدەپێ) سەلاحەدین دەمیرتاش بکە.
ئەڤ بریارا گرنگ یا سەردانێ پشتی نیقاشێن گەرمێن ل سەر داخویانیێن داوی یێن سەرۆکێ جەهەپێ ھات. کەمال کلچدارۆغلو کو ب بریارا دادگەھێ ژ نوو ڤە ڤەگەریایە سەر پۆستا سەرۆکاتیا گشتی یا پارتیێ، د 19ێ ڤێ مەھێ دە دەربارێ راکرنا پارێزبەندیێن پارلەمەنتەرێن ھدپێ یێن د سەردەما بۆری دە راگھاندبوو: “ئەز ل پشت بریارا مە یا ل سەر سەلااحەدین بەگم، ئەز نە پۆشمانم.” ئەڤ داخویانیا کلچدارۆغلو د قادا سیاسەتا ترکیەیێ و د ناڤ رایا گشتی دە ببوو سەدەما بەرتەکن توند.
نەجدەت ساراچ د بەرنامەیەکە زندی یا تەلەڤیزیۆنێ دە ل سەر ڤان نیقاشان پەیڤی و پشتراست کر کو ئەڤ ھەڤدیتن دێ تەقەز پێک وەرە. ساراچ ل سەر گرینگیا ڤێ پێنگاڤێ گۆت: “د رۆژێن پێشیا مە دە کەمال بەگ دێ ل گرتیگەھا ئەدرنەیێ برێز سەلاحەدین دەمیرتاش زیارەت بکە. ھوون دکارن کەنێ خوە بدۆمینن، مە د پاشەرۆژێ دە یێن کو ل ھەمبەری کەمال بەگ دکەنیان دیتن. ب دیتنا من دڤێت مرۆڤ بالدار بە. پشتی سەرەدانا سەلاحەدین دەمیرتاش، ئەم دێ ھەموو ب ھەڤ رە گوھ بدن داخویانیا کەمال بەگ.” ساراچ ھەروھا دا زانین کو بریارا سەردانێ ھاتیە گرتن لێ دەربارێ رۆژا ھەڤدیتنێ دە تو دەم دیار نەکرن.
دەمیرتاش ژ 4ی چریا پاشین یا 2016ێ ڤە د گرتیگەھا تیپا ئێف یا ئەدرنەیێ دە گرتییە. تەڤی کو دادگەھا مافێن مرۆڤان یا ئەورۆپایێ چەند جاران بریارێن یاسایی یێن ژ بۆ بەردانا وی یا دەملدەست دەرخستنە ژی، لێ حکوومەتا ترکیەیێ ھەتا نھا ئەڤ بریارێن ناڤدەولەتی بجیھ نەئانینە و داخوازێن ئازادکرنا وی رەد دکە.
