نومان کورتولموش چارچۆڤەیا پێڤاژۆیا نوو دیار کر: “لێبۆرینا گشتی تونەیە”
سەرۆکێ پارلامەنتۆیا ترکیەیێ نومان کورتولموش، دەربارێ گاڤێن داوی یێن پێڤاژۆیا “ترکیەیا بێ تەرۆر” دە داخویانیێن گرینگ دان و دەستنیشان کر کو ئەڤ قۆناغە د دەمەکێ نێزیک دە دێ گەهیتە ئەنجامێ. کورتولموش ب ئەشکەرەیی راگھاند کو د سەرەراستکرنا یاسایی یا ژ بۆ ڤێ پێڤاژۆیێ دە چ بابەتێن وەکی “لێبۆرینا گشتی” (عەفوو) جھ ناگرن.
کورتولموش ژ بۆ مەدیایا ترک نرخاندنا قۆناغا ھەیی کر و گۆت: “ب باوەریا من، بەشەکێ مەزن یێ پێڤاژۆیێ تەمام بوویە. د دەمەکە نێزیک دە کارێن مایی ژی دێ ب ئەنجام ببن و پێڤاژۆ ب تەمامی گهیت ئارمانجا خوە.”
سەرۆکێ پارلامەنتۆیێ بال کشاند سەر باندۆرا نەرینی یا شەر و پەڤچوونان یا ل سەر ئابۆریا وەلات و زیانێن دارایی یێن ھەتا نھا و وھا ئەشکەرە کر:
“بەرێ زیانێن ئابۆری یێن ڤی شەری وەکی 1.3 تریلیۆن دۆلار دھاتن تەخمینکرن. لێ بەلێ ب باوەریا من ئەڤ ژمارە نھا دو قات زێدەتر بوویە و ژ 2 تریلیۆن دۆلاران دەرباس بوویە.”
نومان کورتولموش نرخاندنەک ل سەر ھەلوەستا پارتیێن ئۆپۆزیسیۆنێ، ب تایبەتی ژی ل سەر پارتیا گەلا کۆماری (جەهەپێ) کر و گۆت کو ئامادەبوونا وان د کۆمیسیۆنێ دە پر ب قیمەتە. کورتولموش خوەست کو جەهەپە ل سەر ڤێ ھەلوەستا خوەیا ئاڤاکەر و پشتگر یا ژ بۆ پێڤاژۆیێ بەردەوام بە.
د داویا داخویانیا خوە دە، سەرۆکێ پارلامەنتۆیێ گۆتەگۆتێن ل سەر بازاریان رەد کرن و گۆت: “ژ دەستپێکێ ڤە چ سۆز نەدانە پەکەکێ یان ئالیێن دن. یاسایا کو ئامادە دبە تەنێ سەرەراستکرنێن تەکنیکی و یاسایی دحەوینە، عەفۆیا گشتی تێ دە نینە.”
