ئەردۆگان: ژ بۆ ترکیەیا بێ تەرۆر ئەم ئامادە نە
سەرۆککۆمارێ ترکیەیێ و سەرۆکێ گشتی یێ ئاک پارتیێ رەجەب تەییب ئەردۆگان راگھاند کو ئەو و ئیتفاقا جومھور د مژارێن نەتەوەیی دا، ب تایبەتی ژی د پێڤاژۆیا “ترکیەیا بێتەرۆر”، سیاسەتا دەرڤە و ئەولەھیێ دا ژ بۆ لھەڤکرن و دیالۆگێ ئامادە نە.
ئەردۆگان ئەڤ داخویانی ل ساپانجایێ، د چارچۆڤەیا “جڤینا 33یێ یا شێور و نرخاندنێ یا ئاک پارتیێ” دا و ل سەر گەلەک بابەتێن د رۆژەڤێ دا پەیامێن گرینگ بەلاڤ کرن.
ئەردۆگان د ئاخافتنا خوە دا تەکەزی ل سەر یەکیتیا جڤاکی کر و دیار کر کو چ وەلاتیەک ل سەر ڤێ ئاخێ زارۆکێ زڕبابی نینە.
ئەردۆگان گۆت، “ئەڤ دەولەتە تەنێ یا کۆمەکێ، بەشەکێ یان ژی نژادەکێ نینە؛ ئەڤە دەولەتا 86 ملیۆن وەلاتیێن ل سەر ڤێ ئاخێیە. سیاسەت ب واتەیا لھەڤکرن، دیالۆگ و دانوستاندنێ دهێت. ئەم نە نەچارین کو د ھەر مژارێ دا وەکە ھەڤ بفکرین، لێ دڤێت ئەم د مژارێن گرێدایی بەرژەوەندیێن وەلاتی و ملەتی دا ل ھەڤ بکین.”
سەرۆکۆمارێ ترکیەیێ هەر وەها بال کشاند سەر نیقاشێن ناڤخوەیی یێن پارتیا گەلا کۆماری (جەهەپێ) و گۆت کو ئەو ناخوازن ببن پارچەیەک ژ ڤێ رەوشێ. ئەردۆگان دەستنیشان کر کو ئۆپۆزسیۆنا کو ھێزا خوە ژ گەل نەگرە و پشتا خوە ب پلانێن ھێزێن بیانی گەرم بکە، تەنێ رییانێ ددە وەلاتی.
