بەری لووتکەیا ناتۆیێ ل ئەنقەرەیێ ئۆپەراسیۆنێن بەرفرەھ: 178 کەس ھاتن گرتن
ل ترکیەیێ د چارچۆڤەیا تەدبیرێن ئەولەھیێ یێن بەری لووتکەیا ناتۆیێ دە، ئۆپەراسیۆنێن ل دژی گومانبارێن “پێوەندیا ب رێخستنێن تەرۆرێ” ھاتن زێدەکرن. سەردۆزگەریا کۆمارێ یا ئەنقەرەیێ راگھاند کو د ئەنجاما ڤان ئۆپەراسیۆنێن بەرفرەھ دە 178 کەس ھاتنە گرتن.
ل گۆری داخویانیا دۆزگەریێ، ئەڤ پێنگاڤە بەشەکە ژ پلانا ئەولەھیێ یا تایبەت کو ژ بۆ مێڤاندارییا لووتکەیا بلندا ناتۆیێ ھاتیە ئامادەکرن. ھات دەستنیشانکرن کو د ھەفتەیا داوی دە ب گشتی 225 گومانبار ھاتبوون بنچاڤکرن؛ ژ ڤان کەسان دادگەھێ بریارا گرتنا 178 کەسان دا و 34 کەس ژی سەربەست بەردان.
کۆمەلەیا لێکۆلینێن مەدیا و یاسایێ بال کشاند سەر ناسنامەیا کەسێن کو د بن ناڤێ “ئۆپەراسیۆنێن ئەولەھیێ” دە ھاتنە گرتن. ل گۆری داخویانیا ڤێ کۆمەلەیێ، ئەڤ پێلا گرتنان پرانی باندۆرێ ل سەر دەردۆرێن سڤیل دکە و د ناڤ گرتیان دە رۆژنامەڤان، ئاکادەمیسیەن، پارێزەر، ئەندامێن سەندیکایان، مامۆستە، خوەندەکار و چالاکڤانێن جڤاکا سڤیل جھ دگرن.
لووتکەیا ناتۆیێ یا کو چاڤێن ھەرێمێ و جیھانێ ل سەرە، دێ د 7 و 8ی تیرمەھا 2026ێ دە ل ئەنقەرەیا پایتەخت هێتە لدارخستن. د ڤێ جڤینا لووتکەیێ یا گرینگ دە، تێ چاڤەرێکرن کو سەرۆکێن 32 وەلاتێن ئەندامێن ناتۆیێ بجڤن. ھەر وەھا ھات پشتراستکرن کو سەرۆکێ ئامەریکایێ دۆنالد ترامپ ژی دێ د ناڤ رێبەرێن بەشدار دە بە.
