بهغدا: حەسابەکا تایبەت بۆ پەرەیێن گەندەلیێ تێ ڤەکرن
حکوومەتا ئیراقێ راگھاند، ژ بۆ ڤەگەراندنا پەرەیێن کو ب گەندەلیێ ھاتنە برن حەسابەکی تایبەتێ بانکی ڤەدکە. ھەر وھا، دەما ڤەکشینا ھێزێن بیانی و رادەستکرنا چەکێن کۆمێن چەکدار ھات ئەشکەرە کرن.
بەردەڤکێ حکوومەتا ئیراقێ حهیدهر عەبوودی ئیرۆ 29ێ خزیرانا 2026ان د کۆنفەرانسەکە رۆژنامەڤانیێ دە نەخشەرێیا نوویا حکوومەتێ ئەشکەرە کر.
عەبوودی راگھاند، سەرۆکوەزیر عەلی زەیدی فەرماند دایە وەزارەتا دارایی دا کو حەسابەکی تایبەتێ بانکی ڤەکە. ئارمانجا ڤی حەسابێ ئەوە کو ھەموو پەرەیێن کو ژ دۆزێن گەندەلیێ و دەولەمەندبوونا نەیاسایی ھاتنە ڤەگەراندن، تێ دە بێن کۆمکرن.
عەبوودی دیار کر، ئۆپەراسیۆنا ل دژی گەندەلکاران بەردەوامە و ھەتا نھا 21 بەرپرس ھاتنە گرتن. عەبوودی گۆت: “مکورھاتنێن گرتیان، رێ ل بەر تۆرێن نوو یێن گەندەلیێ ڤەدکن. ستراتەژیا مە نە تەنێ ل سەر کەسانە، لێ بەلێ چاکسازیەکە گشتی یا سازیانە.”
د مژارا ئەولەھیێ دە، حهیدهر عەبوودی ئاشکەرە کر، داویا مەھا ئیلۆنا ئیسال، رۆژا داوییە کو دڤێ ھەموو کۆمێن چەکدار چەکێن خوە رادەستی دەولەتێ بکن. ھەروھا عەبوودی دەستنیشان کر، د داویا مەھا ئیلۆنێ دە ھێزێن ھەڤپەیمانیا ناڤدەولەتی دێ ب تەمامی ژ ئیراقێ ڤەکشن.
د داویا کۆنفەرانسێ دە، بەردەڤکێ حکوومەتێ راگھاند، حکوومەتا ئیراقێ داخوازا ئیرانێ قەبوول کریە کو مەراسیما جەنازەیێ رێبەرێ ئیرانێ عەلی خامنەیی د 8ێ تیرمەھا بێ دە ل ئاخا ئیراقێ بێ لدارخستن.
