لووتکەیا ناتۆیێ ل ئەنقەرەیێ: ترامپ گھیشت ترکیەیێ؛ ئیسرایل دخوازە فرۆتنا F-35 بێتە راوەستاندن
سەرۆکێ ویلایەتێن یەکبوویی یێن ئامەریکایێ دۆنالد ترامپ، ژ بۆ پشکداریکرنا د لووتکەیا 36ێ یا ھەڤپەیمانیا باکورێ ئەتلەسی (ناتۆ) دا، ئیرۆ سێشەمێ (7ێ تیرمەھا 2026ێ) پشتی نیڤرۆ ب سەردانەکا فەرمی گھیشت ئەنقەرەیا پایتەختا ترکیەیێ.
ھەڤدەم ل گەل دەستپێکرنا لووتکەیێ، سەکرەتەرێ گشتی یێ ناتۆیێ ئیمزەکرنا چەند گرێبەستێن مەزن یێن لەشکەری راگھاند، ھەروھا ئیسرایلێ ژی نەرازیبوونا خوەیا توند ل دژی داخوازا ترکیەیێ یا ژ بۆ کرینا بالافرێن شەرێن پێشکەفتی F-35 نیشان دا.
سەکرەتەرێ گشتییێ ناتۆیێ مارک روتی، د رۆژا یەکێ یا لووتکەیێ دا گۆتارەک پێشکێش کر و راگھاند کو وەلاتێن ئەندام و کۆمپانیێن ھەر دو ئالیێن دەریایا ئەتلەنتیکێ، ب بھایێ ب ملیاران دۆلاران گرێبەستێن نوویێن لەشکەری ئیمزە دکن.
روتی بال کشاند سەر مەترسیێن گەردوونی و ھشیاری دا وەلاتێن ئەندام و گۆت، “رووسیا، چین، کۆرەیا باکور و ئیران ب ھەڤ را کار دکن و د وارێ سەربازی دە وەبەرھێنانێن بەردەوام دکن. دڤێت ناتۆ ل ھەمبەر ڤێ ھەماھەنگیێ ھشیار و چاڤڤەکری بت، ژ بەر کو بەرژەوەندیێن ناتۆیێ د خەیالا وان دا نینن.”
بەریا دەستپێکرنا لووتکەیێ، سەرۆکوەزیرێ ئیسرایلێ بەنیامن نەتانیاھو ب داخویانیەکا فەرمی بانگ ل ئامەریکایێ کر کو بالافرێن شەری یێن F-35 ژی پەرچەیێن وان نەدەت ترکیەیێ. نەتانیاھو د داخویانیا خوەیا ژ بۆ کانالا “فۆکس نیوز”ێ دە دەستنیشان کر کو ئەڤ پێنگاڤە دێ سەردەستیا ئاسمانی یا ئیسرایلێ بخە بن مەترسیێ.
نەتانیاھو گۆت: “ئەز وسا نافکرم کو پێدڤی بیت بالافرێن F-35 و مۆتۆرێن بالافرێن شەری بدن ترکیەیێ. ئەڤ یەک دێ ھەڤسەنگیا ھێزێ ل رۆژھلاتا ناڤین تێک بدا. ژ بۆ مە، مسۆگەرکرنا سەردەستیا ئەسمانی یا ئیسرایلێ و ئامادەھیا ئامەریکایێ ل ھەرێمێ گرینگە.”
ل ئالیێ دن، بەرپرسێ راگھاندنێ یێ سەرۆکاتیا کۆمارا ترکیەیێ بورھانەدین دوران، گرینگیا سەردانا دۆنالد ترومپ یا ژ بۆ ئەنقەرەیێ نرخاند. دوران دیار کر کو ھەر دو وەلات وەکی دو ھەڤپەیمانێن نێزیک و ستراتەژیک تەڤگەرێ دکن.
دوران ئانی زمان کو د ڤێ سەردانێ دە تێکلیێن دوئالی یێن د وارێ بەرەڤانی، بازارگانی و وەبەرھێنانێ دا دێ هێن گۆتوبێژکرن و ئەڤ لووتکە دێ بیتە فەرسەندەکا گرینگ ژ بۆ پەیداکرنا نێرینێن ھەڤپار ل سەر مژارێن ھەرێمی و گەردوونی.
