سەرۆکوەزیرێ ئیراقێ ل ئەنقەرەیێ ژ ئالیێ ئەردۆگان ڤە ھاتە پێشوازیکرن

 سەرۆکوەزیرێ ئیراقێ عەلی فالح زەیدی ژ بۆ پێکانینا سەردانەکا فەرمی گھیشت ئەنقەرەیا پایتەختا ترکیەیێ و ژ ئالیێ سەرۆککۆمارێ ترکیەیێ رەجەب تەییب ئەردۆگان ڤە ب مەراسمەکا فەرمی ھاتە پێشوازیکرن. ئەڤ سەردانا فەرمی یا شاندا ئیراقی د چارچۆڤەیا ھەولدانێن ھەر دو وەلاتان دە تێ کو ئارمانجا وێ یا سەرەکی خورتکرنا پەیوەندیێن ئابۆری، سیاسی و ئەولەھیێ یە.

تێ چاڤەرێکرن کو د جڤینان دە دیتنا چارەسەریێن ماییندە بۆ وان دۆسیایێن کو ئەڤە دەمەکێ درێژە د ناڤبەرا بەغدا و ئەنقەرەیێ دە تێن نیقاشکرن، ببە رۆژەڤا سەرەکی. سەرۆکوەزیرێ ئیراقێ عەلی فالح زەیدی ل سەر حەسابا خوەیا فەرمی یا تۆرێن جڤاکی گرینگیا ڤێ سەردانێ دیار کر و راگھاند کو ئەو ل ئەنقەرەیێ نە ژ بۆ گۆتوبێژکرنا دۆسیایێن وەبەرھێنانێ، کریزا ئاڤێ، پرۆژەیا رێیا گەشەپیدانێ و خورتکرنا ئیستیقرار و تەناھیا ھەرێمێ.

زەیدی ھەر وھا دەستنیشان کر کو د ھەڤدیتنان دە دۆسیایێن گرینگ یێن ئابۆری و ئەولەھیێ ل بەر رۆناھیا بەرژەوەندیێن ھەڤپار یێن ھەر دو گەلێن جیران تێن نرخاندن. د ڤێ چارچۆڤەیێ دە تێ پایین کو ھەر دو ئالی ب ھوورگلی ل سەر مژارێن وەکی پارڤەکرنا پشکا ئاڤا رووبارێن دیجلە و فراتێ، پاراستنا ئەولەھیا سینۆران و ئاڤێتنا پێنگاڤێن پراکتیکی ژ بۆ بجھانینا پرۆژەیا ستراتەژیکا رێیا گەشەپیدانێ بسەکنن.