پارلامەنتۆیا ترکیەیێ ئیرۆ دەنگدانێ ل سەر پرۆژەیاسایا پێڤاژۆیا ئاشتیێ دکە
پارلامەنتۆیا ترکیەیێ ژ بۆ نیقاشکرن و دەنگدانا ل سەر پرۆژەیاسایا چارچۆڤەیا “پێڤاژۆیا ئاشتیێ” کو ژ 12 بەندان پێک تێ و مەرجێن سوودوەرگرتنا گرتیێن پەکەکێ دیار دکە، ئیرۆ دجڤە.
کۆمیسیۆنا دادێ یا پارلامەنتۆیا ترکیەیێ رۆژا شەمبیێ (8ێ تەباخا 2026ێ) پرۆژەیاسایا ناڤبۆری پەژراندبوو و ھاتە بریاردان کو ژ بۆ نیقاشکرن و دەنگدانێ پێشکێشی جڤاتا گشتی یا پارلامەنتۆیێ بهێت کرن.
ھوورگلیێن پرۆژەیاسایا ژ 12 بەندان:
– پرۆژەیاسا ژ 12 بەندان پێک دهێت و ئیمزایا 360 پارلامەنتەران ل سەر ھەیە. ئەڤ پێنگاڤ رێکارێن رەفتارکرنا لگەل تاوانێن گرێدایی پەکەکێ و کەجەکێ دیار دکە.
– بجھانینا ڤێ قانوونێ ب شەرتەکی سەرەکی ھاتیە گرێدان؛ ئەو ژی بەلاڤکرنا بریارا فەرمی یا ئەنجوومەنا ئەولەکاریا نەتەوەیی یا ترکیەیێ یا ل سەر ھلوەشاندنا رێخستنێ د رۆژنامەیا فەرمی دەیە. پشتی بەلاڤکرنا بریارێ، تەنێ شەش مەھان دەرفەت تێ دان کو کەس ژ ڤێ قانوونێ سوودێ وەربگرن.
ل گۆری ناڤەرۆکا پرۆژەیاسایێ، سزایێ وان کەسێن کو سزایێ وان ژ 15 سالێن زیندانێ کێمترە بۆ دەما 5 سالان، و یێن ژ 15 سالان زێدەترە ژی بۆ دەما 10 سالان دهێت پاشخستن. دیسا ژی شەرت تێ دانین کو د ڤێ دەمێ دە چ تاوانەکا دن یا تەرۆرێ نەکن. ھەر وھا بۆ دەما 2 ھەتا 3 سالان مافێ سیاسەتا چالاک ژ وان دهێت ستاندن.
– خالا ھەری ھەستیار یا ڤێ قانوونێ ئەوە کو سەرکرداتیا پەکەکێ، ئەو کەسێن کو دەستێ وان د تاوانێن کوشتنا ب زانەبوون دە ھەیە، یێن کو بەری سالا 2005ێ تاوان کرنە و کەسێن کو سزایێ زیندانا ھەتاھەتایێ ل سەر وان ھەیە ب چ ئاوایی ب خوە ڤە ناگرە.
ژ بۆ سەرپەرشتیا ڤێ پێڤاژۆیێ، کۆمیسیۆنەکا بلند ب سەرۆکاتیا جیگرێ سەرۆککۆمارێ ترکیەیێ جەودەت یلماز و کۆمیسیۆنەکا چاڤدێریێ د ناڤ پارلامەنتۆیێ دە تێنە ئاڤاکرن.
