شەیخموس ئۆززەنگن

چل سال… چل سال ل سەرێ چیایێن کوردستانێ، ب جان و خوینا زارۆکێن مە، ب ھێڤیا دایکان و بابێن مە، شەر ھاتە کرن. شەڕەکی بقرێژ بوو. بەشەک مەزن ژ کوردان دگۆتن: “ئەڤ شەرە ژ بۆ ئازادیا ملەتێ کوردە، ژ بۆ ئاخا مە، ژ بۆ روومەتا مە.”یە.

لێ نھا، دەما ئەم ل پاش خوە دنێرین؛ ئەم دبینین کو ئەڤ سەرھلدان، نە تەنێ تێکچوویە، بوویە ئاموورەک کو مەژی و جانێ ملەتێ کورد ژی خستیە بن خییانەتەک گران.

150 ھەزار زارۆکێن کورد… ھەژمارێن کو دلێ ھەر دایکەکێ داخ ددە. 5 ھەزار گوندێن مە شەوتاندن و ڤالا کرن. 10 ملییۆن کورد ژ وەلاتێ خوە کۆچبەر و سورگوون بوون. ب ملیۆنان کورد د زیندانان دە رازان، ئیشکەنجە دیتن، ژ ئاخا خوە ھاتن دەرخستن. ئاسیمیلاسیۆن و پووچبوون گھیشت ئاستەک بلند.

کی بوو سەدەما ڤێ؟

دەولەتا ترک و ھێزێن وێ، بەلێ. لێ یا ھەری تال و ب ئێش ئەڤەیە: رێخستنێن کو دگۆتن “ئەم پارێزڤانێن دۆزا کوردن”، د داویێ دە بوونە یەک لگەل دژمنی. ئۆجالان و پەکەکە، پشتی چل سالان، بێ کو ژ ڤێ کەد و بەدەلا کو ملەتێ کورد دایە، شەرم بکن، تەسلیم بوون. نە ژ بۆ کوردان تشتەک بدەستخستن، نە ژی ژ بۆ ئاخا مە. ھەر تشت ڤەگەریا سەر “پاراستن، خورتکرنا دەولەتا ترکان و ئەنتەگرەکرنا کوردان لگەل دەولەتا ترک”. واتە، “دۆزا مە” ژ نوو ڤە ھاتە بەرنامەکرن و تێکبرن.

ئەڤ نە تەنێ تێکچوونا لەشکەرییە. ئەڤ تێکچوونا مەژی و دەروونی یە. ملەتێ کورد، کو ب سەدسالان ل دژی زۆرداریێ سەکنی بوو، نھا د بن بارێ “ئاشتیێ”یا کو ژ ژۆر ڤە دهێتە دایین دەیە. ھێزێن تایبەت یێن پارێزڤانێن دەولەتێ، پیلان و پرۆژەیێن خوە گھاندن ئاستا پرۆگرامێ. ئەم ئێدی نە تەنێ د زیندانان دە نە؛ ئەم د مەژی دە ژی ھاتنە گرتن، زیندان کرن. زارۆکێن مە دگۆتن “ئازادی”، لێ ئیرۆ بەشەک ژ وان دبێژن “ئاشتی”، یا سەختە، کو تەنێ ناڤێ وێ یە.

لێ ئەز، وەک کوردپەروەرەکی دبێژم؛ ئەڤە نە داویا مەیە. خوینا کو ل چیایێن کوردستانێ رژییا، نە ژ بۆ تەسلمبوونێ بوو. وان زارۆکان، وان جەنگاوەران ب ھشمەندییەک ملی، کورد و کوردستانی، بەرێ خوە دان سەرێ وان چییایێن قەدیم. مخابن ل سەرێ وان چییایان، رووبروویێ سەرکردایەتیەکا خییانەتکار بوون.

گوندێن شەوتی، زارۆکێن کوشتی، دایکێن شین و زیندانێن تاری…

ئەو ھەموو شاھدێن راستیێ نە. راستیا کو دبێژە: دۆزا ملەتێ کورد نە د دەستێ یەک کەسی دەیە، نە ژی د دەستێ رێخستنەکێ دەیە. ئەو د دلێ ھەر کوردەکی دەیە، د زمانێ مە دەیە، د چیایێن مە دەیە. د دیرۆک و ھشمەندییا مە دەیە. چ ھێز نکارن ڤی ئاگرێ داخوازا ئازادییا ملەتێ کورد بتەمرینن. ئەڤ مللەتە دێ ل سەر خاکا خوە بیتە خوەدی دەستھلاتدارییێ، دێ بیتە خوەدی دەولەت.

ئەم ئێدی دڤێت ژ خەوێ ھشیار ببین. ئەم ئێدی دڤێت ژ “رێبەر”ێن کو ئەم برین سەرێ چیایان و پاشێ ئەم تەسلیم کرین، ھێڤیێ نەکن. بکاربن حەسابێ ژ وان بپرسین. حەسابێن خوینا زارۆکێن خوە، حەسابا شەوتاندنا گوندێن خوە و حەسابا وێرانکرنا گوندێن خوە بپرسن. حەسابا کەدا خوە، رۆژ و شەڤێن ئیشکەنجە و زیندانییێن خوە بپرسین.

ئەم دڤێت رۆژ بەری رۆژێ ل خوە ڤەگەرین. وەرن سەر ھێزا خوە، سەر یەکیتیا خوە یا مللی، سەر رووحەکا مللی، سەر راستیا دیرۆکا خوە: کوردستان، نە تەنێ ئاخە؛ کوردستان روحە، کەدە، ھشمەندییەک دیرۆکییە، زمانە، چاندە بیرە و ئەڤ روح هێژ ژی دژیت.

بلا دەنگێ مە بلند ببیت:

ئەم ئێدی ناخوازین کو خوینا مە ژ بۆ پرۆژەیێن کەسێن دن و دژمنێن مە برژیت. ئەم ناخوازین کو زارۆکێن مە ژ بۆ “ئاشتی”یا سەختە، کو تەنێ ناڤێ وێیە، بێنە کوشتن. ئەم دخوازین ئازادیا راستین، ئازادیا کو ژ دلێ مللەتێ کورد دەردکەڤیت، نە ژ دەستێ یەکی کو د ئیمرالی دەیە یان ژی ل پایتەختێن بیانی.

ئەڤ سەرھلدانە تێکچوویە. لێ ملەتێ کورد… هێژ ژی ل سەر پێیایە و ھەیا کو یەک کورد ل سەر ئاخا کوردستانێ بمینە، ھەیا کو یەک زارۆکەکی ب زمانێ خوە (کوردی) باخڤە، دۆزا مە دمینە.

ئەم کوردپەروەر، دەنگێ وان زارۆکێن کو ھاتن کوشتنن.

ئەم کوردپەروەر، دەنگێ وان گوندێن کو ھاتنە شەوتاندنن.

ئەم کوردپەروەر، دەنگێ کوردستانێ نە و ئەم ئێدی ناخوازین و رێنادین کو کەس مە بفرۆشیت.