ئهگهر پرۆژهیاسایا ل دهرگهههكێ یاسایی بگهرێت بۆ ئهندامێن پهكهكێ پشتی دهستبهردانا چهكی، كێشهیا مللهتهكی ب دروستبوونا حزبهكێ دەست پێ نهكرییه دا ب ههلوەشاندنا وێ داوی بێت.
ل ڤێرێ جوداهییا د ناڤبهرا تهمهنێ حزبهكێ و تهمهنێ دۆزا مللهتهكی دا دهێته ژبیركرن، پهكهكه دروستبوویا سهردهمهكێ سیاسی یێ ههڤچهرخه، لێ كورد و زمان و جۆگرافیا وان ژ دهولهتا توركیا و سنۆرێن وێ كهڤنترن. بزاڤا نهتهویی یا كوردی ب خۆ دههان سالان بهری دروستبوونا پهكهكێ ل سهدەیێ نۆزده و بیستان دهست پێ كربوو.
لهوما ههلوەشاندنا حزبهكێ ههرچهند یا مهزن و كاریگهر بیت، ب واتایا چارهسهركرنا دۆزا مللهتهكی ناهێت. بهری پهكهكێ (بزاڤ، سهرههلدان، قوتابخانێن فكری و حزبێن جودا جودا) ههبووینه، و ل پال وێ ژی رێبازێن وهسا سهرههلداینه كو هزربیرییا وێ یان شێوازێن پهكهكێ قهبوول نهكرینه. پهكهكه بهشهكه ژ مێژوویا سیاسی یا كوردی يا ههڤچهرخ، لێ نه ههمی مێژوو، دهربرینهكه ژ پرسا كوردان، لێ نه ژێدهرێ ههبوونا وێ یه و نه ژی خودانێ پێشهرۆژا وێ یه.
پرسا كوردی رهوایا خۆ ژ چهكی وهرناگریت دا كو ب بێدهنگبوونا چهكی ژی ژ ناڤ بچێت. مافێ نهتهوی ژ لۆلییا تفهنگێ چێنابێت، بهلكو ژ ههبوونا ملهتهكی دهێت كو خودان (ناڤ، زمان، بیرهاتن و ئیراده) یه. چهك دبیته ههلگرێ دۆزێ ل قۆناغهكا دیاركرى، لێ نابیته پێناسهیا وێ یا ههمیشهیی.
د فهلسهفا دانپێدانێ يا “هیگل”ی دا: ئازادییا مرۆڤی ب تەنێ ب رێككهفتنا ههبوونا وی تهمام نابیت، بهلكو وهختێ ئهوێ دی دانپێدانێ ب وی وهك ناخهكێ یهكسان دكهت.
ئاراستهیێ سیاسی بهس نینه دهولهت دانپێدانێ ب كوردان بكهت وهك تاك، د دهمهكی دا كو ناسنامهیا وی یا جڤاكى رهت بكهت. هاوولاتیبوون ل سهر بنهمایێ بێدهنگبوونا ل سهر ناڤ و زمانی دبیته نهبوونا یهكسانیێ، بهلكو خۆڤەشارتنا ئینكاركرنێ یه د دیزاینهكا نوى يا مافێ تاكهكهسی دا.
ل ڤێرێ جوداهییا دیار د نێڤبهرا تێكههلبوون و حهلیانێ دا دهردكهڤێت. تێكههلبوونا دیمۆكراتی واتایا هندێ ددهت كو كورد بچیته د جهێ ههڤبهش دا ب پاراستنا ناسنامهیا خۆ، لێ حهلیان ئهوه وهختێ دهێته قهبوولكرن پشتی نههێلانا ناسنامهیێ.
یا ئێکێ ئێكگرتنێ ژ جوداهییان دئاڤا كهت.
لێ یا دوێ ب هێزێ ئێكشێوهییێ دروست دكهت و ناڤێ وێ دكهنه ئێكگرتنا نشتیمانی.
لێ هزركرنا نهتهوی ب تەنێ گازندان ژ دهولهتێ ناكهت. چاوا بۆ دهولهتێ نینه زۆرداریێ د پێناسهكرنا كوردان دا بكهت، وهسا ژی بۆ هیچ رێكخراوهكێ نینه نوێنهراتییا وان بو خۆ قۆرخ بكهت.
مللهت ئازاد نابیت بو گوهۆرینا بالادهستییا دهولهتێ بۆ بالادهستییا حزبهكێ، لێ ب تەنێ ئهو حزب دهێته گوهۆرین ئهوا ب ناڤێ مللهتى دئاخڤیت. مللهت ژ حزبێ مهزنتره، دۆز ژ ئایدۆلۆژیایا وێ كویرتره و ئیرادهیا نهتهوهیی د كهسایهتی یان سهركردهیهكی دا بچووك نابێت.
نەمانا پهكهكێ دشێت داویێ ب قۆناغا چەکداری بینیت، لێ ل لایەکێ دی دشێت پرسا کوردی ژ زیندانا كێشهیا ئهمنی ئازاد بكهت و بزڤرینتە سەروکانییا وێ یا بنەرەتی: كو پرسا دانپێدانێ، مافان و شەراکەتا مێژوویی یە.
