ئۆزگور ئۆزەل پشتی خوەکوشتنا پۆلیسێ خانەنشین ھۆشداری دا: “ئەم ل بەر تەقینەکا جڤاکی نە”

ل پایتەختا ترکیەیێ ئەنقەرەیێ، پۆلیسەکی خانەنشین د دەما چالاکیا داخوازکرنا مافێن ئابۆری دە ل بەر ئاڤاھیا دادگەھا دەستوورا بنگەھین داوی ل ژیانا خوە ئانی. بوویەرێ د قادا سیاسی و رایا گشتی دە کارڤەدان و بەرتەکێن توند ل پەی خوە ئانین.

ل ئەنقەرەیێ، کۆما کارمەند و پۆلیسێن خانەنشین ژ بۆ داخوازکرنا مافێن خوەیێن ئابۆری و زێدەکرنا مووچەیان ل بەر ئاڤاھیا دادگەھا دەستوورا بنگەھین د چالاکیێ دە بوون. چالاکڤانان داخواز دکر کو رێژەیا زێدەکرنا مووچەیان یا کو ژ بۆ کارمەندێن سەرکار ھاتی پەژراندن، ژ بۆ وان ژی بێتە بجھانین. د ناڤ چالاکیێ دە، پۆلیسەکی خانەنشینێ 60 سالی ژ بەر شەرت و مەرجێن گران یێن ژیانێ و کریزا ئابۆری ب چەکێ خوەکوشتن پێک ئانی.

ئۆزگور ئۆزەل: ئەم ل بەر تەقینەکا جڤاکی نە

پەیوەندیداری بوویەرێ، سەرۆکێ گشتی یێ پارتیا گەل یا کۆماری (جەهەپێ) ئۆزگور ئۆزەل بەرتەکەکا توند نیشان دا و دیار کر کو ئەڤ بوویەر رەوشا گران یا خانەنشینان نیشان ددە.

ئۆزەل د داخویانیا خوە دە تەکەز کر کو کریزا ئابۆری خانەنشین گھاندنە ئاستەکێ پر خراب و گۆت:

“ھێرسەکا مەزن د ناڤا خانەنشینان دە کۆم دبە. ئەم ل بەر تەقینەکا جڤاکی نە؛ مژار ئێدی گھیشتیە ئاستا سەرھلدانێ. مخابن کارەساتەک کو نەدھات خەیالا کەسی روو دا. دڤێت رێڤەبرێن دەولەتێ دەملدەست بەرێ خوە بدن ئەڤی ئالی و پرسگرێکێ ببینن. ئێدی بەسە! خانەنشینەک داوی ل ژیانا خوە تینە، لێ بەلێ مەدیایا دەستھلاتێ ڤان ئێشان پاشگوھ دکە.”

سەرۆکێ جەهەپێ ھەر وھا بانگا چارەسەریا بلەز یان ژی ھلبژارتنێ کر و گۆت: “بەریا کو ئێشێن گرانتر و خرابتر روو بدن، دڤێت یان سندۆقا ھلبژارتنێ بهێت پێشبەری وەلاتیان یان ژی راستەراست و بێیی دەرەنگکەتن رەوشا ئابۆری یا خانەنشینان بێتە باشکرن.”